សៀមរាបប្រកាសអុំទូកចុងខែវិច្ឆិកាតែមិនទាន់ដឹងពីចំនួនទូកនៅឡើយ

ជាតិ

សង្គមជាតិ

សៀមរាបប្រកាសអុំទូកចុងខែវិច្ឆិកាតែមិនទាន់ដឹងពីចំនួនទូកនៅឡើយ

09, Nov 2015 , 11:18 am

រូបភាព

ដោយ: អុីសា រ៉ហានី (Isa Rohany)

សៀមរាប៖ ខេត្តទេសចរណ៍សៀមរាប កំពុងត្រៀមដើម្បីរៀបចំពិធីបុណ្យអុំទូក ដែលនឹងចូលមកក្នុងពេលឆាប់ខាងមុខនេះ។ ការអុំទូកមានរយៈពេល២ថ្ងៃ គឺចាប់ពីថ្ងៃទី២៤ និង២៥ ខែវិច្ឆិកា នៅតាមបណ្តោយដងស្ទឹងសៀមរាប មុខព្រះរាជដំណាក់។

អភិបាលខេត្តសៀមរាប លោក ឃឹម ប៊ុនសុង បានថ្លែងប្រាប់ក្រុមអ្នកសារព័ត៌មានកាលពីពេលថ្មីៗនេះថា អាជ្ញាធរខេត្តបាននិងកំពុងរៀបចំកន្លែងមួយចំនួន ដើម្បីប្រារព្ធពិធីបុណ្យអុំទូក បណ្តែតប្រទីប អកអំបុក និងសំពះព្រខែ។ លោកបញ្ជាក់ថា ការរៀបចំនេះដើម្បីឆ្លើយតាមសេចក្តីត្រូវការរបស់ប្រជាពលរដ្ឋ និងជាពិសេសដើម្បី ថែរក្សាវប្បធម៌ ប្រពៃណីខ្មែរ ពីបុរាណមក។ លោក ឃឹម ប៊ុនសុង មានសុទិដ្ឋិនិយមថា ពិធីបុណ្យអុំទូក នឹងទាក់ទាញភ្ញៀវទេសចរជាតិ និងអន្តរជាតិជាច្រើនឲ្យមកកម្សាន្តក្នុងខេត្តមួយនេះ ខណៈដែលពិធីអុំទូក ត្រូវបានផ្អាកនៅរាជធានីភ្នំពេញ។

ទាក់ទងពិធីនេះ អភិបាលខេត្តសៀមរាប មិនទាន់អាចកំណត់ចំនួនទូក ដែលត្រូវចូលរួមក្នុងឆ្នាំនេះបាននៅឡើយទេ។ កាលពីឆ្នាំទៅ គេនៅចាំបានថា មានទូកងចំនួន៣៦ទូក ដែលបានចូលរួមអុំ ដែលក្នុងនោះមានទូកនារីចំនួន ៦ទូកផង។ សព្វថ្ងៃ អាជ្ញាធរខេត្ត កំពុងញាប់ដៃជើង ដើម្បីសម្អាតស្លែក្នុងស្ទឹងប្រវត្តិសាស្ត្រសៀមរាប ឲ្យរួចរាល់មុនថ្ងៃរៀបចំពិធីមកដល់។

គួររម្លឹកថា ក្នុងពិធីបុណ្យអុំទូកនៅឆ្នាំ២០១៤ ខេត្តសៀមរាបទទួលបានភ្ញៀវទេសចរចំនួន ១៥០,៤១០ នាក់ ដែលមានរយៈពេលពីរថ្ងៃ គឺចាប់ពីថ្ងៃទី៥ ដល់ថ្ងៃទី៦ វិច្ឆិកា។ ក្នុងចំណោមភ្ញៀវទេសចរជាង១៥ម៉ឺននាក់នេះ មានទេសចរបរទេសជាង២ម៉ឺននាក់។ នេះបើយោងតាមរបាយការណ៍ពីមន្ទីរទេសចរណ៍ខេត្តសៀមរាប។