លោក ស ខេង ព្រមានជាថ្មីដល់មន្ត្រីនគរបាលជាតិ ជុំវិញការប្រើប្រាស់យានយន្ត

ជាតិ

សង្គមជាតិ

លោក ស ខេង ព្រមានជាថ្មីដល់មន្ត្រីនគរបាលជាតិ ជុំវិញការប្រើប្រាស់យានយន្ត

30, Sep 2015 , 9:59 pm

រូបភាព

ដោយ: ខន ចំប៉ា

ក្រសួងមហាផ្ទៃ បានចេញសេចក្តីណែនាំ ជាថ្មីម្តងទៀតស្តីពីការគ្រប់គ្រងយានយន្តនគរបាលជាតិ។ សេចក្តីណែនាំនេះ ធ្វើឡើងបន្ទាប់ពីមើលឃើញថា នៅមានមន្ត្រីនគរបាលជាតិមួយចំនួនតូចបានប្រើប្រាស់យានយន្តនគរបាលជាតិខុសគោលដៅ ដោយបានអនុញាតឲ្យជនមិនមែននគរបាលប្រើប្រាស់យានយន្តរបស់ខ្លួន ឬប្រើយានយន្តធ្វើអាជីវកម្មបំរើផលប្រយោជន៍ឯកជន និងយកទៅប្រើប្រាស់ក្នុងសកម្មភាពមួយចំនួនទៀតដែលប៉ះពាល់ដល់កិត្តិយស សេចក្តីថ្លៃថ្នូរ និងកិត្យានុភាពរបស់កងកម្លាំងនគរបាលជាតិ។

បើទោះបីជាកន្លងមក មន្ត្រីនគរបាលបានយកចិត្តទុកដាក់ក្នុងការអនុវត្តច្បាប់ និងបំពេញភារកិច្ចបានយ៉ាងខ្ជាប់ខ្ជួន ក្នុងការប្រើប្រាស់យានយន្តនគរបាលជាតិក៏ដោយ ក៏នៅតែមានមន្ត្រីនគរបាលជាតិមួយចំនួនតូច នៅតែប្រើប្រាស់យានយន្តនគរបាលជាតិខុសច្បាប់ ឬយកប្រើប្រាស់ដើម្បីបំរើប្រយោជន៍ឯកជន។

សេចក្តីជូនដំណឹងដែលចុះហត្ថលេខាដោយ លោក ស ខេង រដ្ឋមន្ត្រីក្រសួងមហាផ្ទៃ បានសរសេរថា៖«នៅមានមន្ត្រីនគរបាលជាតិមួយចំនួនតូចបានប្រើប្រាស់យានយន្តនគរបាលជាតិ ប្រព្រឹត្តិអំពើល្មើសច្បាប់ស្តីពីច្បាប់ចរាចរណ៍ផ្លូវគោក ឬច្បាប់ផ្សេងៗទៀត រួមទាំងការអនុញាតឲ្យបុគ្គលដែលមិនមែននគរបាលប្រើប្រាស់យានយន្តនគរបាលជាតិ ឬប្រើប្រាស់ធ្វើអាជីវកម្មបំរើផលប្រយោជន៍ឯកជនជាអាទិ៍ ដែលបានប៉ះពាល់ដល់កិត្តិយស សេចក្តីថ្លៃថ្នូរ និងកិត្យានុភាពរបស់កងកម្លាំងនគរបាលជាតិ»។

ដូច្នេះ ដើម្បីធានាអនុវត្តន៍ស្របតាមគោលការណ៍ច្បាប់ និងលុបបំបាត់ភាពអសកម្មក្នុងការប្រើប្រាស់យានយន្តនគរបាលជាតិ លោក ស ខេង បានចេញការណែនាំមួយចំនួនដូចជា ម្ចាស់យានយន្តគ្រប់ប្រភេទដែលប្រើប្រាស់ស្លាកលេខនគរបាលជាតិ ត្រូវបំពេញកាតព្វកិច្ចក្នុងការបង់ពន្ធនាំចូល និងបង់ពន្ធផ្លូវ តាមការកំណត់របស់ក្រសួងសេដ្ឋកិច្ច និងហិរញ្ញវត្ថុ។

