កីឡាជាតិ
×![]()
អ្នកចូលរួមការប្រណាំងកង់ជ្រើសរើសជើងឯកថ្នាក់ជាតិ ប្រចាំឆ្នាំ២០១៥ មានការកើនឡើង ២២២នាក់ ដោយឆ្នាំនេះមានអ្នកចូលរួមប្រណាំង ៥៧៤នាក់ បើធៀបទៅនឹងឆ្នាំមុនមានអ្នកចូលរួមត្រឹមតែ ៣៥២នាក់ប៉ុណ្ណោះ។ 
លោក ទុយ ប៊ុនហឿន ប្រធានការិយាល័យកីឡាទំនើប ពន្យល់ពីមូលហេតុដែលធ្វើឲ្យមានការកើនឡើងនោះថា ៖«ការកើនឡើងនេះដោយសារខាងសហព័ន្ធបានធ្វើសកម្មភាពបំផុសព័ត៌មានឱ្យប្រជាពលរដ្ឋយល់ដឹងច្រើន និងដោយសារប្រជាពលរដ្ឋមានការព្រួយបារម្ភ និងយល់ដឹងច្រើនពីបញ្ហាសុខភាពនាពេលបច្ចុប្បន្ន»។
ប្រធានការិយាល័យកីឡារូបនេះបានឲ្យដឹងទៀតថា អ្នកចូលរួមប្រណាំងកង់ឆ្នាំនេះភាគច្រើនមកពីសមាជិកសហព័ន្ធ និងអ្នកដែលជិះកង់ ដើម្បីសុខភាព និងអ្នកចូលចិត្តប្រើកង់ ដើម្បីហាត់ប្រាណ។
ការប្រណាំងកង់ជ្រើសរើសជើងឯកថ្នាក់ជាតិ ប្រចាំឆ្នាំ ២០១៥ នឹងរៀបចំឡើងនៅខេត្តកំពត ចាប់ពីថ្ងៃទី១ រហូតដល់ថ្ងៃទី៤ ខែតុលា ឆ្នាំ២០១៥ នាចុងសប្តាហ៍នេះ ការប្រណាំងចែកជា២ប្រភេទ គឺប្រភេទកង់ដៃត្រង់ និង កង់គួក។ ប្រភេទកង់គួក មានកីឡាករចូលរួមចំនួន១០៨នាក់ហើយ ហើយពួកគេនឹងត្រូវប្រណាំងលើចម្ងាយផ្លូវ១២០គីឡូម៉ែត្រ ដោយចេញដំណើរពីចំណុចគីឡូម៉ែត្រលេខ២៥នៃផ្លូវជាតិលេខ៣ និងបញ្ចប់នៅចំណុចរង្វង់មូលខេត្តកំពត។ រីឯប្រភេទកង់ដៃត្រង់វិញ ត្រូវប្រណាំងតែលើចម្ងាយផ្លូវ៤០គីឡូម៉ែត្រប៉ុណ្ណោះ ដោយចេញដំណើរត្រង់ចំណុចមុខផ្សារចាស់ខេត្តកំពត និងបញ្ចប់នៅត្រឹមរង្វង់មូលទីរួមខេត្តកំពត។
ចំពោះប្រាក់រង្វាន់វិញ គឺម្ចាស់ជើងឯកទទួលបានប្រាក់១៥ម៉ឺនរៀល អមដោយមេដាយមាស និងពាន ឯជើងឯករងទទួលបានប្រាក់១០ម៉ឺនរៀល អមដោយមេដាយប្រាក់ ហើយលេខ៣បាន៨ម៉ឺនរៀល និងមេដាយសំរឹទ្ធ។ ចំណែកចំណាត់ថ្នាក់លេខ៤ ដល់លេខ៨ក៏មានការផ្តល់ទឹកប្រាក់ក្នុងម្នាក់ៗចំនួន៤ម៉ឺនរៀល ដើម្បីជាការលើកទឹកចិត្តផងដែរ ហើយក្រៅពីប្រាក់រង្វាន់ទាំងនេះក៏មានការឧបត្ថម្ភផ្សេងៗទៀតផងដែរ៕
Tag:
ប្រណាំងកង់
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 4 ថ្ងៃ
