អន្តរជាតិ
នយោបាយអន្តរជាតិ
ក្រុមភេរវជនរដ្ឋឥស្លាមទាល់ច្រកទើបបន្តគំរាមវាយអាមេរិកនិងរុស្ស៊ី?
× បន្ទាប់ពីវាយប្រហារបារាំងសម្លាប់ប្រជាជនស្លូតត្រង់អស់ជាង១០០នាក់ ក្រុមជ្រុលនិយមរដ្ឋឥស្លាមនៅស៊ីរីនិងអ៊ីរ៉ាក់បានប្រកាសសងសឹករុស្ស៊ី និងបន្ទាប់មកគំរាមវាយប្រហារអាមេរិកទៀត។ យោងតាមស្ថានភាពជាក់ស្តែង ក្រុមនេះទំនងជាទាល់ច្រកខ្លាំងមែនទែន ទើបប្រើយុទ្ធសាស្ត្របំភ័យ និងគំរាមឲ្យរដ្ឋទាំងនោះភ័យបាក់ស្បាត។
ពិភពលោកកំពុងផ្តោតអារម្មណ៍លើចលនារបស់ក្រុមភេរវជនរដ្ឋឥស្លាម ក្រោយពីក្រុមនេះចាប់ផ្តើមសកម្មភាពភេរវកម្មទ្រង់ទ្រាយធំប្រឆាំងប្រទេសមហាអំណាចធំៗ។ កាលពីប៉ុន្មានសប្តាហ៍មុនក្រុមនេះបានប្រកាសទទួលខុសត្រូវចំពោះការបាញ់ទម្លាក់យន្តហោះដឹកអ្នកដំណើររបស់រុស្ស៊ីដែលហោះចេញពីព្រលានយន្តហោះអេហ្ស៊ីប Sham el Shiek ឆ្ពោះទៅប្រទេសរុស្ស៊ី។ ក្រោយមកក្រុមនេះក៏ចាប់ផ្តើមបន្តបើកការវាយប្រហារលើទីក្រុងប៉ារីសប្រទេសបារាំងតែម្តង ដោយសម្លាប់រង្គាលមនុស្សច្រើនជាង១២០នាក់។ ក្រោយវាយប្រហារ ក្រុមជ្រុលនិយមនេះក៏បានបង្ហោះខ្សែរអាត់វីដេអូ គំរាមឲ្យបារាំងបញ្ឈប់សង្គ្រាមផ្លូវអាកាស បើសិនជាចង់រស់ក្នុងសុខសន្តិភាពថែមទៀត។
ដោយមិនអស់ចិត្ត ក្រុមនេះបន្តប្រកាសគំរាមវាយប្រហាររុស្ស៊ី និងបន្តមកដល់ម្សិលមិញនេះក៏ស្រាប់តែព្រមានអាមេរិកថា កងម្លាំងខ្លួននឹងអុកឡុកក្រុងវ៉ាស៊ីនតោនឆាប់នេះដែរ។ យុទ្ធសាស្ត្រស្នូលរបស់ក្រុមនេះគ្មានអ្វីក្រៅពីបំភ័យ បន្លាច និងធ្វើឲ្យសត្រូវបាក់ស្បាត បោះបង់ចោលសមរភូមិឡើយ។ ក្រុមនេះទទួលជោគជ័យដោយបំភិតបំភ័យប្រជាជនពិភពលោក ដោយបង្កើតវីដេអូកាត់ក ដុតសម្លាប់មនុស្សទាំងរស់ បាញ់សម្លាប់ស្រស់ៗជាដើមផង។ ហើយកន្លងមកដែរ ប្រទេសមិនតិចទេដែលចង់កម្ចាត់ភេរវជន តែស្ទាក់ស្ទើរបន្តិចផង ភ័យព្រួយបន្តិចផង ក៏សុខចិត្តដកខ្លួនវិញ។ ដូច្នេះការគំរាមរបស់ក្រុមនេះថានឹងវាយប្រហាររុស្ស៊ីនិងអាមេរិកបន្តបន្ទាប់គ្នា អាចជាយុទ្ធសាស្ត្របំភ័យ និងបំបាក់ស្បាតច្រើនជាងការពិត។
តាមពិតទៅ វាមិនស្រួលដូចនិយាយទេ ព្រោះយោងតាមស្ថានភាពជាក់ស្តែងក្រុមនេះកំពុងបន្តបាត់បង់ចំណូលដែលរកបានពីការជួញដូរប្រេង បាត់បង់ទីតាំងសំខាន់ៗ និងបាត់បង់សកម្មប្រយុទ្ធមិនតិចដែរ។ បើតាមរបាយការណ៍ក្រុងវ៉ាស៊ីនតោន ក្រុមនេះបានបាត់បង់ទឹកដីដែលខ្លួនកាន់កាប់ប្រហែល២៥ភាគរយក្នុងរយៈពេលចុងក្រោយនេះ។
ការវាយប្រហារលើបារាំង ហើយគំរាមវាយអាមេរិកនិងរុស្ស៊ីមិនខុសពីមរមាចប្រឡែងភ្លើងឡើយ ព្រោះរដ្ឋទាំងនោះជាប្រទេសមហាអំណាចមិនមែនប្រទេសតូចតាចដូចរដ្ឋអាហ្វ្រិក ឬមជ្ឈិមបូព៌ាមួយចំនួនឡើយ។ ប្រទេសទាំងនេះនឹងបង្កើនកិច្ចសហប្រតិបត្តិការ ទោះជាមិនសូវមាននិន្នាការត្រូវគ្នាប៉ុន្មានក៏ដោយ ព្រោះគេមានសត្រូវរួម។ ដូចដែលឃើញស្រាប់កាលពីថ្ងៃអាទិត្យក្រៅកិច្ចប្រជុំប្រទេស២០ លោក បារ៉ាក់ អូបាម៉ា បានជួបជជែកជាមួយលោក វ្ល៉ាឌីមៀ ពូទីន ជុំវិញបញ្ហាស៊ីរី និងពង្រឹងនិងបង្កើនការប្រឹងប្រែងកម្ចាត់ក្រុមជ្រុលនិយម។ ហើយនៅពេលឆាប់ៗខាងមុខប្រធានាធិបតីបារាំងលោក ហ្វ្រង់ស្វ័រ ហូឡង់ នឹងទៅក្រុងញូវយ៉កនិងម៉ូស្គូ ដើម្បីស្វះស្វែងរកការគាំទ្រពីលោក បារ៉ាក់ អូបាម៉ា និងលោក វ្ល៉ាឌីមៀ ពូទីន ជុំវិញការរួមកម្លាំងគ្នាយកឈ្នះលើភេរវកម្មជ្រុលនិយម។ បណ្តារដ្ឋមហាអំណាចនិងរដ្ឋអឺរ៉ុប កំពុងព្យាយាមបង្កើតយុទ្ធសាស្ត្រថ្មី ដោយដោះស្រាយវិបត្តិស៊ីរី បន្តកាត់ផ្តាច់ចំណូលក្រុមនេះ បង្កើនការសហការចែករំលែករបាយការណ៍ចារកម្មនិងរឹតបន្តឹងសន្តិសុខតំបន់ទប់ស្កាត់ការលួចឆ្លងដែនរបស់បណ្តាជនបរទេសទៅធ្វើសង្គ្រាមនៅមជ្ឈិមបូព៌ាផង៕
© រក្សាសិទ្ធិដោយ thmeythmey.com