អន្តរជាតិ
នយោបាយអន្តរជាតិ
មេដវ៉េដេវ៖ អាមេរិករួមចំណែកធ្វើឲ្យក្រុមភេរវជនរដ្ឋឥស្លាមកាន់តែរឹងមាំ
×![]()
នាយករដ្ឋមន្ត្រីរុស្ស៊ីលោក ឌីមីទ្រី មេដវ៉េដេវ បានលើកឡើងម្សិលមិញក្រៅកិច្ចប្រជុំនៅអាស៊ីបូព៌ានៅម៉ាឡេស៊ី ថា សហរដ្ឋអាមេរិករួមចំណែកទទួលខុសត្រូវក្នុងការធ្វើឲ្យក្រុមភេរវជនរដ្ឋឥស្លាមកើនឡើងឥទ្ធិពល។ មេដឹកនាំរូបនេះអំពាវនាវឲ្យសហរដ្ឋអាមេរិកនិងសម្ព័ន្ធមិត្តឈប់បង្កអស្ថិរភាពនៅស៊ីរី ហើយត្រលប់មក គាំទ្ររដ្ឋាភិបាលស្របច្បាប់នៅស៊ីរី បើសិនអាមេរិកចង់កម្ចាត់ភេរវជនពិតមែននោះ។ 
លោក សៅ ផលនិស្ស័យ លម្អិតព័ត៌មាននេះ
លោក សៅ ផលនិស្ស័យ លម្អិតព័ត៌មាននេះ
ប្រមុខរដ្ឋាភិបាលរុស្ស៊ីលោក ឌីមីទ្រី មេដវ៉េដេវ បានរិះគន់រដ្ឋាភិបាលក្រុងវ៉ាស៊ីនតោននៅមុខអ្នកសារព័ត៌មាននៅទីក្រុងកូឡាឡាំពួ ចំពោះការបណ្តែតបណ្តោយឲ្យក្រុមភេរវជនរដ្ឋឥស្លាមនៅស៊ីរីនិងអ៊ីរ៉ាក់កាន់តែខ្លាំងឡើង។ លោក បានលើកឡើងកំហុសឆ្គងនៃការបង្កើត នយោបាយប៉ងទម្លាក់ មេដឹកនាំស្របច្បាប់នៅស៊ីរី ដោយគាំទ្រក្រុមឧទ្ទាម ហើយលោក ជឿជាក់ រដ្ឋាភិបាលស៊ីរីបច្ចុប្បន្នមានសមត្ថភាពក្នុងការបង្រួបបង្រួមជាតិដើម្បីកម្ចាត់ភេរវជន។
លោកថា ការពង្រឹងកម្លាំងរបស់ក្រុមភេរវជនរដ្ឋឥស្លាម អាចធ្វើទៅបានដោយសារតែគោលនយោបាយគ្មានការទទួលខុសត្រូវរបស់ក្រុងវ៉ាស៊ីនតោន។ ជំនួសលើការប្រមូលកម្លាំងប្រឆាំងក្រុមភេរវជន សហរដ្ឋអាមេរិកនិងសម្ព័ន្ធមិត្តបែរជាសម្រេចចិត្ត ប្រឆាំងប្រធានាធិបតីដែលឡើងកាន់តំណែងតាមការបោះឆ្នោតដោយស្របច្បាប់នៅស៊ីរីទៅវិញ។ លោកបានរំលឹកផងដែរពីកំហុសឆ្គងរបស់ក្រុងវ៉ាស៊ីនតោនកាលដែលបានរួមចំណែកជួយដល់ការកើនឡើងនៃឥទ្ធិពលរបស់ក្រុមភេរវជនអាល់កៃដា រហូតដល់កើតមានថ្ងៃ ១១ ខែកញ្ញាឆ្នាំ ២០០១ ។
