ពីនេះ ពីនោះ
ជីវិតជោគជ័យមានន័យបែបណា?
× ភ្នំពេញ៖ មនុស្សគ្រប់រូបតែងតែសូត្រពាក្យមួយឃ្លាថា «ខ្ញុំចង់បានជីវិតជោគជ័យ» ជាប្រចាំដែលគេតែងគិតថានៅពេលដែលជីវិតរបស់គេជោគជ័យ នោះនាំឲ្យជីវិតរបស់គេមានន័យ។ តើជីវិតជោគជ័យពិតប្រាកដមានន័យបែបណា?
ជាការពិតណាស់ មនុស្សម្នាក់មានគំនិតមួយ មនុស្សម្នាក់មានបំណងមានទិសដៅ និងគោលដៅជីវិតសម្រាប់ខ្លួនឯង។ បំណងប្រាថ្នា ទិសដៅជីវិត គោលដៅជីវិត គឺសុទ្ធតែមានលក្ខណៈផ្សេងៗគ្នាទាំងអស់ដែលមិនខុសអីពីពាក្យថា « មនុស្សដប់នាក់មានគំនិតដប់» នោះទេ។ នៅពេលនិយាយពីពាក្យថា«ជីវិតជោគជ័យ» នេះផងនោះ វារឹតតែមានភាពខុសប្លែកពីគ្នាស្ទើតែទាំងស្រុង។
មនុស្សមួយចំនួនយល់ថាភាពជោគជ័យក្នុងជីវិតរបស់គេ គឺនៅពេលគេមានការងារធ្វើបានប្រាក់ខែខ្ពស់ ពេលនោះហើយដែលគេចាត់ទុថាជីវិតរបស់គេទទួលបានជោគជ័យ។ មនុស្សខ្លះទៀតតែស្រមៃថា នៅពេលដែលខ្លួនមានលុយ មានទ្រព្យសម្បត្តិច្រើន ពេលនោះហើយដែលជីវិតរបស់គេទទួលបានជោគជ័យ។ រីឯជនខ្លះគិតថា លុយ ឡាន វីឡា ជាកត្តាកំណត់ថាជាពេលវេលាមួយដែលជីវិតរបស់គេមានអ្វីគ្រប់យ៉ាងនោះហើយជាជីវិតជោគជ័យរបស់ខ្លួន។ ចំណែកបុគ្គលមួយចំនួនផ្សេងទៀតគិតថា អ្វីៗមិនសំខាន់ តែសំខាន់គឺសុភមង្គលគ្រួសារ កាលណាគេរស់នៅមានសុភមង្គលនៅក្នុងគ្រួសារហើយពេលនោះហើយដែលជីវិតរបស់គេទទួលបានភាពជោគជ័យ។ តែមានមនុស្សមួយចំនួនទៀតគិតថា មួយជីវិតរបស់គេគឺត្រូវរៀនសូត្រឲ្យបានខ្ពង់ខ្ពស់ នៅពេលដែលខ្លួនបានសម្រេចបំណងនេះហើយពេលនោះហើយដែលជីវិតរបស់គេជោគជ័យ។
ព្រោះតែកត្តាទាំងនេះហើយ ដែលបណ្ដាលឲ្យយើងសម្លឹងឃើញថាមនុស្សបានធ្វើសកម្មភាពក្នុងសង្គមគ្រប់បែបយ៉ាងដើម្បីរកឲ្យឃើញភាពជោគជ័យក្នុងជីវិតរបស់ខ្លួន។ អ្នកទាំងនោះ ព្យាយាមរៀនសូត្រ ធ្វើការងារ កសាងទំនាក់ទំនងជាមួយមនុស្សទូទៅនៅក្នុងសង្គម ដើម្បីឆ្ពោះទៅរកអ្វីដែលគេចង់បាន។ ក៏ប៉ុន្តែពួកគេហាក់ដូចជាមិនបានរីករាយជាមួយអ្វីដែលទទួលបានពីអ្វីដែលខ្លួនខិតខំប្រឹងប្រែងទៅវិញ។ ទាំងនេះសរបង្ហាញឲ្យឃើញថា អ្វីដែលពួកគេចង់បាននោះមិនមែនជាជោគជ័យពិតនៃជីវិតរបស់ពួកគេទេ។ វាគ្រាន់តែជាផ្នែកមួយនៃក្ដីបំណងដែលគេចង់បាននៅក្នុងឆាកជីវិតរបស់គេតែប៉ុណ្ណោះ។ លុយ ឡាន វិឡា មុខនាទី និងអ្វីដែលគេចង់បាននោះវាគឺជាវត្ថុវិស័យភាពមួយដែល ក្នុងបំណងរបស់ពួកគេគិតទៅដល់ និងចង់បានដើម្បីមកបំពេញតម្រូវការជីវិតរបស់ខ្លួន។ តែវាក៏មិនមែនជាភាពជោគជ័យពេញលេញនោះដែរ។
ជារួមគេអាចទាញចេញជាសេចក្ដីសន្និដ្ឋានមួយបាន ភាពមានបានលើសលប់នូវអ្វីទាំងអស់ខាងលើនេះមិនអាចនិយាយបានថាធ្វើឲ្យជីវិតជោគជ័យបានទេ។ តែជីវិតជោគជ័យ គឺជាជីវិតមួយដែលមានទ្រព្យសម្បត្តិមធ្យមអាចផ្គត់ផ្គងជីវភាពបានគ្រប់គ្រាន់ មានចំណេះដឹង ចេះគិតបានវែងឆ្ងាយទោះបីមិនមែនជាចំណេះដឹងផុតលេខក៏ដោយ រស់នៅក្នុងក្របខណ្ឌកិត្តិយស កសាងបានជីវិតគ្រួសារមួយដែលពោរពេញដោយសុភមង្គល និងការរកអ្វីផ្សេងៗមកបំពេញតម្រូវការដែលខ្លួនចង់បាន។ ហើយរាល់អ្វីដែលទទួលបានទាំងនោះគឺសុទ្ធតែទទួលបានតាមរយៈមាគ៌ាសុចរិត ទៀងត្រង់ ត្រឹមត្រូវ និងសេចក្ដីថ្លៃថ្នូរ៕
© រក្សាសិទ្ធិដោយ thmeythmey.com