ពីនេះ ពីនោះ
×![]()
ដោយ: ថ្មីៗ
ភ្នំពេញ៖ សង្គមមានការវិវត្តិពីមួយសម័យកាលទៅមួយសម័យកាល។ ចំណែកភាពរីកចម្រើន រុងរឿង និងអន់ថយនៃសង្គមមួយ វាអាស្រ័យទៅលើការរីកចម្រើននៃចំណេះដឹងរបស់មនុស្ស ក្នុងការកែប្រែនិងផ្លាស់ប្ដូរសង្គម។ ថែមពីលើការវិវត្តិនៃវិចារណញ្ញាណរបស់មនុស្ស ដែលនាំឲ្យសង្គមមានការរីកចម្រើន ភាពឆ្លាត់វៃរបស់មនុស្សក៏ចាប់ផ្ដើមធ្វើឲ្យមនុស្សមានគំនិតការពារទ្រព្យសម្បត្តិឯកជន និងចង់បានជារបស់ខ្លួន ចង់មានកេរ្តិ៍ឈ្មោះ កិត្តិយស អំណាចដើម្បីគ្រប់គ្រង និងបញ្ជាទៅលើអ្នកដទៃដែលនាំទៅកម្លាត់នៃសេដ្ឋកិច្ច និងបង្កើតបានជាវណ្ណៈមនុស្សនៅក្នុងសង្គម។
នៅសម័យបុព្វកាលមនុស្សរស់នៅតាមសភាពធម្មជាតិ ចិញ្ចឹមជីវិតតាមសភាពធម្មជាតិ រស់នៅក្នុងសង្គមមនុស្សដែលមិនស្គាល់អ្វីជាទ្រព្យសម្បត្តិឯកជន។ ប៉ុន្តែនៅពេលមានការវិវត្តិផ្នែកគំនិតការប្រើប្រាស់កម្លាំងដើម្បីគាប់សង្គត់អ្នកដ៏ទៃក៏កើតមានឡើង។ អ្នកទន់ខ្សោយត្រូវបានគេយកមកធ្វើជាទាសក ហើយពួកគេត្រូវតែធ្វើការងារដោយគ្មានប្រាក់កម្រៃ។ ដែលនាំសង្គមនោះស្ថិតនៅក្នុងរបបសង្គមមួយហៅថារបបទាសភាព។ បញ្ហានេះចេះតែកើតឡើងរហូតដល់ឈានទៅរកសង្គមមួយដែលមានទម្រង់នៃការគ្រប់គ្រងបែបរបបសក្ដិភូមិដែលមានការជិៈជាន់ និងបង្ករជាវណ្ណៈសង្គម។ ក្រោយមកបញ្ហាមូលធននិយមបក្សពួកគឺជាបញ្ហាកម្រិតប្រទេសជាតិ ព្រោះប្រព័ន្ធសេដ្ឋកិច្ចរបស់ប្រទេសជាតិត្រូវបានទន្ទ្រានឈ្លានពានកាន់កាប់ដោយរបបមូលធននិយមបក្សពួកនេះ។ មូលធននិយមបក្សពួកមកពីពាក្យថា របបបក្សពួកនិយម និង របបមូលធននិយម រួមចូលគ្នាបានជា របបមូលធននិយមបក្សពួក ដែលក្រុមនេះបានបង្ករឲ្យមានការសង្គត់សង្កិនជិះជាន់លើក្រុមកម្មករ និងអ្នកដែលមានជីវភាពក្រីក្រ គ្មានអំណាច គ្មានបុណ្យសក្តិ ។
នៅក្នុងរបបមូលធននិយមធ្វើឲ្យ ម៉ាក្ស មើលឃើញថា ជាបរិបទសង្គមមួយដែលពោរពេញទៅដោយភាពអយុត្តិធម៌ចំពោះអ្នកដែលមានវណ្ណៈតូចទាប និងកម្មករ កសិករ អ្នកផលិត និងក្រុមមនុស្សដែលមានស្ថានភាពសង្គមរស់នៅក្រីក្រដែលត្រូវរងការកេងប្រវ័ញ្ចកម្លាំងពលកម្ម និងការវាយតំលើរាងកាយជាដើម។ កត្តានេះដែលនាំឲ្យម៉ាក្សយល់ឃើញថា មានតែសង្គមមួយដែលប្រកាន់យកលទ្ធិកុម្មុយនីស្ដទេ ទើបអាចរកយុត្តិធម៌ជូនអ្នករងគ្រោះទាំងនោះបាន។
