បរាជ័យដ៏មិននឹកស្មានដល់របស់ស្វាយរៀងនាជំនួបជាមួយបៀលប្រាយយូណាយធីត កាលពីថ្ងៃសៅរ៍នៅពហុកីឡដ្ឋានជាតិ បាននាំឲ្យម្ចាស់ជើងឯកឆ្នាំ២០១៣មួយនេះ បាត់បង់ឱកាសជាផ្លូវការក្នុងការប្រជែងយកពានមិត្តហ្វូនខេមបូឌានលីកឆ្នាំ២០១៥ ។ ស្វាយរៀងបាននាំមុខ ៤-២ នៅតង់ទីមួយ ប៉ុន្តែបៀលប្រាយយូណាយធីត បានវាយបកវិញដើម្បីនាំជ័យជម្នះយ៉ាងប្រកៀកក្នុងលទ្ធផល ៦-៥ ។
ក្នុងការប្រកួតកាលពីថ្ងៃសៅរ៍ ស្វាយរៀងត្រូវការជ័យជម្នះជាចាំបាច់។ ថៃ ផល្លា បាននាំបៀលប្រាយនាំមុខមុន នៅក្នុងនាទី ទី១០ ប៉ុន្តែខ្សែប្រយុទ្ធនីហ្សេរីយ៉ា Dzama Bata រកគ្រាប់បាល់វាយបកបានពីរគ្រាប់ជាបន្តបន្ទាប់ភ្លាមៗ មុនពេលកីឡាកររ្វាន់ដា Atuhaire Kipson បន្ថែមបាន២គ្រាប់ទៀតសម្រាប់ស្វាយរៀង។ រីឯគ្រាប់បាល់ទីពីរនៅក្នុងតង់ទីមួយរបស់បៀលប្រាយ សម្រេចបានដោយ ប្រធានក្រុម រ៉ឹង ប៊ុនហៀង។
ឈានចូលដល់តង់ទីពីរ ខ្សែប្រយុទ្ធនីហ្សេរីយ៉ា Rasheed Omokafe បានក្លាយជាកម្លាំងស្នូលរបស់បៀលប្រាយ ដោយរូបគេរកបានគ្រាប់បាល់បញ្ចូលទីចំនួន២គ្រាប់ ខណៈថៃ ផល្លា និងរ៉ឹង ប៊ុនហៀង បន្ថែមម្នាក់មួយគ្រាប់ទៀត។ សុខ សំណាង វាយបកតាមពីក្រោយលួងចិត្តសម្រាប់ស្វាយរៀង ដែលនាំឲ្យបៀលប្រាយទទួលបានជ័យជម្នះក្នុងលទ្ធផល ៦-៥ ។
បរាជ័យនេះ បាននាំឲ្យស្វាយរៀងដែលស្ថិតក្រោមការដឹកនាំបង្វឹករបស់លោក សំ វ៉ាន់ដេត ខកឱកាសក្នុងឈានទៅកាន់វគ្គពាក់កណ្តាលផ្តាច់ព្រ័ត្រដោយមានត្រឹមតែ៣៥ពិន្ទុប៉ុណ្ណោះ ជាមួយនឹងការប្រកួតមួយលើកដែលនៅសេសសល់។
ស្របពេលដែលក្រុមទាំងអស់នៅសល់តែការប្រកួតមួយលើកទៀតនោះ បឹងកេតអង្គរមិនទាន់ទទួលបានតំណែងជាផ្លូវការក្នុងនាមជាក្រុមចំណាត់ថ្នាក់ទីមួយនោះឡើយ ដោយសារតែភ្នំពេញក្រោនដេញតាមយ៉ាងប្រកៀក។ កាលពីចុងសប្តាហ៍កន្លងមកផងដែរ បឹងកេតបានយកឈ្នះវេស្ទើន ៥-២ ដើម្បីរក្សាការនាំមុខភ្នំពេញក្រោន ដែលបានបំបាក់អគ្គស្នងការដ្ឋាននគរបាលជាតិ ២-១ ។ ក្រុមទាំងពីរត្រូវប៉ះគ្នានៅថ្ងៃព្រហស្បតិ៍ ដើម្បីប្រជែងយកកៅអីវគ្គជម្រុះ Mekong Toyota Cup នៅប្រទេសឡាវ។
សម្រាប់ចំណាត់ថ្នាក់លេខ៣ និងលេខ៤ ក្រុមចំនួន៤មានពិន្ទុប្រទាញប្រទង់គ្នា ដោយណាហ្គាវើលដែលបានឈ្នះគិរីវង់សុខសែនជ័យ ២-១ ឈរលេខ៣បណ្តោះអាសន្ន ខណៈខេមបូឌានថាយហ្គឺរ ឈរនៅទីតាំងលេខ៤ ក្រោយឈ្នះស៊ីម៉ាក់ ២-១ ដូចគ្នា។
ក្រសួងការពារជាតិ និងអគ្គស្នងការដ្ឋាននគរបាលជាតិ ដែលមាន៣៥ពិន្ទុដូចគ្នា នៅតែមានឱកាសប្រជែងជាមួយណាហ្គាវើល និងខេមបូឌានថាយហ្គឺរ។ កាលពីចុងសប្តាហ៍កន្លងមកផងដែរ ក្រសួងការពារជាតិបានយកឈ្នះ អាស៊ីអឺរ៉ុប ៤-២ ស្របពេលដែលនគរបាលជាតិខកចិត្តដោយចាញ់ភ្នំពេញក្រោន ២-១ ។
ស្វាយរៀង និងបៀលប្រាយ ស្ថិតនៅចំកណ្តាលតារាងដោយឃ្លាតឆ្ងាយពីតំបន់គ្រោះថ្នាក់ ប៉ុន្តែគ្មានឱកាសទៅប្រកួតវគ្គខ្វែង ។ អាស៊ីអឺរ៉ុប ស៊ីម៉ាក់ និងវេស្ទើន ត្រូវធ្វើឲ្យបានល្អរៀងៗខ្លួនសម្រាប់ការប្រកួតចុងក្រោយ ខណៈគិរីវង់សុខសែនជ័យ ទំនងជាពិបាករួចផុតណាស់៕