ជាតិ
រដ្ឋាភិបាលនឹងដំឡើងប្រាក់បៀវត្សមន្ត្រីរាជការនិងឈប់យកពន្ធយានយន្តមួយចំនួន
× នៅព្រឹកនេះ រដ្ឋសភាជាតិ កំពុងតែពិភាក្សា និងអនុម័តសេចក្តីព្រាងច្បាប់ស្តីហិរញ្ញវត្ថុសម្រាប់ការគ្រប់គ្រងឆ្នាំ ២០១៦ ។ នៅក្នុងសេចក្តីព្រាងច្បាប់ ដែលរដ្ឋសភា កំពុងពិភាក្សានិងអនុម័តនេះ បានចែងពីការដំឡើងប្រាក់ខែដល់មន្ត្រីរាជការ និងលុបចោលនូវពន្ធលើមធ្យោបាយធ្វើដំណើរផងដែរ។
ឆ្លៀតពេលដែលកំពុងចូលរួមប្រជុំរដសភានៅព្រឹកនេះលោកនាយករដ្ឋមន្ត្រី ហ៊ុន សែន បានបញ្ជាក់សារជាថ្មីថា សេចក្តីព្រាងច្បាប់ស្តីហិរញ្ញវត្ថុសម្រាប់ការគ្រប់គ្រងឆ្នាំ ២០១៦ ដែលរដ្ឋសភា កំពុងពិភាក្សានិងអនុម័ត បានកំណត់ពីការដំឡើងប្រាក់ខែដល់មន្ត្រីរាជការ កងកម្លាំងប្រដាប់អាវុធ មន្ត្រីជាប់កិច្ចសន្យា និងនិវត្តន៍ជនផងដែរ។ លើសពីនេះទៀត លោក ហ៊ុន សែន បានសរសេរនៅលើទំព័រហ្វេសប៊ុកផ្ទាល់ខ្លួនទៀតថា សេចក្តីព្រាងច្បាប់ដដែលនេះ ក៏នឹងលុបចោលពន្ធលើមធ្យោបាយដឹកជញ្ជូននិងយានជំនិះមួយចំនួន ដូចជាទោចក្រយានយន្ត ត្រីចក្រយានយន្ត ត្រាក់ទ័រ គោយន្ត និងជល់យានតូចៗ ដើម្បីជួយកាត់បន្ថយការចំណាយនឹងលើកកំពស់ជីវភាពប្រជាជន។
ប្រមុខរដ្ឋាភិបាលរូបនេះ លើកឡើងទៀតថា សេចក្តីព្រាងច្បាប់ខាងលើ ក៏បានកំណត់ពីការលុបចោលផងដែរ នូវពន្ធតាមរបបមៅការដើម្បីសម្រួលដល់អាជីវករតូចតាចដែរ។ លោកនាយរដ្ឋមន្ត្រី សង្ឃឹមថា នៅព្រឹកនេះរដ្ឋសភានឹងអនុម័តសេចក្តីព្រាងច្បាប់នេះ។
ជាការកត់សម្គាល់នៅក្នុងកិច្ចប្រជុំរដ្ឋសភាពិភាក្សានិងអនុម័តស្តីសេចក្តីព្រាងច្បាប់ស្តីពី ហិរញ្ញវត្ថុសម្រាប់គ្រប់គ្រងឆ្នាំ ២០១៦ និងសេចក្តីព្រាងច្បាប់សំខាន់ចំនួន ២ ទៀតនៅព្រឹកនេះ មិនមានវត្តមានតំណាងរាស្ត្ររបស់គណបក្សសង្គ្រោះជាតិនោះឡើយ។ លោក អេង ឆៃអ៊ាង តំណាងរាស្ត្រគណបក្សសង្គ្រោះជាតិ បានប្រៀបប្រដូចកិច្ចប្រជុំដែលគ្មានវត្តមានតំណាងរាស្ត្រគណបក្សប្រឆាំងដូច្នេះថា៖«ប្រៀបដូចសម្លដែលមានតែទឹក និង ត្រី គ្មានអំបិល បន្លែនិងគ្រឿងផ្សំដទៃទៀត»៕
© រក្សាសិទ្ធិដោយ thmeythmey.com