តារាបាល់ទាត់ Benzema រងការចោទប្រកាន់ពាក់ព័ន្ធរឿងក្តីវីដេអូសិច ផ្អើលអស់សារព័ត៌មានបារាំង

តារាបាល់ទាត់អន្តរជាតិបារាំង Karim Benzema (ការីម បិនហ្សេម៉ា) ត្រូវបានប៉ូលិសបារាំងដោះលែងនៅថ្ងៃព្រហស្បតិ៍ម្សិលមិញ ក្រោយឃាត់ខ្លួនសួរចម្លើយ អស់២៤ម៉ោង។ ប៉ុន្តែ តុលាការក្រុងវែរសៃ (Versailles) បានសម្រេចចោទប្រកាន់បិនហ្សេម៉ា ពីបទរួមដៃជើងជាមួយក្រុមខិលខូច ដើម្បីជំរិតទារប្រាក់លោក ម៉ាជើ វ៉ាល់ប៊ុយអេណា ( Mathieu Valbuena) ដែលជាមិត្តរួមក្រុមជម្រើសជាតិបារាំងជាមួយគ្នា។ ជាការចោទប្រកាន់ពាក់ព័ន្ធនឹងរឿងក្តីវីដេអូសិចផ្ទាល់ខ្លួនរបស់លោក Valbuenaនេះឯង។ បទល្មើសជំរិតទារប្រាក់នេះអាចធ្វើឲ្យជនល្មើសជាប់ពន្ធនាគាររហូតដល់៥ឆ្នាំ។ ទាំងបេនហ្សេម៉ា ទាំងវ៉ាល់ប៊ុយអេណា សុទ្ធតែគ្មានឈ្មោះក្នុងបញ្ជីក្នុងក្រុមជម្រើសជាតិបារាំង ដែលចុះផ្សាយថ្ងៃព្រហស្បតិ៍ម្សិលមិញ សម្រាប់ការប្រកួតជាមួយអាល្លឺម៉ង់ និងអង់គ្លេស នៅពាក់កណ្តាលខែវិច្ឆិកានេះ។

លោក មុំ ពិទូរ្យ លម្អិតព័ត៌មាននេះ

តាំងពីថ្ងៃពុធមក តារាបាល់ទាត់អន្តរជាតិបារាំង ការីម បេនហ្សេម៉ា បានក្លាយជាចំណីដ៏ឆ្ងាញ់ ក្នុងអត្ថបទរឿងអាស្រូវ ដែលសារព័ត៌មានបារាំងចុះផ្សាយឥតសំចៃដៃ។ នៅជិតដំណាច់ឆ្នាំ២០១៥នេះ បេនហ្សេម៉ាត្រូវបាក់មុខសាជាថ្មី ដោយសារតែជាប់ពាក់ព័ន្ធនឹងរឿងក្តីវីដេអូសិចរបស់កីឡាករ Mathieu Valbuena ម៉ាជើ វ៉ាល់ប៊ុយអេណា ដែលជាមិត្តរួមអាជីពក្នុងក្រុមជម្រើសជាតិបារាំង។ លោកស្រីចៅក្រម Nathalie Boutard ណាតាលី ប៊ូតា បានសម្រេចចោទប្រកាន់ Benzema ពីបទរួមដៃជើងជាមួយក្រុមខិលខូច ដើម្បីជម្រិតទារប្រាក់ពីMathieu Valbuena។ ក្នុងនាមជាតារាខ្សែប្រយុទ្ធក្រុម Real Madrid និងក្រុមជម្រើសជាតិបារាំង កីឡាករសំបូរលុយចាយហូរហៀរ រាប់សិបលានអឺរ៉ូ តែបែរជាត្រូវមករងការចោទប្រកាន់ថា ជំរិតទារប្រាក់ពីមិត្តរួមអាជីពបាល់ទាត់ ដែលជារឿងគួរអាម៉ាសខ្លាំងទៅវិញ។

