ជាតិ
នយោបាយជាតិ
លោក ហោ ណាំហុង ប្រាប់អង្គទូតថាក្ដីក្ដាំរវាងលោក និងលោក សម រង្ស៊ី ជារឿងបុគ្គល
×
រដ្ឋមន្ត្រីក្រសួងការបរទេសកម្ពុជា លោក ហោ ណាំហុង បានហៅប្រមុខការទូតប្រចាំកម្ពុជា និងការិយាល័យតំណាងអង្គការសហប្រជាជាតិប្រចាំកម្ពុជា មកពន្យល់ប្រាប់ពីបញ្ហានយោបាយនៅកម្ពុជា ពាក់ព័ន្ធនឹងដីកាចាប់ខ្លួនលោក សម រង្ស៊ី។ លោក ហោ ណាំហុង ក៏បានលើកយកបញ្ហាអំពីហិង្សាលើតំណាងរាស្ត្រគណបក្សសង្គ្រោះជាតិ និងការដកលោក កឹម សុខា ចេញពីតួនាទីអនុប្រធានរដ្ឋសភា ទៅប្រាប់អង្គទូតដែរ។
នៅចំពោះមុខប្រមុខការទូតជាង២០ប្រចាំកម្ពុជានោះលោក ហោ ណាំហុង បានផ្ដោតសំខាន់លើបញ្ហាក្ដីក្ដាំរវាងលោក និងលោក សម រង្ស៊ី ទៅពន្យល់ប្រាប់ប្រធានបេសកម្មការទូតថា បញ្ហាក្ដីក្ដាំនេះគឺជារឿងបុគ្គល មិនមានជាប់ពាក់ព័ន្ធនិងបញ្ហានយោបាយរវាងគណបក្សប្រជាជន និងគណបក្សសង្គ្រោះជាតិនោះទេ។ លោក ហោ ណាំហុង បានបញ្ជាក់ប្រាប់អង្គទូតទៀតថា លោកបានឈ្នះលើបញ្ហាក្ដីក្ដាំងជាមួយលោក សម រង្ស៊ី ចំនួន៣ដងហើយនៅប្រទេសបារាំង។
ថ្លែងចំពោះមុខអ្នកសារព័ត៌មាន រដ្ឋមន្ត្រីក្រសួងការបរទេសរូបនេះ បានបញ្ជាក់យ៉ាងណាដូច្នេះថា៖«ខ្ញុំបានជម្រាបអង្គទូតថា មិនមែនជាទំនាស់រវាងគណបក្សនិងគណបក្សទេ។ មិនមែនបញ្ហានយោបាយទេ ជាបញ្ហាឯកឧត្តម សម រង្ស៊ី ចំពោះខ្ញុំ…។ដូច្នេះការចេញដីកាតាមការសុំរបស់មេធាវីខ្ញុំនេះ មិនមានការបង្គាប់ពីខ្ញុំ ឬក៏មិនមានការញុះញង់ ឬក៏ណែនាំពីអ្នកណាទាំងអស់។ទាំងខ្ញុំ ទាំងលោកនាយករដ្ឋមន្ត្រី ហ៊ុន សែន យើងអត់ដឹងសោះ អំពីអ្វីដែលមេធាវីខ្ញុំបានធ្វើ ដូច្នេះអត់មានការគាបសង្កត់នយោបាយ អត់មានការជ្រៀតជ្រែកពីខាងគណបក្សទេ»។នេះជាការបញ្ជាក់របស់លោក ហោ ណាំងហុង ដែលបានបន្ដប្រាប់អង្គទូតទៀតថា លោក សម រង្ស៊ី តែងតែបរិហាកេរ្ត៍ទៅលើមនុស្សគ្រប់គ្នា ដោយពុំដែលទទួលខុសត្រូវពាក្យសំដីរបស់ខ្លួនក្នុងការចោទប្រកាន់គេនោះឡើយ។
លោក សម រង្ស៊ី ប្រធានគណបក្សសង្គ្រោះជាតិ ត្រូវបានរដ្ឋសភាប្រកាសបាត់បង់ទាំងស្រុងនូវសិទ្ធិ បុព្វសិទ្ធិ និងសមាជិកភាពជាសមាជិករដ្ឋសភា មណ្ឌលខេត្តកំពង់ចាម នីតិកាលទី៥ តាមមាត្រាទី១៤ នៃច្បាប់ស្ដីពីលក្ខតិកៈតំណាងរាស្ត្រ៕
© រក្សាសិទ្ធិដោយ thmeythmey.com