សភាជាតិជំរុញអោយខេត្តកោះកុងដោះស្រាយបញ្ហាជនបរទេសចូលមកនេសាទខុសច្បាប់

ជាតិ

សភាជាតិជំរុញអោយខេត្តកោះកុងដោះស្រាយបញ្ហាជនបរទេសចូលមកនេសាទខុសច្បាប់

26, Sep 2015 , 10:11 am

រូបភាព

ដោយ: ថ្មីៗ

ភ្នំពេញ៖ បញ្ហាកង្វល់របស់ប្រជាពលរដ្ឋ នៅក្នុងខេត្តកោះកុង មួយចំនួន រួមមានបញ្ហាជន បរទេសចូលមកនេសាទខុសច្បាប់ ក្នុងដែនសមុទ្រកម្ពុជា បញ្ហាទំនិញ គេចពន្ធ បញ្ហាវិវាទដីធ្លី ការបូមខ្សាច់ ត្រូវបាន លោក ហូរ វ៉ាន់ ប្រធានគណៈកម្មការអង្កេត បោសសំអាត និងប្រឆាំងអំពើពុករលួយ នៃរដ្ឋសភា លើកយកមកជជែកជាមួយ ថ្នាក់ដឹកនាំខេត្តកោះកុង និងស្ថាប័នពាក់ព័ន្ធនៅក្នុងខេត្ត កាលពីព្រឹក ថ្ងៃទី២៣ ខែកញ្ញា ឆ្នាំ២០១៥ នៅសាលាខេត្តកោះកុង។ លោក ហូ វ៉ាន់ តំណាងរាស្ត្រមកពីគណបក្សសង្គ្រោះជាតិបានដឹកនាំសមាជិកសមាជិកាគណៈកម្មការ ចុះបំពេញបេសកកម្មនៅក្នុងខេត្តនេះ ដើម្បីពិនិត្យសិក្សាលើវិស័យការងារ ដែលពាក់ព័ន្ធនឹងភារកិច្ចទទួលខុត្រូវរបស់គណៈកម្មការ ។

នៅចំពោះមុខថ្នាក់ដឹកនាំខេត្តដែលមានវត្តមាន លោក ផៃ ធូនផ្លាមកេសន អភិបាលខេត្តស្តីទី ខេត្តកោះកុង, លោក ហូរ វ៉ាន់ បានសំណូមពរដល់ អាជ្ញាធរខេត្តឲ្យជួយដោះស្រាយបញ្ហាខាងលើ ជូនពលរដ្ឋ ពីព្រោះវាជាកង្វល់របស់ពលរដ្ឋ និងបានធ្វើឱ្យប៉ះពាល់ដល់ជីវភាព ប្រចាំថ្ងៃរបស់ពួកគាត់ ប៉ះពាល់ ដល់ប្រាក់ចំណូលជាតិ បរិស្ថាន និងសុខភាពរបស់ពលរដ្ឋផងដែរ។

លោក ផៃ ធូនផ្លាមកេសន បានមានប្រសាសន៍ថា កន្លងមកមានការលួចចូលនេសាទ របស់ជនជាតិថៃ និងវៀតណាមនៅលើដែនសមុទ្រកម្ពុជា ប៉ុន្តែអាជ្ញាធរខេត្ត តែងតែចុះបង្ក្រាបជាប្រចាំ។ លោកអភិបាលខេត្តស្តីទី បានគូសបញ្ជាក់ថា ចំពោះបទល្មើសនេសាទដែលបង្កឡើងដោយជនជាតិថៃ អាជ្ញាធរកម្ពុជាបានជួបប្រជុំជាមួយអាជ្ញាធរថៃ និងបានជំរុញឲ្យមានកិច្ចសហការគ្នា ក្នុងការទប់ស្កាត់កុំឲ្យជនជាតិថៃ ចូលមកនេសាទលើដែនសមុទ្រ កម្ពុជា។ ប្រការនេះភាគីថៃបានយល់ស្រប ព្រមទាំងបានបង្កើតគណៈកម្មការមួយរួមគ្នា រវាងខេត្តជាប់ព្រំដែនប្រទេសទាំងពីរ សម្រាប់ទទួលបន្ទុក ដោះស្រាយបញ្ហានេះ។

លោក ផៃ ធូនផ្លាមកេសន មានប្រសាសន៍បន្ថែមថា ចំណែកបទល្មើសដែលបង្កឡើងដោយជនជាតិវៀតណាមវិញ អាជ្ញាធរកម្ពុជា វៀតណាម ពុំទាន់មានកិច្ចព្រមព្រៀងជាមួយគ្នាទេ ប៉ុន្តែចំពោះវិធានទប់ស្កាត់ គឺអាជ្ញាធរខេត្តកោះកុងបានខិតខំចាត់វិធានការដោយចុះល្បាតជាប្រចាំ ហើយបើមាន ករណីលួចចូលមកនេសាទមែននោះ គឺអាជ្ញាធរខេត្តតែងតែអនុវត្តទៅតាមផ្លូវច្បាប់៕