ពីនេះ ពីនោះ
ចំណុច៥ប្រការដែលកូនប្រុសស្រីត្រូវគិតដើម្បីសេចក្ដីសុខឪពុកម្ដាយ
× ព្រះរស់គឺជាឈ្មោះឪពុកម្ដាយ ដែលមនុស្សទូទៅបានដឹង បានឮតាមរយៈបទចម្រៀង គម្ពី ឯកសារ និងការផ្ដល់ទេសនាពីព្រះសង្ឃជាដើម។ ហើយនៅក្នុងទ្រឹស្ដីព្រះពុទ្ធសាសនា គឺតែងតែប្រៀនប្រដៅឲ្យកូនប្រុសស្រីទាំងឡាយ ត្រូវសងគុណលោកទាំងទ្វេ ដើម្បីជាការតបស្នង ចំពោះការលះបង់របស់លោកក្នុងការចិញ្ចឹមបីបាច់ថែរក្សាបុត្រធីតាទាំងឡាយតាំងពីតូចក្រូចឆ្មាមកនោះ។ មានកូនមួយចំនួនបានសង់គុណលោកតាមរយៈការផ្ដល់ជាទ្រព្យសម្បត្តិ ថវិការ និងការមើលថែជាដើម។ តែពេលខ្លះការធ្វើបែបនេះគឺមិនអាចផ្ដល់សេចក្ដីសុខផ្លូវចិត្តជូនលោកទាំងពីរបានទាំងស្រុងនោះទេ។
ខាងក្រោមនេះជាកត្ដាមួយចំនួនដែលកូនប្រុសស្រីត្រូវគិតពីសេចក្ដីសុខពិតរបស់លោកឪពុកអ្នកម្ដាយ៖
១/. សេចក្ដីសុខទី១ គឺចង់ឃើញកូនប្រុសស្រីរបស់លោកមានសុខភាពល្អ៖ អារម្មណ៍របស់លោកឪពុកអ្នកម្ដាយ គឺនៅជាប់ជាមួយកូនៗជានិច្ច នៅពេលឮ ឬដឹងថាកូនៗរបស់លោកមានជំងឺ ក្នុងចិត្តរបស់លោកគឺមានការព្រួយបារម្ភខ្លាំងជាងនៅពេលខ្លួនរបស់លោកឈឺទៅទៀត។
២/. សេចក្ដីសុខទី២ គឺចង់ឃើញកូនៗចេះស្រឡាញ់បងប្អូន និងរស់នៅយ៉ាងសុខសាន្តជាមួយបងប្អូន៖ គ្មានឪពុកម្ដាយឯណាចង់ឃើញកូនៗទាំងឡាយរបស់លោកឈ្លោះប្រកែក ទាស់ទែងគ្នានោះទេ។ ព្រោះសេចក្ដីស្រឡាញ់របស់លោកចំពោះកូនៗមានស្មើៗគ្នា គ្មានអ្នកណាលើសអ្នកណាឡើយ។
៣/. សេចក្ដីសុខទី៣ គឺចង់ឃើញកូនៗទាំងឡាយរបស់លោករៀនសូត្របានខ្ពង់ខ្ពស់ មានចំណេះដឹងជ្រៅជ្រះ៖ ពេលឃើញកូនៗមានចំណេះដឹង សួរថាឪពុកម្ដាយឯណាដែលមិនសប្បាយចិត្ត មិនរីករាយ មិនមានភាពមោទនភាពចំពោះការតស៊ូ និងការខិតខំប្រឹងប្រែងរបស់កូន។
៤/. សេចក្ដីសុខទី៤ គឺចង់ឃើញកូនៗមានការងារល្អនៅក្នុងសង្គម មានតួនាទីល្អនៅក្នុងសង្គម មានការងារដែលមានកិត្តិយសចំពោះកូនៗខ្លួនឯង គ្រួសារនិងសង្គមជាតិ។
៥/. សេចក្ដីសុខទី៥ គឺចង់ឃើញកូនៗមានទំនាក់ទំនងល្អជាមួយមនុស្សនៅក្នុងសង្គម មានកេរ្តិ៍ឈ្មោះល្អនៅក្នុងសង្គម មិនបង្ករឲ្យមានបញ្ហាដល់សង្គមដែលនាំឲ្យលំបាកដល់លោក ដល់ចិត្តរបស់លោក។
ហេតុនេះសេចក្ដីសុខពិតរបស់ឪពុកម្ដាយ ពេលខ្លះមិនអាចកើតមានឡើងដោយ គ្រាន់តែកូនៗយកលុយ យកទ្រព្យសម្បត្តិ ឬបង្ហាញសកម្មភាពចំពោះមុខលោក ធ្វើដូចគោរព ស្រឡាញ់ចំពោះលោកនោះទេ។ ប៉ុន្តែសេចក្ដីសុខរបស់លោកគឺផ្ដើមចេញពីទង្វើរចេញពីបេះដូងរបស់កូនៗ ដែលព្យាយាមធ្វើខ្លួនឲ្យក្លាយជាមនុស្សល្អ មនុស្សមានតម្លៃ មានកិត្តិយសជូនដល់គ្រួសារ និងសង្គមជាតិ។ ហើយមាតាបិតាមួយចំនួនធំ មិនដែលមានបំណងចង់បានអ្វីពីកូនៗវិញនោះទេ គឺសុំត្រឹមតែឃើញកូនៗរបស់លោកមានសេចក្ដីសុខ មានចំណេះដឹង មានការងារសមរម្យ ចេះស្រឡាញ់បងប្អូន មានទំនាក់ទំនងល្អចំពោះមនុស្សទូទៅនេះហើយជាសេចក្ដីសុខរបស់លោក៕
© រក្សាសិទ្ធិដោយ thmeythmey.com