អ្នកនយោបាយខ្មែរសាទរជ័យជម្នះបក្សលោកស្រី អ៊ុងសាន ស៊ូជី

ជាតិ

អ្នកនយោបាយខ្មែរសាទរជ័យជម្នះបក្សលោកស្រី អ៊ុងសាន ស៊ូជី

09, Nov 2015 , 9:59 pm

រូបភាព

ដោយ: រំដួល ចិត្រា (Romdoul Chetra)

អ្នកនយោបាយ និងអ្នកវិភាគសង្គមនៅកម្ពុជា ដែលបានតាមដានការបោះឆ្នោតនៅមីយ៉ាន់ម៉ាគាំទ្រការផ្លាស់ប្ដូរនៅមីយ៉ានម៉ា ខណៈគណបក្សប្រឆាំងលោកស្រី អ៊ុងសាន ស៊ូជី កំពុងទទួលបានសំឡេងគាំទ្រភ្លូកទឹកភ្លូកដី ។ ប្រធានស្ដីទីគណបក្សកាន់អំណាចលោក Ht ay oo និងប្រធានសភា មីយ៉ាន់ម៉ា និងជាអតីត ប្រធានគណបក្សសហភាពរួបរួម និង អភិវឌ្ឍ (USDP) លោក Shwe Mann បានប្រកាសពីបរាជ័យរបស់ខ្លួន ‹‹យើងចាញ់ហើយ›› ។ ចំណែកប្រព័ន្ធផ្សព្វផ្សាយអន្តរជាតិធំៗ ក៏បានផ្សព្វផ្សាយថា គណបក្សប្រឆាំងលោកស្រី អ៊ុងសាន ស៊ូជី កំពុងនាំមុខទទួលបានការគាំទ្រភ្លូកទឹកភ្លូកដី។

អ្នកនាំពាក្យគណបក្សប្រជាជនកម្ពុជា លោក សុខ ឥសាន គាំទ្រការបោះឆ្នោតដោយសេរីនិងយុត្តិធម៌នៅមីយ៉ាន់ម៉ា ។ លោក សុខ ឥសាន ក៏សាទរផងដែរ បើសិនជាគណបក្សប្រឆាំងរបស់លោកស្រី អ៊ុងសាន ស៊ូជី ទទួលបានជ័យជម្នះនៅក្នុងការបោះឆ្នោតនៅពេលនេះ។ បើទោះជាមានការគាំទ្រយ៉ាងណាក៏ដោយចុះ តែអ្នកនាំពាក្យគណបក្សប្រជាជនរូបនេះ មិនហ៊ានសន្និដ្ឋានស៊ីជម្រៅនៅឡើយទេ ចំពោះការផ្ទេរអំណាចដោយសុច្ចភាព បែបប្រជាធិបតេយ្យនេះ។«យើងអប់អរសាទរ ចំពោះលទ្ធផលនៃការបោះឆ្នោតដោយសម្ដែងដោយឆន្ទះរបស់ប្រជាពលរដ្ឋមីយ៉ាន់ម៉ា ឆ្លងតាមរយៈការបោះឆ្នោតដែលមានការត្រឹមត្រូវដោយយុត្តិធម៌ និងសេរី។ តែអ្វីដែលជាលក្ខណៈសម្បត្តិមីយ៉ានម៉ា គឺវាខុសត្រង់ថា កងទ័ពគេទុកកៅអី២៥ភាគរយសម្រាប់កងទ័ពដោយមិនបាច់បោះឆ្នោតគឺកងទ័ពជាប់ដោយស្វ័យប្រវត្តិ ដូច្នេះវាជាលក្ខណៈពិសេសមួយ… ។ តែខ្ញុំយល់ថា យើងមិនមែនជាប្រជាជនគេ ហើយយើងក៏ក្ដាប់សភាពការណ៍ប្រទេសគេមិនបាន យើងសន្និដ្ឋានគឺវាមិនល្អ»។

តំណាងរាស្ត្រគណបក្សសង្គ្រោះជាតិលោកស្រី មួ សុខហួរ ដែលតែងតែត្រូវបានគេប្រដូចទៅនឹងលោកស្រី អ៊ុងសាន ស៊ូជី នោះក៏បានសម្ដែងការគាំទ្រដែរ។ លោកស្រី សុខហួរ បានសរសសេរលើហ្វេសប៊ុកផ្ទាល់ខ្លួនថា យុត្តិធម៌បានឈ្នះហើយនៅប្រទេសភូមា។ ចំណែកលោក អេង ឆៃអ៊ាង កន្លងមកក៏ធ្លាប់បានបង្ហាញចំណាប់អារម្មណ៍ខ្លាំងទៅលើសន្ទុះនៃការគាំទ្រគណបក្សប្រឆាំងលោកស្រី អ៊ុងសាន ស៊ូជី ។លោកថា តាមរយៈយុទ្ធនាការនៃការបោះឆ្នោត ទឹកចិត្តពលរដ្ឋមីយ៉ានម៉ា នៅតែពុះកញ្ជ្រោលចង់បានការផ្លាស់ប្តូរ។ ហើយលោកជឿជាក់ថា គណបក្សប្រឆាំងរបស់លោកស្រី អ៊ុងសាន ស៊ូជី នឹងឈ្នះក្នុងការបោះឆ្នោតនេះ។

ទាំងតំណាងរាស្ត្រគណបក្សប្រឆាំងនៅកម្ពុជា លោក អេង ឆៃអ៊ាង លោកស្រី មួ សុខហួរ ទាំងអ្នកនាំពាក្យគណបក្សប្រជាជនកម្ពុជា លោក សុខ ឥសាន និងទាំងលោក មាស នី អ្នកវិភាគនយោបាយកម្ពុជា សុទ្ធតែសាទរលទ្ធផលរបស់គណបក្សប្រឆាំង លោកស្រី អ៊ុងសាន ស៊ូជី ដែលទទួលបានភ្លូកទឹកភ្លូកដីនៅពេលនេះ។

ប៉ុន្ដែលោក មាស នី លើកឡើងបន្ថែមថា ប្រទេសមីយ៉ាន់ម៉ា នឹងក្លាយជាគំរូដ៏ល្អមួយសម្រាប់កម្ពុជា បើសិនជាគណបក្សកាន់អំណាចមីយ៉ាន់ម៉ាចាញ់ឆ្នោត ហើយយល់ព្រមប្រគល់អំណាចឲ្យបក្សប្រឆាំង។ ចំណែកប្រធានាធិបតីមីយ៉ាន់ម៉ាលោក ថេន សេន ក៏អាចកសាងកេរ្ត៍ឈ្មោះខ្លួនឡើងវិញដែរ៕