ប្រធាន JCI Cambodia អាណត្តិថ្មី លើកទឹកចិត្តយុវជនឲ្យចូលរួមការងារសង្គមច្រើន

ជាតិ

ប្រធាន JCI Cambodia អាណត្តិថ្មី លើកទឹកចិត្តយុវជនឲ្យចូលរួមការងារសង្គមច្រើន

20, Oct 2015 , 2:14 pm

រូបភាព

ដោយ: ថ្មីៗ

ភ្នំពេញ៖ សន្និបាតថ្នាក់ជាតិ និងរាត្រីវប្បធម៌ របស់សភាយុវពាណិជ្ជករអន្តរជាតិកម្ពុជាប្រចាំឆ្នាំ២០១៥ (JCI Cambodia National Convention 2015) បានប្រារព្ធឡើងនៅថ្ងៃទី១០ ខែតុលា ឆ្នាំ២០១៥ នៅឯសណ្ឋាគារសុខាភ្នំពេញ និងរ៉េស៊ីដង់ ក្រោមការរៀបចំរបស់សភាយុវពាណិជ្ជករកម្ពុជា (Junior Chamber International រឺ JCI Cambodia) ។ សន្និបាតនេះបានប្រមូលផ្តុំសមាជិក សមាជិកា និងយុវជនស្ម័គ្រចិត្តនៃ JCI Cambodia ភ្ញៀវកិត្តិយសទាំងឡាយ ព្រមទាំងតំណាង ក្រុមហ៊ុន អាជីវកម្ម និងផ្តល់សេវាកម្មជាង ២០០នាក់។

គោលបំណងចម្បងនៃពិធីសន្និបាតថ្នាក់ជាតិនេះគឺ ទី១ប្រកាសរបាយការណ៍ និងសមិទ្ធិផល សម្រេចប្រចាំឆ្នាំ ទី២ការបោះឆ្នោត និងប្រគល់ពានរង្វាន់ដល់សមាជិកឆ្នើម រីឯទី៣ គឺពង្រឹង ការយល់ដឹងពីផលិតផល ឬសេវាកម្មដែលតំនាងស្ថាប័ននីមួយៗ មានបំណងចង់បង្ហាញ ដល់អ្នក ចូលរួមដទៃទៀត ឱ្យបានជ្រាបបន្ថែម ពីលើការផ្សព្វផ្សាយជាសាធារណៈ។ មិនតែប៉ុណ្ណោះភ្ញៀវ កិត្តិយសដែលមានវត្តមាននៅទីនោះ ក៏បានស្វែងយល់កាន់តែច្បាស់ពីទស្សនៈវិស័យរបស់ JCI Cambodia ហើយក៏ឆ្លៀតឱកាសនេះ ពង្រីកនូវចំណងមិត្តភាពរវាង គ្នានឹងគ្នាផងដែរ។

ជាលទ្ធផល មានគម្រោង៦ដែលទទួលបានពានប្រចាំឆ្នាំនេះគឺ គម្រោង Bags to School និង «Breakfast Talk» ដោយ JCI Phnom Penh, គម្រោង«តោះនាំគ្នាដាំដើមឈើ ក្រុងកែប» និង «វេទិកាប្រកួតប្រជែង វោហាស័ព្ទសាធារណៈ និងតស៊ូមតិ» ដោយ JCI Chaktomuk, កម្មវិធី«រង្វាន់យុវសហគ្រិនកម្ពុជា» និងគម្រោង«សាងសង់សាលារៀន» ដោយ JCI Mekong។ ជ័យលាភី ទាំងនេះ ត្រូវបានប្រគល់ដោយផ្ទាល់ ដោយប្រធានJCI Cambodia ឆ្នាំ២០១៥ គឺលោក គួច ផេង។ ចំណែកក្រុមប្រឹក្សាភិបាលថ្មី ដែលជាប់ឆ្នោតសម្រាប់តំណែង ក្នុងឆ្នាំ២០១៦ រួមមាន សមាសភាពដូចខាងក្រោម៖

