ជាតិ
នយោបាយជាតិ
លោក កឹម សុខា៖«អ្នកណាថាខ្មែររើសអើងពូជសាសន៍ មិនត្រឹមត្រូវទេ!» រូបពីហ្វេសប៊ុកលោក កឹម សុខា
× លោក កឹម សុខា អនុប្រធានគណបក្សសង្គ្រោះជាតិ បញ្ជាក់ថា ជនជាតិខ្មែរមិនដែលចេះរើសអើងពូជសាសន៍ ឬជនជាតិដទៃទៀតដែលមករស់នៅកម្ពុជានោះទេ ព្រោះប្រជាពលរដ្ឋខ្មែរគឺជាមនុស្សស្លូត រកតែសេចក្ដីសុខប៉ុណ្ណោះ។ អនុប្រធានរូបនេះ បន្ថែមថា បើអ្នកណាដែលនិយាយថា ខ្មែររើសអើងពូជសាសន៍នោះ គឺអ្នកនោះនិយាយខុសហើយ។
បើតាមលោក កឹម សុខា គណបក្សលោកគឺគោរពសិទ្ធិសេរីភាពប្រពៃណី ទំនៀមទំលាប់ សាសនា គ្រប់ជាតិសាសន៍ទាំងអស់។ ហើយគណបក្សលោក ក៏ប្រឆាំងនឹងការរើសអើងពូជសាសន៍នេះដែរ ។ «តែលើកលែងជនជាតិដទៃ ដែលមានមហិច្ឆតានយោបាយ មកដណ្ដើមយកទឹកដីរបស់ខ្មែរប៉ុណ្ណោះ ដែលខ្មែរត្រូវការពារអធិបតេយ្យ និងបូរណភាពទឹកដីរបស់កម្ពុជា»។ នេះជាការអះអាងរបស់លោក កឹម សុខា។
ថ្លែងក្នុងពិធីបុណ្យ «រ៉ូយ៉ាហាជី» ខ្មែរ-ឥស្លាម នៅខេត្តកំពង់ឆ្នាំង នាព្រឹកថ្ងៃព្រហស្បតិ៍ ទី២៤ ខែកញ្ញា ឆ្នាំ២០១៥ អនុប្រធានគណបក្សសង្គ្រោះជាតិរូបនេះ បានអត្ថធិប្បាយយ៉ាងដូច្នេះថា ៖«ជាទូទៅការកត់សម្គាល់របស់ខ្ញុំនៅស្រុកខ្មែរ នៅប្រទេសកម្ពុជានេះ ប្រជាពលរដ្ឋខ្មែរ ជនជាតិខ្មែរនេះ គឺមិនមានការរើសអើងផ្នែក ពូជសាសន៍ សាសនា ដូចប្រទេសដទៃដែលមានវិបត្តិដឹកនាំទេ»។
ប្រធានគណបក្សសង្គ្រោះជាតិ លោក សម រង្ស៊ី និងលោក កឹម សុខា អនុប្រធានគណបក្សសង្គ្រោះជាតិ បានចូលរួមក្នុងពិធីបុណ្យ «រ៉ូយ៉ាហាជី»ជាមួយប្រជាពលរដ្ឋខ្មែរ-ឥស្លាម នៅភូមិកំពង់ត្រឡាច ឃុំកំពង់ត្រឡាច ស្រុកកំពង់ត្រឡាច ខេត្តកំពង់ឆ្នាំង ៕
© រក្សាសិទ្ធិដោយ thmeythmey.com