ជាតិ
សង្គមជាតិ
ក្រុមអ្នកជិះកង់ពីបន្ទាយមានជ័យយកថវិកាសប្បុរសជិត៥០០០ដុល្លារជួយពេទ្យគន្ធបុប្ឆា ក្រុមអ្នកជិះកង់ខេត្តបន្ទាយមានជ័យ និងក្រុមមកពីខាងក្រុងប៉ោយប៉ែត កាលពីចុងសប្តាហ៍កន្លងមក បានយកថវិកាសប្បុរសធម៌ដែលខ្លួនទទួលបានពីសមាជិកដើម្បីយកទៅបរិច្ចាគដល់មន្ទីរពេទ្យគន្ធបុប្ឆាខេត្តសៀមរាប។ ថវិកាដែលក្រុមការងារជិះកង់សប្បុរសធម៌នេះ ទទួលបានមានជិត៥០០០ដុល្លារអាមេរិក។
«ខ្ញុំពិតជារីករាយខ្លាំងណាស់ដែលពួកយើងអាចប្រមូលផ្តុំគ្នា ហើយអាចរកថវិកាសប្បុរសសម្រាប់មន្ទីរពេទ្យគន្ធបុប្ឆា»។ នេះជាការលើកឡើងរបស់កញ្ញា អេង លីហ្សា លេខាធិការនៃក្រុមអ្នកជិះកង់ខេត្តបន្ទាយមានជ័យ។
យុវតីស្រស់ស្អាតដែលបម្រើការនៅក្រុមហ៊ុនមួយនៅក្នុងខេត្តបន្ទាយមានជ័យ រូបនេះ បានបន្ថែមថា សកម្មភាពជិះកង់នៅបន្ទាយមានជ័យ បានលេចចេញជារូបរាងយូរណាស់មកហើយ តែនេះជាការប្រមូលផ្តុំដើម្បីស្វែងរកថវិកាសប្បុរសធម៌ជាលើកដំបូង។
កញ្ញា អេង លីហ្សា បានរៀបរាប់ថា៖ «បច្ចុប្បន្ន ក្រុមខាងខេត្តបន្ទាយមានជ័យមានសមាជិកសកម្ម៤៣នាក់ ដែលយើងតែងតែនាំគ្នាជិះកំសាន្តលេង និងហាត់ប្រាណនៅក្នុងខេត្ត។ យើងនឹងទទួលបានសមាជិកថ្មីបន្ថែមទៀត ពីព្រោះពួកគេបានចាប់អារម្មណ៍សកម្មភាពរបស់យើង»។
ការបែកគំនិតចេញជាសកម្មភាពសប្បុរសធម៌របស់ក្រុមអ្នកជិះកង់ខេត្តបន្ទាយមានជ័យ និងក្រុមមួយទៀតមកពីក្រុងប៉ោយប៉ែត គឺដោយសារមានក្លឹបអ្នកជិះកង់ដើម្បីសហគមន៍ (CCC) ប្រចាំខេត្តសៀមរាបជាគំរូ។
ទាក់ទងនឹងករណីនេះ កញ្ញា លីហ្សា បានបញ្ជាក់ថា៖ «ពួកយើងមានការកោតសរសើរយ៉ាងខ្លាំងចំពោះសកម្មភាពរបស់ក្លឹប CCC នៅសៀមរាប។ ពួកគាត់មានសកម្មភាពសប្បុរសធម៌ជាច្រើននៅតាមសហគមន៍ ដូច្នេះក្រុមការងារជិះកង់នៅខេត្តបន្ទាយមានជ័យនឹងរិះរកមធ្យោបាយដើម្បីពង្រីកសកម្មភាពសប្បុរសធម៌របស់ខ្លួនបន្ថែមទៀតនាពេលអនាគត»។
លោក គឹម ប៊ុនថាន់ អ្នកដឹកនាំក្លិប CCC នៅខេត្តសៀមរាប សម្តែងនូវការរីករាយដោយបានចូលរួមចែករំលែកបទពិសោធន៍ជាមួយក្រុមដែលមកពីខេត្តជិតខាង។ លោកបានលើកឡើងយ៉ាងដូច្នេះថា៖ «នេះជាជោគជ័យមួយរបស់យើងដែលបងប្អូននៅតាមបណ្តាខេត្តប្រើការជិះកង់ដើម្បីសកម្មភាពសប្បុរសធម៌ ហើយក្រុម CCC របស់យើងត្រៀមខ្លួនជាមួយក្នុងកិច្ចសហការណាមួយ»៕
© រក្សាសិទ្ធិដោយ thmeythmey.com