ជាតិ
នយោបាយជាតិ
ទូតខ្មែរប្រចាំUN ពន្យល់អ្នកស្រី Rhona Smith ពីរឿងក្តីក្តាំលោក សម រង្ស៊ី -កឹម សុខា លោកស្រី Rhona Smith នាជំនួបជាមួយលោកនាយករដ្ឋមន្ត្រី ហ៊ុន សែន កាលពីថ្ងៃទី២១ ខែកញ្ញា
×
ក្រោយពីអ្នកស្រី Rhona Smith អ្នករាយការណពិសេសអង្គការសហប្រជាជាតិស្តីពីសិទ្ធិមនុស្សនៅកម្ពុជា រិះគន់លើបញ្ហាវាយអ្នកតំណាងរាស្ត្រគណបក្សសង្គ្រោះជាតិ ២ រូប និងដីកាចាប់ខ្លួនលោក សម រង្ស៊ី ព្រមទាំងការទម្លាក់លោក កឹម សុខា ចេញពីតំណែងអនុប្រធានទី ១ នៃរដ្ឋសភា កាលពីពេលថ្មីៗទៅនោះ ឯកអគ្គរាជទូតកម្ពុជា អចិន្ត្រៃរបស់កម្ពុជាប្រចាំអង្គការសហប្រជាជាតិ បានផ្ញើលិខិតទៅអ្នកស្រី Rhona Smith ដើម្បីពន្យល់អំពីបញ្ហានេះ។
រឿងរាវអ្នករាយការណ៍ពិសេស រិះគន់រដ្ឋាភិបាលកម្ពុជា ដែលធ្វើទៅលើលោក សម រង្ស៊ី និងលោក កឹម សុខា កន្លងមក មិនត្រឹមតែមន្ត្រីរដ្ឋាភិបាលដែលនៅក្នុងប្រទេសនោះទេដែលចេញមុខប្រតិកម្មនឹងការរិះគន់នេះ តែឯកអគ្គរាជទូតកម្ពុជាប្រចាំនៅអង្គការសហប្រជាជាតិឯណោះវិញ ក៏ចេញមុខបកស្រាយប្រាប់អ្នកស្រី Rhona Smith ពីបញ្ហានេះដែរ។បញ្ហារបស់លោក សម រង្ស៊ី ត្រូវឯកអគ្គរាជទូតរបស់កម្ពុជាប្រចាំUN ប្រាប់អ្នកស្រី Smith ដូចមន្ត្រីរដ្ឋាភិបាលនៅក្នុងប្រទេសកន្លងមកដែរថា ដីកាចាប់ខ្លួន និងការដកអភ័យឯកសិទ្ធិជាតំណាងរាស្ត្រពីលោក សម រង្ស៊ី ប្រធានគណបក្សសង្គ្រោះជាតិ ធ្វើឡើងស្របតាមច្បាប់ព្រហ្មទណ្ឌ និងច្បាប់រដ្ឋធម្មនុញ្ញ។ ជាងនេះទៅទៀតឯកអគ្គរាជទូតកម្ពុជាប្រចាំUN បន្តលើកឡើងថា ព្រះរាជក្រឹត្យព្រះមហាក្សត្រលើកលលែងទោសលោក សម រង្ស៊ី កាលពីឆ្នាំ ២០១១ បានគ្រប់ដណ្តប់លើបទល្មើសផ្សេងគ្នាចំនួនតែពីរដែល លោក សម រង្ស៊ី បានប្រព្រឹត្ត ក្នុងនោះមាន ការដកបង្គោលព្រំដែន និងការក្លែងបន្លំឯកសារសាធារណៈប៉ុណ្ណោះ តែមិនមែនរាប់បញ្ចូលបទល្មើសបរិហាកេរ្តិ៍ឡើយ។
ចំណែកករណី លោក កឹម សុខា វិញ ក្នុងលិខិតផ្ញើជូនអ្នកស្រី Smith ឯកអគ្គរាជទូតបានពន្យល់ថា មូលហេតុដែលរដ្ឋសភាដកតំណែង លោក កឹម សុខា ចេញពីអនុប្រធានទី១រដ្ឋសភា ពីព្រោះតែលោក កឹម សុខា បន្តបរិហាកេរ្តិ៍រាជរដ្ឋាភិបាល និងថ្នាក់ដឹកនាំរដ្ឋាភិបាល ហើយបន្តវាយប្រហារធ្វើឲ្យមានការរើសអើង ការប្រកាន់ពូជសាសន៍ ព្រមទាំងបានញុះញង់ប្រជាជនឲ្យងើបប្រឆាំងរដ្ឋាភិបាលស្របច្បាប់។ រីឯករណី វាយតំណាងរាស្ត្រកម្ពុជាពីររូប គឺលោក គង់ សភា និងលោក ញ៉យ ចំរើន កាលពីថ្ងៃទី២៦ តុលា ឆ្នាំ២០១៥ រហូតដល់របួសធ្ងន់នោះ ត្រូវឯកអគ្គរាជទូតខ្មែរប្រចាំនៅUN ប្រាប់អ្នកស្រី Rhona Smith ថា ដោយសារតំណាងរាស្ត្រទាំងពីរនោះ បោះពាក្យសម្តីប្រមាថមើលងាយ ចំពោះបាតុករដែលនៅសេសសល់ ហើយក៏ត្រូវបាតុករឃាត់រថយន្ត និងវាយតំណាងរាស្ត្រទាំងនោះតែម្តង។
Tag:
Rhona Smith
ទូតខ្មែរប្រចាំUN
© រក្សាសិទ្ធិដោយ thmeythmey.com