កីឡាអន្តរជាតិ
អន្តរជាតិ
អ្នកគាំទ្រអង់គ្លេស ច្រៀងបទគោរពទង់ជាតិបារាំង លើកទឹកចិត្តពលរដ្ឋ និងកីឡាករបារាំង
× ក្រុមអ្នកគាំទ្រក្រុមបាល់ទាត់ជម្រើសជាតិអង់គ្លេស នឹងច្រៀងចម្រៀងបទគោរពទង់ជាតិនៃប្រទេសបារាំងរួមគ្នាដើម្បីលើកទឹកចិត្តដល់កីឡាករ និងប្រជាជនបារាំងទាំងមូល នាជំនួបមិត្តភាពរវាង ក្រុមជម្រើសជាតិបារាំង ជាមួយអង់គ្លេសនៅកីឡដ្ឋាន Wembley នាថ្ងៃអង្គារ នេះ។
បើយោងតាមសម្តីរបស់ប្រធានសហព័ន្ធកីឡាបាល់ទាត់អង់គ្លេស( FA) ក្នុងការប្រកួតនេះត្រូវបានគេរឹតបន្តឹងសន្តិសុខយ៉ាងតឹងរឹងបំផុតមិនធ្លាប់មានពីមុនមក និងដើម្បីឲ្យអ្នកគាំទ្របញ្ចេញនូវសារលើកទឹកចិត្តដល់ប្រជាជនបារាំងទាំងអស់ ក្រោយមានសោកនាដកម្មសម្លាប់រង្គាលដោយក្រុមភេរវករក្នុងទីក្រុងប៉ារីស។
បទចម្រៀងគោរពទង់ជាតិបារាំង ដែលមានចំណងជើងថា «La Marseillaise» នឹងត្រូវយកមកច្រៀងរួមគ្នាដោយអ្នកគាំទ្រនៃប្រទេសទាំងពីរក្នុងពហុកីឡដ្ឋាន Wembley។ ហើយក្រុមអ្នកគាំទ្រទាំងអស់ត្រូវបានសំណូមពរឲ្យមកកាន់កីឡដ្ឋានមុនពេលកំណត់ដើម្បីឲ្យសន្តិសុខត្រួតពិនិត្យអោយបានហ្មត់ចត់មុនចូលក្នុងទីលាន។
សំបុត្រចូលទស្សនា លើសពី ៧ម៉ឺនសន្លឹកត្រូវបានលក់អស់សម្រាប់ការប្រកួតមិត្តភាពនេះ បើទោះបីមានព័ត៌មានលេចឮថា មានជនអត្តឃាតបំពាក់ដោយគ្រាប់បែកម្នាក់ ព្យាយាមចូលទៅក្នុងកីឡដ្ឋាន Stade de France នាការប្រកួតមិត្តភាពរវាងក្រុមបាល់ទាត់ជម្រើសជាតិបារាំង ជាមួយអាល្លឺម៉ង់ ដែលត្រូវបញ្ឈប់នៅនឹងកន្លែងដោយក្រុមសន្តិសុខក៏ដោយ។
© រក្សាសិទ្ធិដោយ thmeythmey.com