លោក ម៉ុង ឫទ្ធី ជួយជនក្រីក្រ ដើម្បីទទួលបានកេរ្តិ៍ឈ្មោះ កិត្តិយស ពេលអស់ជីវិត

ជាតិ

សង្គមជាតិ

លោក ម៉ុង ឫទ្ធី ជួយជនក្រីក្រ ដើម្បីទទួលបានកេរ្តិ៍ឈ្មោះ កិត្តិយស ពេលអស់ជីវិត

03, Nov 2015 , 7:39 pm

រូបភាព

ដោយ:

ភ្នំពេញ៖ លោកឧកញ៉ា ម៉ុង ឫទ្ធី អាយុ ៦១ឆ្នាំ ជាប្រធានក្រុមហ៊ុន ម៉ុង ឫទ្ធី គ្រុប ដែលក្រុមហ៊ុនផ្តោតសំខាន់លើវិស័យកសិកម្ម កសិឧស្សាហកម្ម សំណង់ និងការចិញ្ចឹមសត្វ។ ក្រុមហ៊ុន ម៉ុង ឫទ្ធី គ្រុប បានផ្តល់ការងារ ផ្តល់ផ្ទះសម្បែងជូនពលរដ្ឋខ្មែររាប់ម៉ឺននាក់ ធ្វើការនៅក្នុងតំបន់អភិវឌ្ឍ នៅខេត្តព្រះសីហនុ។ មិនត្រឹមតែប៉ុណ្ណោះ លោក ម៉ុង ឫទ្ធី ដែលជាអ្នកបានតស៊ូក្នុងជីវិតតាំងពីបាតដៃទទេ ពីអ្នកធាក់ស៊ីក្លូ រហូតដល់ក្លាយជាមហាសេដ្ឋីនាពេលបច្ចុប្បន្ន បានចំណាយថវិកាផ្ទាល់ខ្លួនជាង ២០ លានដុល្លារ ចូលរួមសកម្មភាពមនុស្សសធម៌ជួយជនក្រីក្រ អស់រយៈពេលជាង ៣០ឆ្នាំ មកទល់នេះ។

នាសន្និសីទតស៊ូមតិថ្នាក់ជាតិលើកទី ៩ ក្រោមប្រធានបទ ធ្វើការរួមគ្នាដើម្បីលើកកម្ពស់ គណនេយ្យភាពសង្គម លើអភិបាលកិច្ចដីធ្លី និង ធនធានធម្មជាតិនៅកម្ពុជា នៅថ្ងៃទី៣ វិច្ឆិកា នេះ លោកឧកញ៉ា ម៉ុង ឫទ្ធី បានបញ្ជាក់ពីតួនាទីជាឧកញ៉ា ដែលព្រះមហាក្សត្រប្រទានឲ្យមករូបលោក និងបំពេញតួនាទីជាប្រធានគណៈកម្មការទី៣ ព្រឹទ្ធសភា។

លោក ម៉ុង ឫទ្ធី និយាយទៅកាន់អ្នកសារព័ត៌មានថា លោកមិនយល់ ហេតុអ្វីបានជាឧកញ៉ា អ្នកមានទ្រព្យសម្បត្តិមួយចំនួន ធ្វើសកម្មភាពរំលោភបំពានដីធ្លីពលរដ្ឋក្រីក្រ នាំឲ្យគេជេរបញ្ចោរ ដែលប៉ះពាល់ដល់កេរ្តិ៍ឈ្មោះ កិត្តិយសផ្ទាល់ខ្លួន។ ចំពោះលោក ម៉ុង ឫទ្ធី កេរ្តិ៍ឈ្មោះ កតិ្តយស គឺជាតម្លៃសំខាន់បំផុត ទាំងនៅពេលមានជីវិត រហូតដល់ពេលអស់ជីវិតពីភពផែនដីនេះ ទៅវិញ។ លោកចង់បានកេរ្តិ៍ឈ្មោះ និងកតិ្តយសល្អពីសំណាក់ប្រជាជន និងសាធារណៈជនមកវិញ នៅពេលលោកបាត់បង់ជីវិត។

លោកថ្លែងយ៉ាងដូចច្នេះថា៖«ខ្ញុំធ្វើសកម្មភាពនេះ ដូចបានឃើញតាមហ្វេសប៊ុក ដើម្បីខ្ញុំទាក់ទាញអ្នកដទៃទៀត ដែលវាមិនមានចិត្តបុណ្យអ្វីទាល់តែសោះនោះ ឲ្យធ្វើបុណ្យធ្វើទានតាមខ្ញុំខ្លះទៅ...។ សកម្មភាពរបស់ខ្ញុំទាំងអស់ ខ្ញុំគ្រាន់តែបំរើជាតិទៅតាមទិសដៅរបស់រាជរដ្ឋាភិបាល បំរើប្រជាជន...អ្នកខ្លះគេសួរថា ឧកញ៉ាមានភារកិច្ចធ្វើអ្វី? គឺឧកញ៉ាមានភារកិច្ច ធ្វើដូចខ្ញុំ»។

ចំពោះលោក ម៉ុង ឫទី្ធ បញ្ហាវិវាទដីធ្លី នានារវាងក្រុមហ៊ុន និងប្រជាពលរដ្ឋ កើតឡើង គឺដោយសារការមិនចេះយោគយល់ អធ្យាស្រ័យឲ្យគ្នាទៅវិញទៅមក។ ប្រសិនបើពួកគេ ចេះយោគយល់គ្នានោះ ចេះពិភាក្សាគ្នាផ្តល់សំណងនានានោះ លោកយល់ថា បញ្ហានឹងមិន កើតមាននោះទេ៕