ជាតិ
នយោបាយជាតិ
ការគំរាមថាផ្ទុះសង្គ្រាមរបស់លោក ហ៊ុន សែន ធ្វើឲ្យអ្នកវិនិយោគ មិនមករកស៊ីនៅកម្ពុជា
×
ការលើកឡើងរបស់លោក នាយករដ្ឋមន្ត្រី ហ៊ុន សែន ថានឹងមានសង្គ្រាមកើតឡើង ប្រសិនបើគណបក្សសង្គ្រោះជាតិឈ្នះឆ្នោត មិនត្រឹមតែបំភ័យសតិអារម្មណ៍របស់ប្រជាពលរដ្ឋទេ តែថែមទាំងជាការគំរាមដល់ពួកអ្នកជំនួញបរទេសទៀតផង។ នេះជាការអះអាងរបស់លោក សួន សេរីរដ្ឋា ប្រធានគណបក្សអំណាចខ្មែរ ក្នុងសន្និសីទកាសែតមួយនៅទីស្នាក់ការបក្សរបស់ខ្លួន កាលពីថ្ងៃទី២០ ខែតុលា ម្សិលមិញ។
ថ្លែងទៅកាន់ក្រុមអ្នកសារព័ត៌មាន លោក សួន សេរីរដ្ឋា ប្រមុខគណបក្សអំណាចខ្មែរ បានប្រតិកម្មនឹងលោក ហ៊ុន សែន ថា ការលើកឡើងតែពីបញ្ហាសង្គ្រាមមកបំភ័យសតិអារម្មណ៍ប្រជាពលរដ្ឋ គឺជាការប្រមាថដល់អាយុជីវិតប្រទេសជាតិរបស់ខ្លួន និងអាចបញ្ឈប់អ្នកវិនិយោគបរទេស ឲ្យឈប់មករកស៊ីនៅកម្ពុជាផងដែរ។ ប្រធានបក្សថ្មីរូបនេះសង្កត់ធ្ងន់ៗថា៖ «ពួកអ្នកវិនិយោគទុនបរទេស ឬអ្នកជំនួញសុចរិតទាំងឡាយ នឹងមិនមករកស៊ីនៅក្នុងប្រទេសខ្មែរឡើង ប្រសិនបើអ្នកដឹកនាំគំរាមតែពីរឿងសង្គ្រាមដូច្នេះ»។
លោក សួន សេរីរដ្ឋា បន្តទៀតថា ការដែលមិនមានអ្នកជំនួញបរទេសចូលមករកស៊ីនៅស្រុកខ្មែរ គឺជាផលប៉ះពាល់ដល់សេដ្ឋកិច្ចរបស់ប្រទេសទាំងមូល ហើយថែមទាំង ចាត់ទុកលោក ហ៊ុន សែន ថាជាមេដឹកនាំបែបឈ្មួញសង្គ្រាមទៀតផង។ លោកបញ្ជាក់បែបនេះថា៖«អ្នកដឹកនាំជាឈ្មួញសង្គ្រាម មិនចេះអ្វីក្រៅពីសង្គ្រាមទេ ព្រោះមានតែសង្គ្រាមប៉ុណ្ណោះ ទើបអាចការពារអំណាចរបស់ខ្លួនបាន»។
ស្តាប់សំឡេងលោក សួន សេរីរដ្ឋា
កន្លងមក ក្រុមអ្នកវិភាគ និងអ្នកតាមដានស្ថានការណ៍នយោបាយមួយចំនួនបានរិះគន់ចំពោះ សារនយោបាយរបស់លោក ហ៊ុន សែន ដែលតែងតែគំរាមម្តងហើយម្តងទៀតពីការផ្ទុះ សង្គ្រាមនេះ។ នៅក្នុងពិធីចែកសញ្ញាបត្រដល់និស្សិតនៅវិទ្យាស្ថានជាតិអប់រំ កាលពីថ្ងៃទី១៩ ខែតុលា ឆ្នាំ២០១៥ លោកហ៊ុន សែន បាន ប្រកាសសាជាថ្មីថា សង្គ្រាមត្រូវតែកើតឡើងពិតប្រាកដមែនប្រសិនបើបក្សសង្គ្រោះជាតិឈ្នះការបោះឆ្នោត៕
Tag:
សួន សេរីរដ្ឋា
បក្សអំណាចខ្មែរ
© រក្សាសិទ្ធិដោយ thmeythmey.com