ជាតិ
សង្គមជាតិ
លោក សយ សុភាព វិលចូលធ្វើជាអ្នកអត្ថាធិប្បាយព័ត៌មាននៅប៉ុស្តិ៍បាយ័នឡើងវិញ
×
ភ្នំពេញ៖ លោក សយ សុភាព អគ្គនាយកមជ្ឈមណ្ឌលព័ត៌មានដើមអំពិលដែលបានឃ្លាតឆ្ងាយចេញពីកញ្ចក់ទូរទស្សន៍អស់រយៈពេលជាច្រើនខែមកហើយនោះ ត្រូវបានគេអនុញ្ញាតអោយចូលខ្លួនមកធ្វើអត្ថាធិប្បាយព័ត៌មានជាថ្មីឡើងវិញនៅលើកញ្ចក់ទូរទស្សន៍បាយ័នព័ត៌មានចាប់ពីដើមខែតុលាឆ្នាំ២០១៥ខាងមុខនេះ។
ដោយមិនភ្លេចថ្លែងអំណរគុណអគ្គនាយិកានៃទូរទស្សន៍បាយ័នព័ត៌មាន លោក សយ សុភាពអគ្គនាយកមជ្ឈមណ្ឌលព័ត៌មានដើមអំពិល សម្តែងសេចក្តីរីករាយយ៉ាងខ្លាំងនៅពេលដែលស្ថានីយ៍ទូរទស្សន៍បាយ័នព័ត៌មានអនុញ្ញាតអោយរូបលោកមានឱកាសឡើងផ្សាយព័ត៌មានជាថ្មីឡើងវិញនៅលើកញ្ចក់ទូរទស្សន៍។ «ខ្ញុំនឹងបន្តអាជីពរបស់តទៅទៀតដោយឈរលើជំហរផ្តល់ព័ត៌មានគ្រប់រសជាតិ។ ខ្ញុំនឹងផ្សាយព័ត៌មានទាំងអស់»។ នេះគឺជាការបញ្ជាក់របស់លោក សយ សុភាព អ្នកកាសែតដែលមានសមានចិត្តជាមួយគណបក្សប្រជាជនកម្ពុជាច្រើនជាងជាមួយគណបក្សប្រឆាំង។ តើលោកនឹងផ្សព្វផ្សាយព័ត៌មានសកម្មភាពបក្សប្រឆាំងដែរឬទេ?
លោក សយ សុភាព ឆ្លើយប្រាប់តាមទូរសព្ទមកវិញថា លោកនឹងផ្សាយឲ្យគ្រប់ជ្រុងជ្រោយ។ លោក សយ សុភាព នឹងចូលខ្លួនទៅកាន់កម្មវិធីដំណឹងពេលព្រឹកចាប់ពីថ្ងៃទី៥ខែតុលាពីម៉ោង៦និង១០នាទីដល់ម៉ោង៧ព្រឹក។ កម្មវិធីនេះមានរយៈពេល៥ថ្ងៃក្នុងមួយសប្តាហ៍ ពោល គឺពីថ្ងៃចន្ទដល់ថ្ងៃសុក្រ។ លោក សយ សុភាព ដែលជាបុគ្គលត្រូវបានមហាជនស្គាល់ច្រើននោះ នឹងបង្ហាញមុខនៅលើកញ្ចក់ទូរទស្សន៍បាយ័យព័ត៌មានដើម្បីប្រជែងប្រជាប្រិយភាពជាមួយលោក មាស រិទ្ធី និពន្ធនាយកព័ត៌មានទូរទស្សន៍ហង្សមាស។ នាទីព័ត៌មានពេលព្រឹករបស់លោក មាស រិទ្ធី កំពុងទទួលបានការគាំទ្រយ៉ាងខ្លាំងពីសំណាក់មហាជនទូទាំងប្រទេស។
ក្រៅពីលោក មាស រិទ្ធី, លោក សយ សុភាព ត្រូវប្រកួតប្រជែងជាមួយអ្នកសារព័ត៌មាននៃទូរទស្សន៍ CNC, CTN និងជាមួយលោក ប៉ែន បូណា និពន្ធនាយកព័ត៌មានទូរទស្សន៍ PNN៕
© រក្សាសិទ្ធិដោយ thmeythmey.com