ម៉ាក្ស បានលើកឡើងថា លទ្ធិកុម្មុយនីស្ដ គឺជាលទ្ធិមួយដែលគ្មានការកំណត់ព្រំដែន គ្មានវណ្ណៈ គ្មានរដ្ឋាភិបាល អត់មានសាសនា។ មនុស្ស រស់នៅដោយស្មើភាពគ្នាក្នុងនាមជាមនុស្សដូចគ្នា គ្មានអ្នកមាន គ្មានអ្នកក្រ គ្មានថៅកែគ្មានកូនចៅ គ្មានទេស្ថាប័នគ្រប់គ្រងរដ្ឋាភិបាល។ ហើយក៏គ្មានផងដែរជំនឿសាសនា ព្រោះសាសនាគឺជាអាភៀនរបស់ប្រជាជន។ ដែលអ្នកជឿសាសនាញៀន ដូចជាការញៀនអាភៀនដូច្នេះដែរ។ ហើយចំណែកប្រភពដែលនាំឲ្យមានការបែងចែកនាំឲ្យមានរូបភាពទាំងនោះកើតឡើង គឺមកពីកត្តាសេដ្ឋកិច្ច ដែលនាំឲ្យមនុស្សមានការបែងចែកវណ្ណៈ។ ហើយលោកគិតថា មានតែលុបបំបាត់រូបភាពទាំងនេះទេទើបអាចធ្វើឲ្យមនុស្សរស់នៅស្មើភាព និងមានសេរីភាពពេញលេញក្នុងការសម្រេចចិត្តផ្ទាល់ខ្លួន។
ជារួមទិសដៅរបស់លោក កាល់ ម៉ាក្ស ដើម្បីឲ្យសង្គមមួយដែលចង់ឲ្យមនុស្សរស់នៅស្មើភាពក្នុងនាមជាមនុស្ស ហើយប្រកាន់យកគំនិតគ្រប់គ្រងសង្គមតាមបែបលទ្ធិកុម្មុយនីស្ត គឺជាចេតនាល្អមួយ។ ក៏ប៉ុន្តែនៅក្នុងការអនុវត្តជាក់ស្ដែងនៅក្នុងសង្គម លទ្ធិនេះពិតជាបង្ករឲ្យសង្គមកាន់តែមានបញ្ហា។ ព្រោះថានៅក្នុងសង្គមវារមែងតែងតែមានអ្នកមាននិងអ្នកក្រ ព្រោះតែការខិតខំប្រឹងប្រែងដើម្បីអភិវឌ្ឍន៍ផ្ទាល់ខ្លួនគេ វណ្ណៈសង្គមមនុស្សតែងតែមានមិនអាចលុបបំបាត់បាន វាអាស្រ័យលើកម្រិតជីវភាព និងតួនាទីមនុស្សនៅក្នុងសង្គម ហើយនិងរដ្ឋាភិបាលគ្រប់គ្រង និងរៀបចំសង្គមជាដើម។ សាសនាមិនអាចលុបបំបាត់បានព្រោះមានសាសនាអាចចូលរួមយ៉ាងសំខាន់ក្នុងការអប់រំស្មារតី។ រហូតទ្រឹស្ដីរបស់លោកមួយនេះមានឥទ្ធិពលដល់ប្រទេស មួយចំនួននៅក្នុងសកលលោកហើយប្រកាន់យកលទ្ធិនេះមកអនុវត្តន៍យ៉ាងធ្ងន់ធ្ងរ កាន់តែមានការផ្ទុយពីអ្វីជាចេតនានៃទ្រឹស្ដីរបស់ម៉ាក្ស៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 3 ថ្ងៃ
