លោក សម រង្ស៊ីថា លោក ហ៊ុន សែន រកលេសប្រើអំពើហិង្សាបង្កើតអធម្មនុញ្ញ ដើម្បីបញ្ចៀសការបោះឆ្នោត

ជាតិ

នយោបាយជាតិ

លោក សម រង្ស៊ីថា លោក ហ៊ុន សែន រកលេសប្រើអំពើហិង្សាបង្កើតអធម្មនុញ្ញ ដើម្បីបញ្ចៀសការបោះឆ្នោត

27, Oct 2015 , 9:59 am

រូបភាព

ដោយ: ថ្មីៗ

ក្រៅពីចាត់ទុកអំពើហិង្សា កាលពីម្សិលមិញថា ជាការឆ្លើយតបពីសំណាក់បក្សកាន់អំណាច ទៅនឹងបាតុកម្មរបស់ប្រជាពលរដ្ឋនៅប្រទេសបារាំងប្រឆាំងលោក ហ៊ុន សែន។ លោក សម រង្ស៊ី បានចោទលោកនាយករដ្ឋមន្ត្រី ហ៊ុន សែន ថា ហាក់ដូចមានបំណងចង់រកលេសបង្កើតរឿងអធម្មនុញ្ញ ដើម្បីគេចវេសពីការបោះឆ្នោត។

ប្រតិកម្មតបនឹងបាតុកម្ម ដែលបង្កហិង្សាលើតំណាងរាស្ត្ររបស់ខ្លួនកាលពីម្សិលមិញ លោកប្រមុខបក្សប្រឆាំង បានចាត់ទុកសកម្មសភាពនេះជាអំពើរបស់គណបក្សកាន់អំណាច។ ពីប្រទេសបារាំងតាមទំព័រហ្វេសប៊ុករបស់ខ្លួន លោក សម រង្ស៊ី បានចោទលោក ហ៊ុន សែន ថា «ហាក់ដូចជាចង់រកលេសប្រើអំពើហិង្សាកាន់តែច្រើន ដើម្បីបង្កើតព្រឹត្តការណ៍អវិជ្ជមាននិងអធម្មនុញ្ញ ក្នុងគោលបំណងចៀសវាងការបោះឆ្នោតខាងមុខ» ។ « បំណងបែបនេះឃើញកាន់តែច្បាស់ តាំងពីមានគណៈកម្មាធិការជាតិរៀបចំការបោះឆ្នោត (គ.ជ.ប.) ថ្មីមួយ ដែលប្រជាពលរដ្ឋអាចជឿទុកចិត្តបាន ពីព្រោះបើមានការបោះឆ្នោតដ៏ត្រឹមត្រូវ គណបក្សរបស់លោក ហ៊ុន សែន មិនអាចឈ្នះឆ្នោតបានទេ នៅឆ្នាំ ២០១៧ (បោះឆ្នោតឃុំ-សង្កាត់) និង ឆ្នាំ ២០១៨ (បោះឆ្នោតជាតិ)»។ នេះជាការបញ្ជាក់របស់លោក សម រង្ស៊ី។

បន្ថែមពីលើនេះ លោក សម រង្ស៊ី ក៏បានបញ្ជាក់យ៉ាងនេះថា៖«ដូច្នេះ ដើម្បីរក្សាអំណាចបានច្រើនឆ្នាំទៅមុខទៀត លោក ហ៊ុន សែន កំពុងប្រើវិធី ស្រដៀងពួក ហ្វាស៊ីស្ត (fascist) នៅប្រទេសអ៊ីតាលី ដែលចូលចិត្តប្រើអំពើហិង្សា ទៅលើអ្នកតំណាងរាស្ត្រនិងអ្នកដទៃទៀត ពីឆ្នាំ ១៩២២ ដល់ឆ្នាំ ១៩៤៥» ។