កីឡាជាតិ
ជាតិ
ភ្នំពេញក្រោនពិន័យកីឡាករ៧រូប និងមន្ត្រី៤រូបជុំវិញការកំណត់លទ្ធផល លោក ឬទ្ធី សំណាង ប្រធានក្លិបភ្នំពេញក្រោន
× ក្លិបភ្នំពេញក្រោន កាលពីថ្ងៃទី៨ ខែវិច្ឆិកា បានចេញសេចក្តីថ្លែងការណ៍ស្តីពីការពិន័យកីឡាករ៧នាក់ និងមន្ត្រី៤នាក់ ដោយក្លិបបានរកឃើញថា ពួកគេប្រព្រឹត្តមិនសមរម្យ និងធ្ងន់ធ្ងរចំពោះលក្ខន្តិកៈនៃកិច្ចសន្យាដោយមានការកំណត់លទ្ធផលបាល់ទាត់ និងបំផ្លាញកេរ្តិ៍ឈ្មោះក្លិប ។
នេះជាការពិន័យទ្រង់ទ្រាយធំលើកទីបីរបស់ក្លិបភ្នំពេញក្រោន ខណៈពីរលើកកន្លងមក ម្ចាស់ការពារតំណែងជើងឯកមួយនេះ មិនបានពន្យល់ហេតុផលនោះឡើយ។ យោងតាមសេចក្តីថ្លែងការណ៍ លោក ឬទ្ធី សំណាង ប្រធានក្លិប បានសម្តែងការសោកស្តាយចំពោះការពិន័យកីឡាករ និងមន្ត្រី ពីសកម្មភាពបាល់ទាត់ក្នុងរយៈពេលមិនកំណត់មួយ។
លោក ឬទ្ធី សំណាង បានគូសបញ្ជាក់យ៉ាងលំអិតថា៖ «“ខ្ញុំពិតជាសោកសៅខ្លាំងណាស់ ក្នុងការប្រកាសនៃការដាក់ពិន័យមិនមានពេលកំណត់មួយចំពោះកីឡាករ៧នាក់ និងមន្ត្រី៤នាក់ របស់ក្លឹបបាល់ទាត់ភ្នំពេញក្រោន។ ការដាក់ពិន័យនេះគឺមកពីការប្រព្រឹត្រមិនសមរម្យ និងធ្ងន់ធ្ងរចំពោះ លក្ខន្តិកៈនៃកិច្ចសន្យាការងារ ដោយមានការកំណត់លទ្ធផលបាល់ទាត់ និងបំផ្លាញកេរ្តិ៍ឈ្មោះរបស់ក្លឹបបាល់ទាត់ភ្នំពេញក្រោន ដែលការប្រព្រឹត្រទាំងនេះមានដូចជា ការលេងមិនអស់សមត្ថភាពក្នុងការប្រកួតសំខាន់ៗក្នុងរយៈពេល២ខែចុងក្រោយ មានផែនការនិងធ្វើអោយកីឡាករបរទេសសំខាន់ៗរងរបួសក្នុងកំឡុងពេលហ្វឹកហាត់ ហើយជាងនេះទៅទៀតបានប្រើប្រាស់គណនីក្លែងក្លាយក្នុងបណ្តាញសង្គម facebook ដើម្បីដាក់រឿងអវិជ្ជមាន និងបញ្ចេញមតិយោបល់បង្កជម្លោះផ្សេងៗ »។
កីឡាករ ត្រូវបានពិន័យក្នុងរយៈពេលមិនកំណត់មួយពីសកម្មភាពបាល់ទាត់រួមមាន យោគ អៈអារី, ថោង ដា, សារី ម៉ាត់ណូរ៉ូទីន, ទូច សុខហេង, ង៉យ ស្រ៊ីន, សុះ ស៊ូហាណា និងសាន ឧសភា។ រីឯមន្ត្រីរួមមានលោក ងួន ចាន់សុធា លោក ប៊ួយ ដារី លោក ស៊ឺ សីហា និង លោក ទេស សុផាត។
ប្រធានក្លិបភ្នំពេញក្រោន បានបន្ថែមនៅក្នុងសេចក្តីថ្លែងការណ៍ថា ភាពស្មោះត្រង់ និងភាពសុច្ចរិត គឺជាសសរទ្រូងនៃបាល់ទាត់អាជីព និងយើងមិនអត់ឱនដល់សកម្មភាពណា ឬហេតុផលអ្វីក៏ដោយ ដែលទាក់ទងនិងការចាត់ចែងលទ្ធផលនៃការប្រកួតបាល់ទាត់ និងធ្វើអោយមានការប៉ះពាល់ដល់លទ្ធផលនៃការប្រកួត។ បញ្ហាពុករលួយ និងការចាត់ចែងលទ្ធផលគឺជាថ្នាំពុលក្នុងវិស័យកីឡាទូទៅ និងជាពិសេសក្នុងវិស័យបាល់ទាត់។
លោកបានអះអាងថា៖«យើងចង់អោយបាល់ទាត់ត្រូវបានលេងដោយបរិយាកាស ដែលអ្នកគាំទ្រអាចជឿទុកចិត្ត ចំពោះភាពសុច្ចរិត របស់កីឡាករ និងភាពពិតប្រាកដនៃលទ្ធផល។ កីឡាករ និងមន្ត្រីដែលបានប្រព្រឹត្រល្មើស ចំពោះគោលការន៍នៃការជឿទុកចិត្ត ភាពស្មោះត្រង់ និងភាពជាអ្នកកីឡា គឺយើងពិតជាមិនអាចទទួលយកបានឡើយចំពោះការប្រព្រឹត្រនេះ។ នេះជាបញ្ហាផ្ទៃក្នុងរបស់ក្លឹបភ្នំពេញក្រោន និងមិនមានជាប់ពាក់ព័ន្ធក្លឹប កីឡាករ ឬមន្ត្រីរបស់ក្លឹបផ្សេងទៀត គឺមិនទាក់ទងក្នុងសកម្មភាពនេះឡើយ។ សកម្មភាពនេះបានធ្វើឡើងដោយមានការសហការណ៍យ៉ាងពេញលេញ និងត្រឹមត្រូវដោយអាជ្ញាធរផ្សេងៗ » ។
ថ្លែងប្រាប់សារព័ត៌មានថ្មីៗ លោក ប៊ួយ ដារី មន្ត្រីម្នាក់ដែលទទួលរងនូវការពិន័យមានគម្រោងធ្វើការបកស្រាយតបទៅនឹងការចោទប្រកាន់ទៅលើរូបលោក កីឡាករ និងមន្ត្រីដទៃទៀត៕
Tag:
បាល់ទាត់
ភ្នំពេញក្រោន
© រក្សាសិទ្ធិដោយ thmeythmey.com