អន្តរជាតិ
នយោបាយអន្តរជាតិ
លោក ថេន សេន៖ វប្បធម៌នយោបាយថ្មី ធ្វើឲ្យមានការផ្ទេរតំណែងដោយរលូន និង ស្ថិរភាព
× ថ្វីដ្បិតការរាប់សន្លឹកឆ្នោតមីយ៉ាន់ម៉ានៅមិនទាន់បានបញ្ចប់នៅឡើយ លទ្ធផលបានបង្ហាញយ៉ាងច្បាស់ហើយថា បក្សប្រឆាំងលោកស្រីអង់សាន ស៊ូជី បានទទួលជ័យជម្នះទាំងការបង្កើតរដ្ឋាភិបាលថ្មីទៀតផង ។ ប្រធានបទបន្ទាប់ដែលគេកំពុងតែដាក់ភ្នែកមើលយ៉ាងយកចិត្តទុកដាក់នោះ គឺការផ្ទេរអំណាចរបស់រដ្ឋាភិបាលពាក់កណ្តាលយោធារបស់លោក ថេន សេន។
កាលពីថ្ងៃម្សិលមិញ ប្រធានាធិបតីជិតផុតអាណត្តិមីយ៉ាន់ម៉ាលោក ថេន សេន បានសន្យាថាលោក នឹងជជែកពីការផ្ទេរតំណែងដោយសន្តិវិធី និង ការផ្សះផ្សារជាតិជាមួយនឹងមេដឹកនាំបក្សប្រឆាំង លោកស្រី អ៊ុងសាន ស៊ូជីនៅពេលឆាប់ៗខាងមុខ។ សេចក្តីប្រកាសនេះ បានបង្ហាញពីគោលជំហយ៉ាងច្បាស់របស់ លោកថេន សេន ដ្បិតកន្លងមកមានតែអ្នកនាំពាក្យរបស់លោកនោះទេដែលហ៊ានចេញមុខអះអាងពីបញ្ហាផ្ទេរអំណាចនេះ។
ក្នុងសន្ទរកថាក្រុងរ៉ងហ្គូនលោក ថេន សេន បានសង្កត់ធ្ងន់ថារដ្ឋាភិបាលពាក់កណ្តាលស៊ីវិល បានកសាងនូវមូលដ្ឋានមួយសម្រាប់វប្បធម៌នយោបាយថ្មី។ លោក ចង់សំដៅថាទោះបីជាមានការផ្លាស់ប្តូរ នូវមេដឹកនាំថ្មី ក៏ដោយស្ថានការណ៍នៅតែអាចគ្រប់គ្រងបាន។
យោងតាមសារព័ត៌មាន Reuters លោកថេន សេន បានបញ្ជាក់យ៉ាងមុតម៉ាំថា ៖ តួនាទី នឹងត្រូវផ្ទេរ សម្រាប់រដ្ឋាភិបាលអាណត្តិបន្ទាប់ដោយប្រពន្ធ័ និងតាមពេលដែលត្រូវកំណត់។ រដ្ឋាភិបាលជិតផុត អាណត្តិអាណត្តិរូបនេះ ក៏បានធានាថា ការផ្ទេរតំណែង នឹងធ្វើឡើងដោយរលូន និងស្ថិរភាពបំផុត ដែលគ្មានអ្វីដែលត្រូវព្រួយបារម្ភបារម្ភនោះទេ។
សូមបញ្ជាក់ផងដែរថា មកទល់ពេលនេះ គណបក្សប្រឆាំងសម្ព័ន្ធជាតិដើម្បីប្រជាធិបតេយ្យ លោកស្រី អ៊ុងសាន ស៊ូជី បានទទួលសំឡេងលើសពីសំឡេងភាគច្រើនដាច់ខាតដើម្បីបង្កើតរដ្ឋាភិបាលថ្មី ពោល សំឡេងដើម្បីជ្រើសរើសប្រធានាធិបតីថ្មី។ យ៉ាងណាក៏ដោយ បញ្ហាធំសម្រាប់បក្សសម្ព័ន្ធជាតិដើម្បីប្រជាធិបតីនោះគឺ លោកស្រីស៊ូជី មិនអាចមានលទ្ធភាពឈរជាប្រធានាធិបតីបាន ហើយ មិនទាន់មាន បេក្ខភាពប្រធានាធិបតីណាផ្សេងទៀតចេញពីបក្សនេះ ត្រូវបានបង្ហាញនៅឡើយនោះទេ។
យ៉ាងណាក៏ដោយចុះ មុខមាត់ និងជោគវាសនារបស់មីយ៉ាន់ម៉ា ត្រូវបានបង្ហាញក្នុងជំហានដំបូងតាម រយៈការចូលរួមបោះឆ្នោតភ្លូកទឹកភ្លូកដីថ្ងៃទី០៨ វិច្ឆកា ដែលជាការបោះឆ្នោតប្រវត្តិសាស្ត្របែបលទ្ធិប្រជាធិបតេយ្យ រយៈពេល២៥ឆ្នាំ។ ហើយ អ្នកកំណត់ជោគវាសនា ចុងក្រោយតាមអ្វីដែលប្រជាជនមីយ៉ាន់ម៉ាចង់បាននោះ គឺស្ថិតក្រោមកណ្តាប់ដៃរបស់មេដឹកនាំនយោបាយ និងមេដឹកនាំយោធាកំពូល ពោលគឺបើនៅពេលនេះ ក្រុមយោធានៅតែចង់តោងតំណែង និងឥទ្ធិពលនៅក្នុងនយោបាយ នោះ ទាំងលទ្ធិប្រជាធិបតេយ្យ និង ទាំងការអភិវឌ្ឍន៍មីយ៉ាន់ម៉ា នឹងគ្មានពន្លឺនោះទេ៕
© រក្សាសិទ្ធិដោយ thmeythmey.com