រឿងក្តីវីដេអូសិច បានចាប់ផ្តើមផ្ទុះឡើងតាំងពីរដូវក្តៅ ឆ្នាំ២០១៤ មកម្លេះ។ វីដេអូសិចរបស់ខ្សែបម្រើរបស់ក្លិប Lyon កីឡាករ Mathieu Valbuena បានធ្លាក់ដល់ដៃបុរសម្នាក់ឈ្មោះអាឡិច ដែលស្គាល់គ្នាជាមួយលោកវ៉ាល់ប៊ុយអេណា។ តែគេមិនដឹងថា ហេតុអ្វីបានជាបុរសនោះមានវីដេអូសិចផ្ទាល់ខ្លួនរបស់វ៉ាល់ប៊ុយអេណាទេ។ ក្រោយមក វីដេអូសិចបានរាលដាលដឹងលឺដល់បុរស២នាក់ទៀត។ ក្រុមខិលខូចទាំងនោះក៏បានយកវីដេអូនេះទៅជំរិតទារប្រាក់ពីតារាបាល់ទាត់ វ៉ាល់ប៊ុយអេណា។ ពួកគេគំរាមថា បើវ៉ាល់ប៊ុយអេណា មិនព្រមឲ្យប្រាក់ពួកគេទេ ពួកគេនឹងយកវីដេអូសិចនោះ ទៅផ្សាយឲ្យសាធារណជនបានដឹង បានឃើញគ្រប់គ្នា។

ប៉ុន្តែ លោកវ៉ាល់ប៊ុយអេណាបដិសេធ និងបានដាក់ពាក្យប្តឹងទៅប៉ូលិស។ ប៉ូលិសបារាំងបានស៊ើបអង្កេត ដោយបន្លំខ្លួនធ្វើជាអ្នកស្គាល់គ្នាជិតស្និទ្ធជាមួយវ៉ាលប៊ុយអេណា ដើម្បីចរចាថ្លៃវីដេអូសិច ជាមួយក្រុមជំរិតទារប្រាក់នោះ។ កាលពីខែកញ្ញា ម៉ាជើ វ៉ាល់ប៊ុយអេណា បានស៊ុតបាល់បញ្ចូលទីក្រុមពរទុយហ្កាល់ ១គ្រាប់ ធ្វើឲ្យក្រុមខិលខូចអរមិនតិចទេ។ ពួកគេប្រហែលជាគិតថា អាចទារប្រាក់បានច្រើនពីកីឡាករបាល់ទាត់រូបនេះ។ ក្រុមជនល្មើសបានដាក់សម្ពាធម្តងទៀតថា បើមិនឲ្យប្រាក់ពួកគេទេ វីដេអូសិចនឹងត្រូវផ្សព្វផ្សាយជាសាធារណៈ មុនការប្រកួតបាល់ទាត់អឺរ៉ុប នាខែមិថុនា ឆ្នាំ២០១៦ ខាងមុខ។ ក្រុមជនល្មើសទាំងនោះបានប្រាប់ប៉ូលិសដែលដើរតួជាអ្នកចរចាក្លែងក្លាយថា ក្រុមខ្លួនក៏ធ្លាប់ទារប្រាក់អតីតខ្សែប្រយុទ្ធហង្សក្រហមLiverpool កីឡាករ Djibril Cissé ផងដែរ កាលពីឆ្នាំ២០០៨ គឺទារបានដល់ទៅ១សែនអឺរ៉ូ ក្នុងរឿងស្រដៀងគ្នានេះ។ ដោយសារវីដេអូ និងមុខមាត់តារាបាល់ទាត់វ៉ាល់ប៊ុយអេណា សំខាន់ជាងDjibril Cissé ក្រុមល្មើសចង់ឲ្យវ៉ាល់ប៊ុយអេណា បង់លុយឲ្យពួកគេលើសពី១សែនអឺរ៉ូ។

ដោយសារការចរចាថ្លៃវីដេអូសិចមិនព្រមទៅមុខ ក្រុមល្មើសក៏បានសម្រេចប្តូរយុទ្ធសាស្ត្រចរចា។ គឺពេលនោះហើយ ដែលខ្សែប្រយុទ្ធរបស់ Real Madrid ការីម បេនហ្សេម៉ា ជាប់ខ្លួនក្នុងរឿងអាស្រូវ ខុសច្បាប់នេះ។ ក្រុមល្មើសបានទាក់ទងមនុស្សម្នាក់ឈ្មោះ ការីម ដែលត្រូវជាមិត្តភក្តិតាំងពីកុមារភាពរបស់បេនហ្សេម៉ា។ ក្រុមជនល្មើសឲ្យបុរសរូបនេះទាក់ទងបេនហ្សេម៉ា ដើម្បីជំរុញឲ្យវ៉ាល់ប៊ុយអេណា បង់លុយឲ្យពួកគេ។ ទូរទស្សន៍បារាំងប៉ុស្តិ៍លេខ៦ M6 (អិមស៊ិស) បានចុះផ្សាយថា បេនហ្សេម៉ា បានប្រាប់ការីមជាមិត្តភក្តិខ្លួនថា៖ ឯងកុំភ័យអី! វាគ្មានជម្រើសទេ។ ខ្ញុំនឹងធ្វើឲ្យវាយល់។ វានឹងបង់លុយ។

