កម្ពុជា-អាមេរិកផ្តើមលំហាត់សមយុទ្ធប្រចាំឆ្នាំ បង្កើនសន្តិសុខលើលំហសមុទ្រ

ជាតិ

កម្ពុជា-អាមេរិកផ្តើមលំហាត់សមយុទ្ធប្រចាំឆ្នាំ បង្កើនសន្តិសុខលើលំហសមុទ្រ

16, Nov 2015 , 9:19 pm

រូបភាព

ដោយ: ខន ចំប៉ា

ព្រះសីហនុ៖ កងទ័ពជើងទឹកសហរដ្ឋអាមេរិក និងកងទ័ពជើងទឹកកម្ពុជា បានចាប់ផ្តើមលំហាត់សមយុទ្ធប្រចាំឆ្នាំលើកទី៦ ស្តីពីហ្វឹកហ្វឺន និងសហប្រតិបត្តិការត្រៀមជាស្រេចលើផ្ទៃទឹក(CARAT)។ ពិធីបើកសមយុទ្ធបានប្រារព្ធធ្វើនៅថ្ងៃទី១៦ខែវិច្ឆិកានេះ នៅទីបញ្ជាការដ្ឋានកងនាវាជើងទឹករាម ក្នុងខេត្តព្រះសីហនុ។

លំហាត់សមយុទ្ធ CARAT រៀបចំឡើងក្នុងគោលបំណងបង្កើនកិច្ចសហប្រតិបត្តិការសន្តិសុខលើលំហសមុទ្រ។ លោក Charles William មេបញ្ជាការនៃក្រុមការងារកម្លាំងពិសេសលេខ៧៣ បានមានប្រសាសន៍ថា CARAT នឹងធ្វើឲ្យកងទ័ពជើងទឹកអាមេរិក អាចពង្រឹងទំនាក់ទំនងកាន់តែរឹងមាំជាមួយកងទ័ពជើងទឹកកម្ពុជា។

CARAT នៅកម្ពុជាសម្រាប់ឆ្នាំ២០១៥នេះ មានរយៈពេល៥ថ្ងៃ គឺចាប់ពីថ្ងៃទី ១៦ដល់ថ្ងៃទី២០ខែវិច្ឆិកា នៅកំពង់ផែ និងនៅលើសមុទ្រ។ នៅលើគោកបុគ្គលិកយោធា នឹងធ្វើការហ្វឹកហ្វឹនជាក់ស្តែង ក្នុងការកាត់បន្ថយការខូចខាត ការកំណត់ផ្លូវនាវា ការថែទាំអ្នកស្លាប់ និងរងរបួសក្នុងការប្រយុទ្ធ ទស្សនកិច្ចនិងការការពារកម្លាំង ការឡើងលើនាវា ការឆែកឆេរ និងបច្ចេកទេសចាប់នាវា។ ចំណែកនៅលើសមុទ្រ នាវាឈ្មោះ USS Fort Worth (LCS 3) ដែលមានបុគ្គលិក៧នាក់មក ពីក្រុមនាវាពិឃាត Destroyer Squadron (DESRON) និងឧទ្ធម្ភាគចក្រប្រភេទ MH-60R មួយគ្រឿង នឹងធ្វើការហ្វឹកហ្វឺនជាមួយទូកល្បាតតូចពីរគ្រឿង និងនាវាល្បាតតាមឆ្នេរមួយគ្រឿង។ ការបត់បែន និងការហាត់បាញ់កាំភ្លើងនៅលើនាវា ការឡើងលើនាវា លំហាត់រុករក និងសង្គ្រោះ ក៏មាននៅក្នុងសមយុទ្ធនេះដែរ។

ពលទាហានជើងទឹកអាមេរិកប្រមាណ២០០នាក់ និងពលទាហានជើងទឹកកម្ពុជាចប្រមាណ ៣០០នាក់ ត្រូវចូលរួមនៅក្នុង CARAT ឆ្នាំ២០១៥នៅកម្ពុជា។ នាវានៃកងទ័ពជើង ទឹកសហរដ្ឋអាមេរិកដែលចូលរួម រួមមាននាវាប្រយុទ្ធក្បែរតំបន់ឆ្នេរ ដែលមានឈ្មោះថា USS Fort Worth (LCS 3) និងនាវាដែលមានឈ្មោះថា USNS Safeguard (T-ARS 50)។ អ្នកចូលរួមដទៃទៀតរួមមានអ្នកមុជទៅក្រោមទឹកមកពីក្រុមមុជទឹកចល័ត(Mobile Dive) និងអង្គភាពជួយសង្គ្រោះ Salvage Unit (MDSU) ក្រុមទាហានប្រចាំតាមតំបន់ឆ្នេរមួយក្រុម ក្រុមទាហាន នៃកងទ័ពជើងទឹកសហរដ្ឋអាមេរិក និងក្រុមតន្ត្រីរបស់កងនាវាទី៧ នៃកងទ័ពជើងទឹកសហរដ្ឋអាមេរិក។

លោក អ៊ុក សីហា មេបញ្ជាការរងកងទ័ពជើងទឹក និងជាមេបញ្ជាការមូលដ្ឋានសមុទ្រ បានថ្លែងថា លំហាត់ CARAT លើកនេះ មិនត្រឹមតែជួយពង្រឹង សមត្ថភាព ចំណេះដឹង របស់កងទ័ពជើងទឹកប្រទេសទាំងពីរនោះទេ គឺថែមទាំងជួយពង្រឹងនូវទំនាក់ទំនងមិត្តភាព កិច្ចសហប្រតបត្តិការល្អរវាងប្រទេសទាំងពីរ និងកងទ័ពជើងទឹកទាំងពីរ ឲ្យកាន់តែរឹងមាំផងដែរ។

សូមបញ្ជាក់ថា CARAT គឺជាលំហាត់សមយុទ្ធលំហសមុទ្រទ្វេភាគីប្រចាំឆ្នាំ ដែលមានធ្វើជាបន្តបន្ទាប់ រវាងកងទ័ពជើងទឹកសហរដ្ឋអាមេរិក និងកងកម្លាំងនៃប្រទេសបង់ក្លាដេស កម្ពុជា ប្រ៊ុយណេ ឥណ្តូនេស៊ី ម៉ាឡេស៊ី ហ្វីលីពីន សឹង្ហបូរី ថៃ និងប្រទេសទីម័រខាងកើត។

ក្រុមការងារពិសេសលេខ ៧៣ និងក្រុមមកពីនាវាពិឃាតលេខ៧ បានធ្វើផែនការលំអិត និងកម្រិតខ្ពស់ ការរៀបចំធនធាន និងជួយដោយផ្ទាល់ដល់ដំណើរការសមយុទ្ធ លំហសមុទ្រ ដូចជាលំហាត់សមយុទ្ធCARAT សកម្មភាពចូលរួមនិងប្រាស្រ័យរបស់កងទ័ពជើងទឹកជាមួយ ប្រទេសវៀតណាម និងការហ្វឹកហ្វឺន និងសហប្រតិបត្តិការពហុភាគីនៅអាស៊ីអាគ្នេយ៍ (SEACAT) ជាមួយប្រទេសប្រ៊ុយណេ ឥណ្តូនេស៊ី ម៉ាឡេស៊ី ហ្វីលីពីន សឹង្ហបូរី និងប្រទេសថៃ៕