យូណេស្កូកត់ត្រាការសម្លាប់រង្គាលដោយទាហានជប៉ុននៅណានជីង ក្នុងបញ្ជីចងចាំពិភពលោក

អន្តរជាតិ

យូណេស្កូកត់ត្រាការសម្លាប់រង្គាលដោយទាហានជប៉ុននៅណានជីង ក្នុងបញ្ជីចងចាំពិភពលោក

11, Oct 2015 , 12:48 pm

រូបភាព

ដោយ: ថ្មីៗ

នៅថ្ងៃសុក្រ អង្គការយូណេស្កូបានប្រកាសកត់ត្រាចូលក្នុងបញ្ជីរំលឹកការចងចាំ ពិភពលោក នូវហេតុការណ៍សម្លាប់រង្គាល នៅខែត្រណានជីង ប្រទេសចិន។ ជាហេតុការណ៍បង្កឡើង ដោយទាហានជប៉ុន នាចុងឆ្នាំ១៩៣៧ ពេលជប៉ុនចូលឈ្លានពានចិន។

អង្គការយូណេស្កូបានសម្រេចកត់ត្រាបែបនេះ ក្នុងឱកាសកិច្ចប្រជុំគណៈកម្មាធិការប្រឹក្សាអន្តរជាតិនៃអង្គការ ដែលបានធ្វើឡើង នៅប្រទេសអារ៉ាប់រួម។ គណៈកម្មាធិការនេះជាអ្នកពិនិត្យសំណើដាក់បញ្ចូលនូវហេតុការណ៍ផ្សេងៗ អោយចូលក្នុងបតិកភណ្ឌឯកសារមនុស្សជាតិ មកពី៤០ប្រទេស។

កាលពីដើមឆ្នាំ២០១៤ រដ្ឋាភិបាលចិនបានសម្រេចកំណត់យកថ្ងៃ១៣ធ្នូ ជាថ្ងៃរំលឹកហេតុការណ៍នេះ សម្រាប់ជាតិចិនទាំងមូល រួចមកហើយ។ គួររំលឹកថា ជប៉ុនបានចូលឈ្លានពានចិន ក្នុងទសវត្សរ៍ឆ្នាំ១៩៣។ ក្នុងខែធ្នូ ឆ្នាំ១៩៣៧ ទាហានជប៉ុនបានដណ្តើមយកបានខែត្រណានជីន ពីចិន។ កាលនោះ ណានជីន គឺជារដ្ឋធានីរបស់ចិន។ ទាហានជប៉ុនបានចាប់រំលោភ ប្លន់ និងសម្លាប់រង្គាលប្រជាជនចិនសន្ធឹកសន្ធាប់។ យោងតាមក្រុងប៉េកាំង ក្នុងពេល៦សប្តាហ៍ បន្ទាប់ពីទាហានជប៉ុនចូលក្នុងក្រុងចិន មានប្រជាជនដល់ទៅ៣សែននាក់ ដែលបានស្លាប់ក្នុងការសម្លាប់រង្គាលនេះ។

ប៉ុន្តែ បើយោងតាមអ្នកប្រវត្តិសាស្ត្របរទេស តួលេខជនរងគ្រោះមានតិចជាងនេះ។ ប្រជាជនចិនដែលស្លាប់ មានប្រមាណ ៤២០០០នាក់ ហើយស្ត្រីចិនដែលត្រូវទាហានជប៉ុនចាប់រំលោភមានតែ២០០០០នាក់ទេ។ រឿងកងទ័ពជប៉ុនសម្លាប់រង្គាលប្រជាជននៅខែត្រណានជីន ជាប្រធានបទតានតឹងរវាងចិននិងជប៉ុនយូរយារមកហើយ។ ចិនចោទជប៉ុនថា មិនបំពេញកាតព្វកិច្ចរំលឹកការចងចាំដ៏ជូរចត់ ដែលទាហានជប៉ុនបានប្រព្រឹត្ត។ កាលពីដើមឆ្នាំ២០១៥ ចិនខឹងជប៉ុនជាខ្លាំង ដោយសារតែក្នុងផ្នែកសិក្សាអប់រំ ជប៉ុនបានចៀសវាងយកពាក្យ "សម្លាប់រង្គាល" មកអត្ថាធិប្បាយពីហេតុការណ៍នៅណានជីង៕