- លោក ប៉ិច បូឡែន ប្រធាន

- លោកស្រី ជា សុផល្លា អនុប្រធានប្រតិបត្តិ

- អ្នកនាង ដែក ដារី អនុប្រធាន

- លោកស្រី យូ បូរី អនុប្រធាន

ក្នុងនាមជាអ្នកបន្តវេនដឹកនាំអាណត្តិថ្មី ប្រធាន JCI Cambodia ថ្នាក់ជាតិប្រចាំឆ្នាំ២០១៦ លោក ប៉ិច បូឡែន ជាអគ្គនាយក នៃសម្ព័ន្ធក្រុមហ៊ុន Westline Education Group និងក្រុមហ៊ុនជាច្រើនទៀត បានសម្តែងចំណាប់អារម្មណ៍យ៉ាងដូច្នេះថា៖«ក្នុងនាមខ្ញុំបាទជាប្រធានជាប់ឆ្នោត សម្រាប់ឆ្នាំថ្មី ២០១៦ ខ្ញុំបាទសូមថ្លែងអំណរគុណ ដល់សមាជិក សមាជិកាទាំងអស់ ដែលផ្តល់ការគាំទ្រពេញទំហឹងដល់បេក្ខភាពខ្ញុំបាទ។ ខ្ញុំបាទ សង្កេតឃើញថាយុវជនកម្ពុជាកាន់តែមានទឹកចិត្តចូលរួមការងារសង្គមច្រើនឡើង។ ក្នុងអណត្តិ របស់ខ្ញុំបាទ ខ្ញុំបាទនឹងជម្រុញ ក៏ដូចជាបណ្តាលទឹកចិត្តដល់យុវជនទាំងនោះ ឱ្យចាត់សកម្មភាព វិជ្ជមាន កាន់តែប្រសើរឡើង។ បេសកកម្មស្នូល ឆ្នាំ២០១៦របស់ខ្ញុំបាទគឺជាឆ្នាំនៃការបង្រួម ជំនក់ចិត្ត ដើម្បីបន្តមរតកនៃឥទ្ធិពលវិជ្ជមាន»។

កម្មវិធីអបអរសមាសភាព ក្រុមប្រឹក្សាភិបាលថ្មីហៅថា«រាត្រីវប្បធម៌» ប្រព្រឹត្តទៅដោយមានការចូលរួមដ៏ខ្ពង់ខ្ពស់ពីសំណាក់ លោក ហ៊ុន ម៉ានី ប្រធានសហភាព សហព័ន្ធយុវជនកម្ពុជា ដោយកំណត់យកឈុតប្រពៃណីខ្មែរសម្រាប់កម្មវិធី។ លើសពីនេះ ភ្ញៀវទាំងអស់ បានរាំជាចង្វាក់ម៉ាឌីស៊នជុំគ្នាចំនួន១០០នាក់ ដើម្បីអបអរខួបទី១០០ឆ្នាំ គឺឆ្នាំនេះ របស់ JCI ពិភពលោកផងដែរ។

សូមបញ្ជាក់ផងដែរ សភាយុវពាណិជ្ជករអន្តរជាតិកម្ពុជា គឺជាអង្គការអន្តរជាតិ មិនរកប្រាក់ ចំណេញមានសមាជិកជាង១២០ប្រទេស ដែលប្រមូលផ្តុំដោយពាណិជ្ជករវ័យក្មេង អាយុក្រោម ៤០ឆ្នាំជាច្រើនរូប ដែលកំពុងស្ម័គ្រចិត្តចូលរួមអនុវត្តគម្រោងជាច្រើន ក្នុងការអភិវឌ្ឍសង្គមដើម្បី ការផ្លាស់ប្តូរជាវិជ្ជមាន។ សមាគមមួយនេះក៏មានគម្រោងជាច្រើន ដើម្បីផ្តោតលើចំណុចស្នូលទាំង ៤គឺ ការអភិវឌ្ឍសហគមន៍ ការបង្កើតឱកាសពាណិជ្ជកម្ម ការអភិវឌ្ឍសមត្ថភាពបុគ្គល និង ទំនាក់ទំនងអន្តរជាតិ៕