អន្តរជាតិ
អាមេរិក-ចិន យកវេទិកាអាស៊ីបូព៌ាឌឺដងគ្នា តែអាស៊ាន ក្លាយជាជនរងគ្រោះ
× ដូចសព្វមួយដង បញ្ហាសមុទ្រចិនខាងត្បូងតែងតែក្លាយជារបៀបវារៈ និង ប្រធានក្តៅក្នុងកិច្ចប្រជុំកំពូល អាស៊ាន និងកិច្ចប្រជុំកំពូលអាស៊ីបូព៌ាប្រចាំឆ្នាំ។ ជាពិសេសនាកិច្ចប្រជុំឆ្នាំនេះដែលម៉ាឡេស៊ីជាម្ចាស់ផ្ទះ ទោះបីជាបញ្ហាភេរកម្ម ស្ទើរតែគ្របដណ្តប់កិច្ចប្រជុំទាំងមូលក៏ដោយ អាមេរិក និងចិននៅតែឆ្លៀតយកឱកាសនេះដើម្បីវាយប្រហារគ្នាទៅវិញទៅមក។ អាមេរិក ទាមទារឲ្យរដ្ឋពាក់ព័ន្ធទាំងអស់បញ្ឈប់ សកម្មភាពនៅក្នុងតំបន់ជម្លោះ ខណៈចិន ភាគីតែមួយ គត់ដែលទាមទារស្ទើរតែតំបន់ជម្លោះទាំងស្រុង ថាខ្លួននឹងបន្តសកម្មភាពជាលក្ខណៈឯកតោភាគី។
សូមស្ដាប់ព័ត៌មានលម្អិត៖
កាលពីថ្ងៃអាទិត្យទី២២ ខែវិច្ឆិកា ក្រុងប៉េកាំង បានវាយប្រហារ ពាក្យសម្តីយ៉ាងខ្លាំងៗទៅរដ្ឋាភិបាលក្រុងវ៉ាស៊ិនតោន ដោយបានចោទអាមេរិក ថា កំពុងតែបង្ករឿង និងញុះញង់ផ្នែកនយោបាយតាមរយៈការបញ្ជូននាវាមកកាន់តំបន់ជម្លោះយុទ្ធសាស្ត្រសមុទ្រចិនខាងត្បូង។ ការលើកឡើងនេះ ធ្វើឡើងក្នុងកិច្ចប្រជុំកំពូលអាស៊ីបូព៌ា ដែលមានតំណាងរដ្ឋទាំង១៨រូបចូលរួមក្នុងរាជធានីគួឡាឡាំពួរ នៃប្រទេសម៉ាឡេស៊ី។
យោងតាមសារព័ត៌មាន ABS-CBN លោក អនុរដ្ឋមន្ត្រីការបរទេសចិន Liu Zhenmin អះអាងថា ចិន នឹងបន្តបំពាក់មូលដ្ឋានយោធានៅក្នុងតំបន់កោះសិប្បនិម្មិតដែលខ្លួនកំពុងតែសាងសង់នៅក្នុងតំបន់ជ ម្លោះសមុទ្រចិនខាងត្បូង។ លោក បានបន្ថែមទៀតថា សកម្មភាពនេះ គឺជាការការពារដែនកោះរបស់ចិននោះទេ។
ក្នុងឱកាសនេះដែរ លោក Liu Zhenmin ក៏បានរិះគន់ចំពោះសកម្មភាពចុងក្រោយរបស់រដ្ឋាភិបាលអាមេរិកក្នុងការបញ្ជូននាវាល្បាតមកកាន់តំបន់ជម្លោះក្រោមរូបភាពនៃសេរីភាពនៃចរាចរណ៍ដែនសមុទ្រ គឺបានធ្វើហួសពីដែនកំណត់។ លោក Liu Zhenmin បានចាត់ទុកសកម្មភាពនោះ ថាគឺជាការញុះញង់ផ្នែកនយោបាយ និងមានបំណងតេស្តឲ្យចិនឆ្លើយតបវិញ។ ក្នុងន័យនេះមានន័យថា បើចិន ហ៊ានបញ្ជូននាវាចម្បាំងដើម្បីឆ្លើយតបនឹងនាវាអាមេរិកនោះ ចិន នឹងត្រូវបានខាតប្រយោជន៍ និង បាត់បង់កេរ្តិ៍ឈ្មោះក្នុងការអនុវត្តច្បាប់អន្តរជាតិតាមរយៈការសាកល្បងនេះ។