ក្រៅពីវាយប្រហារអាមេរិក នាយករដ្ឋមន្ត្រីរុស្ស៊ី បានអំពាវនាវទៅកាន់បណ្តាប្រទេសទាំងអស់ឲ្យចូលរួមសាមគ្គីគ្នាដើម្បីកម្ចាត់សត្រូវរួមគឺក្រុមភេរវជនរដ្ឋឥស្លាម។ ហើយលោកបានដាស់តឿនដល់ប្រទេសមហាអំណាចឯទៀតផងដែរ ជុំវិញការបន្តមាននិន្នាការបែងចែក «រវាងពួកយើងនិង ពួកគេ» ។ តាមពិតទៅ លោក មេដវ៉េដេវ លើកឡើងដូច្នេះ ដើម្បីវាយបកការរិះគន់របស់ប្រធានាធិបតីអាមេរិក លោក បារ៉ាក់ អូបាម៉ា ចំពោះសកម្មភាពនិងតួនាទីរុស្ស៊ីនៅក្នុងជម្លោះប្រទេសស៊ីរីកន្លងមក។ លោក អូបាម៉ា បានបញ្ចើចបញ្ចើររុស្ស៊ីដែលបន្តគាំទ្ររដ្ឋាភិបាលផ្តាច់ការរបស់លោក អាសាដ ហើយយកលែសកម្ចាត់ក្រុម ក្រុមភេរវជនដើម្បីសំពោងក្រុមឧទ្ទាមប្រឆាំងរដ្ឋាភិបាល ដែលអាមេរិកកំពុងគាំទ្រនោះ។ ប្រធានាធិបតីអាមេរិកខាងលើ ក៏បានវាយតម្លៃផងដែរថារុស្ស៊ីប្រហែលជាប្តូរជំហររបស់ខ្លួនក្នុងការកម្ចាត់ក្រុមភេរវជន ក្រោយពេលយន្តហោះរុស្ស៊ីធ្លាក់នៅអេហ្ស៊ីបនោះ។
កន្លងមក បេក្ខជនប្រធានាធិបតីបក្សប្រជាធិបតេយ្យលោកស្រី ហ៊ីឡារី គ្លីនតុន ក៏បានលើកឡើងស្រដៀងគ្នាដែរ ដោយលោកស្រី ស្នើទៅរដ្ឋាភិបាលលោក អូបាម៉ា ឲ្យបញ្ឈប់ការប៉ុនប៉ងទម្លាក់លោក អាសាដ ពីតំណែង។ លោកស្រីថា រដ្ឋាភិបាលអាមេរិកគួរត្រលប់មកបង្កើនយុទ្ធសាស្ត្រកម្ចាត់ភេរវជនវិញ ព្រោះការទម្លាក់លោក អាសាដ មិនមែនជាដំណោះស្រាយបញ្ចប់បញ្ហាឡើយ។
សូមរំលឹកបន្តិចដែរថា ស៊ីរីបានធ្លាក់ខ្លួនចូលក្នុងសង្គ្រាមតាំងពីឆ្នាំ ២០១១ ដោយរដ្ឋាភិបាលក្រុងដាម៉ាសនេះ បន្តប្រឈមមុខនឹងការប្រយុទ្ធជាមួយក្រុមឧទ្ទាម និងបណ្តាភេរវជនជ្រុលនិយមក្រុមដូចជា ក្រុមរដ្ឋឥស្លាមនេះ។ តាំងពីដើមមក សហរដ្ឋអាមេរិកនិងសម្ព័ន្ធមិត្តអឺរ៉ុប មិនបានយល់ឃើញដូចរុស្ស៊ីឡើយ ព្រោះពួកគេយល់ថា មានតែការចុះចេញពីតំណែងរបស់ អាសាដ ប៉ុណ្ណោះទើបអាចមានដំណោះស្រាយនយោបាយនិងអាចយកឈ្នះលើក្រុមភេរវជនបាន៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 1 សប្តាហ៍
