ជាតិ
នយោបាយជាតិ
បក្សអំណាចខ្មែរថា មេដឹកនាំបក្សផ្សេងប្រើលេសមិនចង់ពិភាក្សាជាមួយខ្លួន
×
លោក ទេព វីរៈ អ្នកនាំពាក្យគណបក្សអំណាចខ្មែរ បានចាត់ទុកការបដិសេធរបស់មេបក្សផ្សេងទៀត មិនចូលរួមប្រជុំពិភាក្សាបង្កើត «សម្ព័ន្ធគណបក្សគ្មានអាសនៈក្នុងសភាដើម្បីតស៊ូគោលនយោបាយរួម» ថាជាលេស ។ តំណាងគណបក្សថ្មីរូបនេះ បានអះអាងថា ខ្លួននៅតែបន្តអញ្ជើញប្រធានគណបក្សដែលបដិសេធឲ្យគ្រប់ចំនួន ៣ដងក្រោមកម្មវត្ថុដដែល។
កាលពីពេលថ្មីៗកន្លងមកនេះ គណបក្សអំណាចខ្មែរ បានដាក់លិខិតអញ្ជើញមេដឹកនាំគណបក្ស ដែលមិនមានអាសនៈក្នុងរដ្ឋសភា ដើម្បីចូលរួមពិភាក្សាបង្កើត «សម្ព័ន្ធគណបក្សគ្មានអាសនៈក្នុងសភាដើម្បីតស៊ូរគោលនយោបាយរួម» ដោយគណបក្សដែលត្រូវបានអញ្ជើញនោះរួមមាន គណបក្សសំបុកឃ្មុំសង្គមប្រជាធិបតេយ្យ គណបក្សសម្ព័ន្ធដើម្បីប្រជាធិបតេយ្យ គណបក្សខ្មែរសាមគ្គី គណបក្សប្រជាធិបតេយ្យមូលដ្ឋាន គណបក្សខ្មែរឈប់ក្រ និងគណបក្សមួយចំនួនទៀត។ ប៉ុន្តែរហូតមកដល់ពេលនេះ មិនត្រឹមតែទទួលបានចម្លើយវិជ្ជមាននោះទេ តែថែមទាំងទទួលការបដិសេធមិនចូលរួមពីគណបក្សមួយចំនួនទៀត។
គណបក្សដែលបដិសេធនោះគឺ គណបក្សសំបុកឃ្មុំសង្គមប្រជាធិបតេយ្យរបស់ លោកម៉ម សូណង់ដូ និង គណបក្សប្រជាធិបតេយ្យមូលដ្ឋានរបស់លោកយ៉េង វីរៈ ក្រោមហេតុផលថា ជាប់រវល់ ចំណែកឯ គណបក្សសម្ព័ន្ធដើម្បីប្រជាធិបតេយ្យរបស់លោក ខឹម វាសនា បានបដិសេធក្រោមហេតុផល ថាសរសេរឈ្មោះគណបក្សមិនបានត្រឹមត្រូវ។
លោក ទេព វីរៈ វាយតម្លៃថា៖ «ការមិនចូលរួមរបស់មេបក្សទាំងនោះ គ្រាន់តែជាលេស និងការដោះសារប៉ុណ្ណោះ។ តែគណបក្សអំណាចខ្មែរនៅតែបន្តអញ្ជើញមេបក្សទាំងនោះឲ្យគ្រប់ចំនួនបីដង។ ចំពោះគណបក្សសម្ព័ន្ធដើម្បីប្រជាធិបតេយ្យដែលអះអាងថា មិនចូលរួមដោយសារតែសរសេរឈ្មោះគណបក្សខុស យើងនឹងកែ ចំណែកឯគណបក្សដែលអះអាងថាជាប់រវល់ យើងនឹងសួរថាតើពេលណាមិនរវល់ ដើម្បីយើងសម្រួលទៅតាមនឹង»។
បន្ថែមពីលើនេះ ក្រោយពីគណបក្សមួយចំនួនបដិសេធមិនចូលរួមពិភាក្សានេះ លោក សួន សេរីរដ្ឋា ប្រធានគណបក្សអំណាចខ្មែរ បានសរសេរនៅលើទំព័រហ្វេសប៊ុក ថា ការបដិសេធមិនចូលរួមរបស់មេបក្ស គឺជាលេស តែរូបលោកនឹងនៅតែងបន្តអញ្ជើញមេបក្សទាំងនោះឲ្យគ្រប់ចំនួនបីដងក្រោមកម្មវត្ថុដដែល។
ខ្លឹមសារនោះបានបញ្ជាក់ថា៖ «បើពួកគេបដិសេធទាំង ៣លើកនៅក្រោមហេតុផលថាជាប់រវល់ ឬហេតុផលណាផ្សេងទៀតនោះ គឺខ្ញុំនឹងធ្វើសិក្ខាសាលា និងវេទិកា ជាទ្រង់ទ្រាយធំគ្រប់ខេត្តទូទាំងប្រទេស ដើម្បីបង្ហាញប្រាប់ពលរដ្ឋខ្មែរ ឲ្យស្គាល់នូវសារជាតិរបស់ពួកគេ»។
ទាក់ទងនឹងការតស៊ូគោលនយោបាយនេះ គណបក្សអំណាចខ្មែរបានរៀបចំរួចជាស្រេចហើយ ដើម្បីតស៊ូទាមទារជាមួយគណបក្សកាន់អំណាច។ គោលនយោបាយទាំងនោះរួមមាន ១. ទាមទារឲ្យមាន គ.ជ.ប ឯករាជ្យពិតប្រាកដ, ២-ទាមទារលុបឈ្មោះជនជាតិវៀតណាម ដែលគ្មានសញ្ជាតិខ្មែរចេញពីបញ្ជីឈ្មោះអ្នកបោះឆ្នោតឲ្យអស់, ៣-ទាមទារឲ្យពលរដ្ឋខ្មែរដែលរស់នៅនិងធ្វើការឯបរទេសបានបោះឆ្នោតគ្រប់គ្នា, ៤. ទាមទារឲ្យមានច្បាប់ផ្តល់សិទ្ធិឲ្យពលរដ្ឋជាអ្នកលើកស្នើបេក្ខជនឈរឈ្មោះ ដោយបញ្ឈប់ឲ្យមានការតែងតាំងពីគណបក្ស ៥. ទាមទារឲ្យមានច្បាប់កំណត់អាណត្តិបេក្ខជនឈរឈ្មោះជានាយករដ្ឋមន្ត្រី និងនាយករដ្ឋមន្ត្រីត្រូវបោះឆ្នោតដោយផ្ទាល់ពីប្រជាពលរដ្ឋ។
លោក ទេព វីរៈ បានសង្កត់ធ្ងន់ៗថា៖ «គោលនយោបាយទាំង៥នេះ បើគណបក្សអំណាចខ្មែរទាមទារមិនបានទេ នោះគណបក្សអំណាចនឹងមិនចូលរួមបោះឆ្នោះឡើយ»៕
© រក្សាសិទ្ធិដោយ thmeythmey.com