ជាតិ
នយោបាយជាតិ
កុំចាត់ទុកនយោបាយជារបររកស៊ី តែនយោបាយគឺជាការងារជួយសង្គម!
× យុវជនកុំស្រមៃតែចង់ធ្វើធំ ភ្លេចការងារតូច ដែលខ្លួនពេញចិត្ត និងមានប្រយោជន៍សម្រាប់សង្គម! យុវជនកុំចាត់ទុកនយោបាយជាមុខរបររកស៊ី តែនយោបាយគឺជាការងារជួយសង្គមជាតិ។ យុវជនកុំគិតតែទាមទារសិទ្ធិ តែត្រូវគិតពីកាតព្វកិច្ចរបស់ខ្លួនក្នុងនាមជាពលរដ្ឋដែលត្រូវធ្វើសម្រាប់ជាតិ។ ទាំងនេះ គឺជាសារសំខាន់របស់អ្នកនយោបាយ និងមន្ត្រីអង្គការក្រៅរដ្ឋាភិបាល ចាស់វស្សាកម្ពុជា មានលោក យឹម សុវណ្ណ លោក គល់ បញ្ញា និងលោក ឈាង វុន ដែលប្រាប់ទៅយុវជនជំនាន់ក្រោយ។ លោក ឈាង វុន ធ្វើជាអ្នកតំណាងរាស្ត្របក្សប្រជាជនកម្ពុជាដំបូងអាណត្តិទី ១ ឆ្នាំ ១៩៩៣ លោក យឹម សុវណ្ណ ជាប់ជាតំណាងរាស្ត្រគណបក្សសម រង្ស៊ី ដំបូងនៅអាណត្តិទី ២ ឆ្នាំ ១៩៩៨ និងលោក គល់ បញ្ញាប្រឡូកក្នុងការងារសិទ្ធិមនុស្សតាំងពីឆ្នាំ ១៩៩១ ។
លោក យឹម សុវណ្ណ តំណាងរាស្ត្រគណបក្សសង្គ្រោះជាតិ៖ «យុវជន ត្រូវតែបណ្តុះបណ្តាលចំណេះដឹង កសាងសមត្ថភាពចេញពី សង្គម សាលារៀន អ្នកនយោបាយជើងចាស់ដែលល្អៗ ហើយត្រូវធ្វើសេដ្ឋកិច្ចខ្លួន និងគ្រួសារឲ្យរឹងមាំសិនមុននឹងចូលធ្វើនយោបាយ។ យើងមិនអាចធ្វើនយោបាយ ទុកគ្រួសារឲ្យលំបាកផ្នែកសេដ្ឋកិច្ចទេ។ បទពិសោធរបស់ខ្ញុំ យើងត្រូវធ្វើខ្លួនឲ្យមានចំណេះដឹង ហើយមានចំណេះដឹង មិនគ្រប់ឡើយ ត្រូវមានសេចក្តីក្លាហាន សេចក្តីក្លាហាន មិនគ្រប់គ្រាន់ទេ តែត្រូវយល់កាលៈទេសៈ។ យើងធ្វើនយោបាយ យើងមិនមែនចាត់ទុកនយោបាយជាមុខរបរដើម្បីរកស៊ីនោះទេ នយោបាយគឺជួយសង្គមជាតិ។ យើងត្រូវមានស្មារតីស្នេហាជាតិ គុណធម៌ និងរឹងប៉ឹង ដើម្បីសម្រេចគោលដៅរបស់ខ្លួន។ អ្នកដឹកនាំត្រូវមានការសម្រេចចិត្តខុសពីមនុស្សធម្មតា ត្រូវហាត់ពត់លត់ដំចិត្តគំនិត យល់ស្ថានការណ៍ យល់កាលៈទេសៈ ពេលនោះយើងនឹងអាចសម្រេចកិច្ចការ ក្លាយជាមេដឹកនាំល្អ។ អ្នកដឹកនាំត្រូវចេះកសាងអ្នកគាំទ្រ ជំនួយការ ព្រោះយើងពួកែ មិនមែនតែយើងទេ អ្នកជួយយើងក៏ពូកែដែរ»។
លោក គល់ បញ្ញា នាយកប្រតិបត្តិអង្គការខុមហ្វ្រែល៖« ដើម្បីធ្វើការងារបោះឆ្នោត ការងារសិទ្ធិមនុស្ស ការងារជួយសង្គម យុវជនត្រូវចាប់ផ្តើមពីចិត្តដែលយើងស្រឡាញ់ជាមុនសិន។យើងស្រឡាញ់ចាប់ផ្តើមធ្វើទៅ ដើម្បីយល់ពីការងារនោះ។ ស្រឡាញ់ធ្វើវា កុំគិតថា បានលុយអត់! ធ្វើទៅគេរករឿង ធ្វើទៅគេស្អប់ កុំខ្វល់ កុំគិតបែបនេះ បើយើងស្រឡាញ់ធ្វើវាទៅ។ បើគិតថា ធ្វើទៅមិនបានលុយ មិនបានក្លាយជាឯកឧត្តមទេ កុំធ្វើវា បើយើងគិតបែបនេះនោះ។ យើងអាចទៅរកការងារផ្សេង បើចង់បានអំណាច និងក្លាយជាអ្នកមាន។ តែការងារដែលធ្វើនោះ ត្រូវសុចរិត។កាលណាយើងធ្វើមានគោលដៅច្រើនពេក លុយផង ឋានៈ ផង សង្គមផង មិនអាចជោគជ័យនោះទេ។យុវជនជំនាន់ក្រោយ កុំមានក្តីស្រមៃចង់តែធ្វើអ្នកធំ ហើយភ្លេចគិតពីធ្វើការងារមួយដែលតូច តែជាការងារដែលខ្លួនពេញចិត្ត ហើយមានប្រយោជន៍សម្រាប់សង្គម»។
លោក ឈាង វុន តំណាងរាស្ត្រជាន់ខ្ពស់គណបក្សប្រជាជនកម្ពុជា៖ «ប្រជាពលរដ្ឋ ជាពិសេស បញ្ញវន្តក្មេងៗ ដែលជាយុវជន ត្រូវរៀបចំឥរិយាបថរបស់ខ្លួន ឲ្យសមជាពលរដ្ឋល្អ យុវជនល្អ មិនមានស្វែងរកតែសិទ្ធិទេ ត្រូវគិតពីកាតព្វកិច្ចរបស់ខ្លួនក្នុងនាមជាពលរដ្ឋថា ខ្លួនបានធ្វើអ្វីខ្លះសម្រាប់ជាតិ។ ហើយខ្ញុំសូមធានាតែម្តងថា ខ្ញុំនឹងខំប្រឹងប្រែងធ្វើយ៉ាងណា ឲ្យក្លាយជាចន្ទល់មួយរបស់យុវជន ដែលគិតពីអនាគតប្រទេសជាតិពិតប្រាកដ។ ខ្ញុំជាអ្នកនយោបាយ នៅជាមួយយុវជន»៕
Tag:
នយោបាយ
ការងារសង្គម
យុវជន
© រក្សាសិទ្ធិដោយ thmeythmey.com