ស្តាប់ទៅ ពាក្យថា "វា វា" នេះ គឺបេនហ្សេម៉ា ចង់សំដៅទៅលើវ៉ាល់ប៊ុយអេណា ជាមិត្តអាជីពបាល់ទាត់នោះហើយ។ បេនហ្សេម៉ាបានប្រាប់ប៉ូលិសថា ពិតជាបានធ្វើអន្តរការីជួយការីមជាមិត្តភក្តិមែន តែមិនបានគិតថា ធ្វើខុសឆ្គងចំពោះ វ៉ាល់ប៊ុយអេណា ទេ។ ដើម្បីជួយមិត្តពីកុមារភាព ទាមទារប្រាក់ បេនហ្សេម៉ាហ៊ានប្រើពាក្យថា មិនបានគិតថា ខុសឆ្គងជាមួយមិត្តរួមអាជីព។ នេះមិនមានន័យថា បេនហ្សេម៉ាចង់រួមដៃជើងជាមួយក្រុមខិលខូចនោះទេ? គួរបញ្ជាក់ដែរថា ការីមជាមិត្តពីកុមារភាពនោះ ក៏ធ្លាប់ត្រូវប៉ូលិសបារាំងស្គាល់មុខក្នុងបទល្មើសមួយចំនួនដែរ ដូចជាការជួញដូរគ្រឿងញៀន រឺការលួចឆក់ជាដើម។ បេនហ្សេម៉ាបដិសេធ ថាមិនបានរួមដៃជើងជាមួយក្រុមជនខិលខូចនេះទេ។ ប៉ូលិសបារាំងបានចាប់ខ្លួនក្រុមជនល្មើសនៅចុងខែតុលាកន្លងទៅ។ បេនហ្សេម៉ាត្រូវបានតុលាការហាមឃាត់មិនឲ្យទាក់ទងទាំងជាមួយក្រុមជនល្មើស ទាំងជាមួយលោកវ៉ាល់ប៊ុយអេណា ជាជនរងគ្រោះក្នុងរឿងក្តីនេះ។

ប្រហែលដើម្បីកុំឲ្យក្រុមបាល់ទាត់ជម្រើសជាតិបារាំងស្អុយឈ្មោះខ្លាំងពេកហើយមើលទៅ ទើបលោក ឌីតដ្យេ ដេស្ហង់ (Didier Deschamps) ជាគ្រូបង្វឹករបស់ជម្រើសជាតិបារាំងមិនបានជ្រើសរើសទាំងបេនហ្សេម៉ា ទាំងវ៉ាល់ប៊ុយអេណា ឲ្យចូលរួមប្រកួតជាមួយអាល្លឺម៉ង់ និងអង់គ្លេស នៅពាក់កណ្តាលខែវិច្ឆិកានេះទេ។ ប៉ុន្តែ លោកដេស្ហង់ ប្រាប់ថា បេនហ្សេម៉ាមានរបួសត្រង់ភ្លៅ ហើយវ៉ាល់ប៊ុយអេណាវិញជាជនរងគ្រោះផ្លូវចិត្តក្នុងរឿងទាមទារប្រាក់នេះ។ ដូច្នេះ លោកទុកឲ្យវ៉ាល់ប៊ុយអេណាសម្រាកខ្លះ។

មិនមែនជាលើកទី១ទេ ដែលតារាខ្សែប្រយុទ្ធក្រុម Real Madrid រងរឿងអាស្រូវផ្អើលអស់អ្នកសារព័ត៌មាននោះ។ រឿងអាស្រូវហាក់កើតឡើងស្ទើររាល់ឆ្នាំទៅហើយ។ ប៉ុន្មានឆ្នាំមុននេះ បេនហ្សេម៉ាធ្លាប់រងអាស្រូវរឿងផ្លូវភេទជាមួយក្មេងស្រីមិនទាន់គ្រប់ការ។ កាលពីឆ្នាំ២០១៣ ប៉ូលិសអេស្ប៉ាញបានតម្រូវឲ្យតារាខ្សែប្រយុទ្ធReal Madrid រូបនេះបង់ប្រាក់ពិន័យ ពីបទបើកបររថយន្តក្នុងល្បឿនហួសហេតុផងដែរ។ ការីម បេនហ្សេម៉ា ពិតជាតារាបាល់ទាត់អន្តរជាតិល្បីគ្រប់បែបយ៉ាងមែន!