លោក ស ខេង ក៏បានបញ្ជាឲ្យអគ្គស្នងការនគរបាលជាតិ ត្រូវត្រួតពិនិត្យនៅតាមបណ្តាអង្គភាព ឬតាមដងផ្លូវ ដើម្បីឃាត់យានយន្ត ឬដកហូតបណ្ណសម្គាល់ ស្លាកលេខ និងព្រមានដល់ម្ចាស់យានយន្តនគរបាលជាតិណា ដែលអនុញាតឲ្យជនមិនមែននគរបាលប្រើប្រាស់ ឬប្រើប្រាស់យានយន្តធ្វើអាជីវកម្មបំរើផលប្រយោជន៍ឯកជន។ ជាមួយគ្នានោះ ត្រូវឃាត់យានយន្ត និងម្ចាស់ ឬអ្នកបើកបរ ដើម្បីអនុវត្តន៍តាមនីតិវិធីច្បាប់ ចំពោះម្ចាស់យានយន្តណាដែលប្រើប្រាស់បណ្ណសម្គាល់ខ្លួន និងស្លាកលេខយានយន្តនគរបាលជាតិមិនត្រឹមត្រូវ ឬក្លែងក្លាយ។

សូមបញ្ជាក់ថាកាលពីថ្ងៃទី១៣កុម្ភៈ ឆ្នាំ២០១៥កន្លងទៅ លោក អ៊ុំ សំអាន តំណាងរាស្ត្ររបស់គណបក្សសង្គ្រោះជាតិ ក៏បានបានសរសេរលិខិតមួយទៅកាន់អគ្គនាយកដ្ឋានពន្ធដារដែរ ជុំវិញបញ្ហានេះ ដោយស្នើឲ្យស្ថាប័នមួយនេះ បន្តឃាត់យានយន្តដែលពាក់ស្លាកលេខខេមរភូមិន្ទ(ខ.ម) នគរបាល(ន.ប) និងរដ្ឋ ដើម្បីពិនិត្យប្រមូលពន្ធចូលថវិកាជាតិ។

លិខិតរបស់តំណាងរាស្ត្រមណ្ឌលសៀមរាបរូបនេះ បានសរសរថា រថយន្តដែលពាក់ស្លាកលេខខេមរភូមិន្ទ នគរបាល និងរដ្ឋមានចំនួនច្រើន ហើយភាគច្រើនជាកម្មសិទ្ធិឯកជន មិនមែនជារបស់រដ្ឋ ឬអង្គភាពណាមួយឡើយ។ លិខិតដដែលបន្តថា រថយន្តទំនើបៗពាក់ស្លាកលេខ ខេមរភូមិន្ទ នគរបាល និងរដ្ឋ មួយចំនួនគេចវេស មិនបង់ពន្ធនាំចូល មិនបង់ពន្ធលើមធ្យោបាយដឹកជញ្ជូន ដែលនាំឲ្យរដ្ឋខាតថវិកាអស់ជាច្រើនក្នុងមួយឆ្នាំ។

បើតាមលិខិតដដែល រថយន្តពាក់ស្លាកលេខខេមរភូមិន្ទ និងនគរបាលខ្លះ ត្រូវបានគេយកទៅប្រើជាមធ្យោបាយប្រព្រឹត្តបទល្មើស ដូចជាដឹកឈើប្រណិតខុសច្បាប់ជាដើម និងខ្លះទៀតមិនគោរពច្បាប់ចរាចរណ៍ បង្កគ្រោះថ្នាក់ដល់អ្នកដទៃ ហើយប្រើអំណាចលើជនរងគ្រោះថែមទៀតផង៕