ខេមរៈសហព័ន្ធការ៉ាតេដូ ត្រូវពង្រឹងធនធានបន្ថែមដើម្បីត្រៀមខ្លួនប្រកួត

កីឡាជាតិ

ខេមរៈសហព័ន្ធការ៉ាតេដូ ត្រូវពង្រឹងធនធានបន្ថែមដើម្បីត្រៀមខ្លួនប្រកួត

29, Sep 2015 , 4:03 pm

រូបភាព

ដោយ:

ខណៈការប្រកួតការ៉ាតេដូថ្នាក់ជាតិឆ្នាំនេះមានការធ្លាក់ចុះទាំងចំនួនក្លិប-សមាគមចូលរួម កីឡាករ និងកីឡាការិនី មន្ត្រីជំនាញមកពីអគ្គនាយកដ្ឋានកីឡា បានប្រាប់ឲ្យខាងថ្នាក់ដឹកនាំខេមរៈសហព័ន្ធកីឡាការ៉ាតេដូ ត្រូវពង្រឹង និងបណ្តុះបណ្តាលធនធានមនុស្ស ដោយផ្តោតទៅលើជំនាញរបស់ខ្លួនបន្ថែមទៀត ដើម្បីធ្វើឲ្យប្រភេទកីឡានេះកាន់តែមានសក្តានុពល សម្រាប់ការប្រកួតនៅពេលខាងមុខ។

«ដើម្បីត្រៀមការប្រកួត National Games 2016 និងការប្រកួតកីឡាស៊ីហ្គេម លើកទី៣២ ឆ្នាំ២០២៣ ដែលកម្ពុជាត្រូវធ្វើជាម្ចាស់ផ្ទះ ខេមរៈសហព័ន្ធកីឡាការ៉ាតេដូ គប្បីធ្វើការបណ្តុះបណ្តាលអាជ្ញាកណ្តាល ចៅក្រម និងមន្ត្រីបច្ចេកទេសបន្ថែមឲ្យបានច្រើន ។ ជាងនេះទៅទៀតសហព័ន្ធ ត្រូវបណ្តុះថ្នាលជំនាន់ក្រោយឲ្យបានច្រើន សម្រាប់ត្រៀម ព្រោះការ៉ាតេដូ ត្រូវបានចាត់ទុកជាប្រភេទកីឡាមានសក្តានុពលមួយ ដើម្បីប្រជែងយកមេដាយជូនជាតិ» នេះជាការលើកឡើងរបស់ លោក ព្រំ ប៊ុណ្ណយី អគ្គនាយករងនៃអគ្គនាយកដ្ឋាន នៅក្នុងពិធីបិទការប្រកួតកីឡាការ៉ាតេដូជ្រើសរើសជើងឯកថ្នាក់ជាតិ ប្រចាំឆ្នាំ២០១៥ នៅវិមានពហុកីឡដ្ឋានជាតិ កាលពីល្ងាចថ្ងៃអាទិត្យ ទី២៧ ខែកញ្ញា។

គួរបញ្ជាក់ថា ការប្រកួតកីឡាការ៉ាតេដូ ជ្រើសរើសជើងឯកថ្នាក់ជាតិ ឆ្នាំ២០១៥ នេះ មានក្លិប-សមាគមត្រឹម៧ប៉ុណ្ណោះ តិចជាងឆ្នាំ២០១៤ ដែលមាន១១ក្លិប រីឯអត្តពលិកចូលរួមវិញមានចំនួនត្រឹម៨៤នាក់ ក្នុងនោះមានស្រីចំនួន២៣នាក់ ដោយអ្នកទាំងនេះត្រូវធ្វើការប្រកួតប្រជែងគ្នា នៅលើប្រភេទវិញ្ញាសាទាំងក្របខ័ណ្ឌក១ និងក២ មានវិញ្ញាសាប្រយុទ្ធចំនួន១២ និងសម្តែងកាតាចំនួន៨ ៕