លោក ហេង សំរិន បន្តលើកឡើងថា គ្មាន ២ ធ្នូនិង ៧ មករា គ្មានសមិទ្ធផលបច្ចុប្បន្ន

ជាតិ

សង្គមជាតិ

លោក ហេង សំរិន បន្តលើកឡើងថា គ្មាន ២ ធ្នូនិង ៧ មករា គ្មានសមិទ្ធផលបច្ចុប្បន្ន

02, Dec 2015 , 10:59 am

រូបភាព

ដោយ:

ភ្នំពេញ៖ មិនខុសគ្នាពីឆ្នាំមុនៗឡើយ លោក ហេង សំរិន នៅបន្តលើកតម្កើងថ្ងៃកំណើតរណសិរ្ស ២ធ្នូ ឆ្នាំ១៩៧៨ និងជ័យជំនះ ៧មករា ឆ្នាំ១៩៧៩ នៅក្នុងមីទ្ទិញសាទរខួបលើកទី ៣៧ នៅថ្ងៃទី២ ធ្នូ ឆ្នាំ២០១៥នេះ។

លោក ហេង សំរិន ប្រធានកិត្តិយស គណបក្សប្រជាជនកម្ពុជា ថ្លែងលើកតម្កើងថ្ងៃ២ធ្នូ និងថ្ងៃ៧មករា យ៉ាងដូច្នេះថា៖«មហាជ័យជំនះ ៧មករា ឆ្នាំ១៩៧៩ បានបញ្ចប់នូវសម័យកាលដ៏ខ្មៅងងឹតបំផុត។ ប្រជាជនកម្ពុជាយើងក៏បានទទួល មកវិញនូវសិទ្ធិសេរីភាព និងឱកាស ដើម្បីស្តារ និងកសាងមាតុភូមិរបស់ខ្លួនឡើងវិញ។ ប្រជាជនយើងគ្រប់រូប សុទ្ធតែយល់ច្បាស់ថា បើគ្មានថ្ងៃកំណើតរណសិរ្ស ២ធ្នូ និងជ័យជំនះ ៧មករាទេនោះ យើងក៏គ្មានអ្វីៗដូចថ្ងៃនេះដែរ។ នេះគឺជាសច្ចធម៌ នៃប្រវត្តិសាស្ត្រ»។

ជាមួយគ្នាដែរ លោក ហេង សំរិន បានអំពាវនាវដល់គណៈកម្មាធិការគណបក្សប្រជាជនគ្រប់ ថ្នាក់ មន្ត្រីរាជការ សមាជិក សមាជិកាសកម្ម បន្តលើកកម្ពស់ថែរក្សាសាមគ្គីភាព ឯកភាពផ្ទៃ ក្នុងប្រកាន់ខ្ជាប់ប្រពៃស្នេហាជាតិ ផ្សារភ្ជាប់ជាមួយប្រជាជន ហើយខិតខំបញ្ចេញអស់កម្លាំង កាយចិត្តក្នុងការបម្រើប្រទេសជាតិ តាមមាគ៌ាគណបក្សប្រជាជនកម្ពុជា និងកម្មវិធីនយោបាយរបស់រាជរដ្ឋាភិបាល។ លោកសង្កត់ធ្ងន់ថា៖«ត្រូវចងចាំថា នេះជាគោលបំណង និងឧត្តមគតិ ឥតប្រែប្រួលរបស់រណសិរ្ស និងគណបក្សប្រជាជនកម្ពុជាយើង»។

ប្រធានក្រុមប្រឹក្សាជាតិរណសិរ្សសាមគ្គី អភិវឌ្ឍន៍មាតុភូមិកម្ពុជារូបនេះបានថ្លែងក្នុងមីទ្ទិញគណបក្ស CPP នាវិទ្យាស្ថានជាតិអប់រំរម្លឹកពីប្រវត្តិថ្ងៃកំណើតរណសិរ្ស ២ ធ្នូ ថា ថ្ងៃ២ធ្នូ ឆ្នាំ១៩៧៨ រណសិរ្សសាមគ្គីសង្គ្រោះជាតិកម្ពុជា បច្ចុប្បន្នត្រូវបាន ប្តូរឈ្មោះជា រណសិរ្សសាមគ្គី អភិវឌ្ឍន៍កម្ពុជា ជាអង្គការចាត់តាំងមហាជនឈានមុខរបស់ គណបក្សប្រជាជនកម្ពុជា បានបដិសន្ធិឡើងក្នុងតំបន់រំដោះ ស្ថិតនៅភូមិជើងឃ្លូ ឃុំ២ធ្នូ ស្រុក ស្នួល ខេត្តក្រចេះ ដោយទទួលបានការជួយឧបត្ថម្ភយ៉ាងធំធេងពីកងទ័ពស័គ្ម្រចិត្ត ប្រទេសវៀតណាម និងការគាំទ្រពីមិត្តជិតឆ្ងាយលើសកលលោកក្នុងគោលបំណងផ្តួលរំលំរបបកម្ពុជាប្រជាធិបតេយ្យ រហូតទទួលបានជ័យជំនះ នៅថ្ងៃទី៧ មករា ឆ្នាំ១៩៧៩៕