តាមពិតទៅ ការឌឺដងរបស់ចិនទៅកាន់អាមេរិក កើតឡើងបន្ទាប់ពីប្រធានាធិបតីសហរដ្ឋអាមេរិក លោក បារ៉ាក់ អូបាម៉ា បានប្រាប់ទៅកាន់មេដឹកនាំអាស៊ានកាលពីថ្ងៃទី២១ វិច្ឆិកា ក្នុងជំនួបកំពូលអាមេរិក និង អាស៊ាន។ លោក អូបាម៉ា ថា ដើម្បីរក្សាស្ថិរភាពក្នុងតំបន់ រដ្ឋពាក់ព័ន្ធនៃជម្លោះសមុទ្រចិន ខាងត្បូងទាំងអស់ គួរតែបញ្ឈប់សកម្មភាពវាតទី សាងសង់ និង បំពាក់ឧបករណ៍យោធានៅក្នុងតំបន់ ជម្លោះដែលចង់សំដៅទៅលើសកម្មភាពរបស់ចិននោះឯង។
អ្វីដែលគួរកត់សម្គាល់នោះ កាលពីចុងខែតុលា និង ដើមវិច្ឆិកា កន្លងទៅ អាមេរិក បានបញ្ជូននាវា ល្បាត និង យន្តហោះទម្លាក់គ្រាប់ដោយជោគជ័យទៅកាន់តំបន់ជម្លោះសមុទ្រចិនខាងត្បូងដែលស្ថិត នៅមិនឆ្ងាយពីដែនកោះសិប្បនិមិ្មតរបស់ចិនប៉ុន្មាននោះទេ។ វត្តមានយោធាអាមេរិក ទាំងដែនអាកាស និង ដែនសមុទ្រ ត្រូវបានក្រុងវ៉ាស៊ិនតោនចាត់ទុកថា ជាការអនុវត្តស្របច្បាប់អន្តរជាតិ។ តែ អ្វីដែលគួរឲ្យព្រួយបារម្ភនោះ អាមេរិក ថាខ្លួននឹងបញ្ជូននាវាចម្បាំងមកកាន់តំបន់ជម្លោះរៀងរាល់ត្រីមាសម្តង ខណៈ ចិនបានព្រមានថា នឹងមានការប៉ះទង្គិចគ្នានៅក្នុងដែនសមុទ្របើអាមេរិក នៅតែបន្តធ្វើសកម្ម ភាពដដែលនៅក្នុងតំបន់ជម្លោះ។
សូមបញ្ជាក់ផងដែរថា ជម្លោះសមុទ្រចិនខាងត្បូង គឺជាជម្លោះដែនអធិបតេយ្យរវាងរដ្ឋអាស៊ានបួន ដូចជាព្រុយណេ ម៉ាឡេស៊ី ហ្វីលីពីន និង វៀតណាម ជាមួយនឹងចិន។ ជម្លោះនេះ ហាក់ដូចជា មិនសូវមានការប្រឈមមុខគ្នារវាងរដ្ឋអាស៊ាននិងចិននោះទេ តែ វាបែរក្លាយជាជម្លោះ និងការប្រឈមមុខខ្លាំងរវាងអាមេរិកនិងចិនទៅវិញ។ យ៉ាងណាក៏ដោយ បើការប្រឈមមុខគ្នារវាងអាមេរិកនិងចិន កាន់តែខ្លាំង ដូចចិន បានបញ្ជាក់ថាខ្លួននឹងបន្តសកម្មភាពនៅតំបន់ជម្លោះ ខណៈអាមេរិក ក៏ថាខ្លួននឹងបញ្ជូននាវាចម្បាំងមកកាន់តំបន់ជម្លោះផងដែរ នោះ អ្នករងគ្រោះពិតប្រាកដគឺជារដ្ឋអាស៊ាននោះទេ។ ជាពិសេសនោះ ការប្រឈមមុខគ្នារវាងមហាអំណាចទាំងពីរ នឹងក្លាយជាការគំរាមកំហែងសន្តិសុខ និងស្ថិរភាពក្នុងតំបន់៕
© រក្សាសិទ្ធិដោយ thmeythmey.com