កីឡាជាតិ
World Cup៖ កីឡាករ២៥រូបស្ថិតក្នុងបញ្ជីសម្រាប់ការប្រកួតនៅទឹកដីសឹង្ហបុរី
× សហព័ន្ធកីឡាបាល់ទាត់កម្ពុជា បានចេញបញ្ជីឈ្មោះកីឡាករបាល់ទាត់ជម្រើសជាតិកម្ពុជាចំនួន២៥រូបដែលត្រូវចូលរួមប្រកួតជម្រុះជើងទីពីរក្នុងពូល E នៃពានរង្វាន់កីឡាបាល់ទាត់ពិភពលោក ជាមួយក្រុមជម្រើសជាតិសឹង្ហបុរី នៅកីឡដ្ឋាន National Stadium ប្រទេសសឹង្ហបុរី នាល្ងាចថ្ងៃទី១៣ ខែតុលា ឆ្នាំ២០១៥ ខាងមុខនេះ។
ក្នុងចំណោមកីឡាករទាំង២៥រូប មានសមាសភាពមកពីស្វាយរៀង៧រូប (ប៉េង ប៊ុនឆាយ, ប្រាក់ មុន្នីឧត្តម, សឿយ វិសាល, នេន សុធារ័ត្ន, ណុប តុលា, សំអឿន ពិដោរ និងហូយ ផល្លីន) បឹងកេតអង្គរ៦រូប (ឃួន ឡាបូរ៉ាវី, ចាន់ វឌ្ឍនាកា, សុខ សុវណ្ណ, រស់ សំអឿន, ស៊ូ យ៉ាទី និងហុង ផេង) ក្រសួងការពារជាតិ៤រូប (ឈិន ឈឿន, រឿម ចាន់រឿន, ច្រឹង ពលរដ្ឋ និងអ៊ុំ សេរីរ័ត្ន) ភ្នំពេញក្រោន៣រូប (ប៊ិន ចន្ថាធារី, សុះ ស៊ូហាណា និងកែវ សុខផេង) ណាហ្គាវើល៣រូប (គួច សុគម្ភៈ, ប្រាក់ ចាន់រតនា និង ញឹម សុវណ្ណារ៉ា) និងអគ្គស្នងការដ្ឋាននគរបាលជាតិ២រូប (សាយ ពិសិដ្ឋ និងទិត ឌីណា) ។
ក្រៅពីកីឡាករ មន្ត្រី៩នាក់ផ្សេងទៀត នឹងត្រូវធ្វើដំណើរជាមួយក្រុមទៅកាន់ប្រទេសសឹង្ហបុរី។ អនុប្រធានសហព័ន្ធកីឡាបាល់ទាត់កម្ពុជា លោក ខៀវ សាម៉េត ទទួលបន្ទុកជាប្រធានប្រតិភូ លោក ឆាំង ពិសិដ្ឋ ជាអ្នកចាត់ការទូទៅ។ ក្រុមការងារគ្រូបង្វឹកដែលត្រូវជួយដល់ការងារគ្រូបង្វឹកកូរ៉េខាងត្បូង លោក Lee Tae Hoon រួមមាន លោក អ៊ុង កនយ៉ានិត លោក ហោ សុខហេង និងលោក អ៊ុំ សាវង្ស ជាជំនួយការ លោក អ៊ិន សុខា ជាគ្រូចាំទី រីឯគ្រូពេទ្យ មានលោក ហៃ ស័គ្គរី និងលោក ខាត់ ចាន់ហាក់។
ក្រុមកីឡាបាល់ទាត់ជម្រើសជាតិកម្ពុជា មិនទាន់មានពិន្ទុ និងគ្រាប់បាល់រាប់នោះឡើយ ក្រោយឆ្លងកាត់ការប្រកួត៤លើកកន្លងមក។ កម្ពុជាបានចាញ់សឹង្ហបុរី ៤-០ ចាញ់អាហ្វហ្គានីស្ថាន ១-០ និងចាញ់ស៊ីរី ៦-០ នៅក្នុងទឹកដីខ្លួនឯង ហើយចាញ់ជប៉ុន ៣-០ នៅកីឡដ្ឋាន Saitama Stadium របស់ជប៉ុន៕
Tag:
World Cup
ជម្រើសជាតិកម្ពុជា
© រក្សាសិទ្ធិដោយ thmeythmey.com