នយោបាយជាតិ
នយោបាយអន្តរជាតិ
អាមេរិក និងសម្ព័ន្ធមិត្តស្នើ UN បើកកិច្ចប្រជុំលើករណីរំលោភសិទ្ធិមនុស្សរបស់កូរ៉េខាងជើង
×
ក្រុមលោកខាងលិចបានស្នើឲ្យក្រុមប្រឹក្សាសន្តិសុខកោះប្រជុំដើម្បីពិភាក្សាករណីរំលោភសិទ្ធិមនុស្សធ្ងន់ធ្ងររបស់កូរ៉េខាងជើង។ ប៉ុន្តែចិនដែលជាសម្ព័ន្ធមិត្តចាក់ទឹកមិនលិចរបស់ទីក្រុងព្យុងយ៉ាងប្រហែលជាមិនឈរអោបដៃមើលក្រុមលោកខាងលិចព្រលះកូរ៉េខាងជើងនោះទេ។
តាមរយៈសេចក្ដីប្រកាសមួយរបស់តំណាងអាមេរិកប្រចាំ UN អាមេរិកនិងសម្ព័ន្ធមិត្តរបស់ខ្លួនបានស្នើឲ្យមានកិច្ចប្រជុំមួយលើករណីសិទ្ធិមនុស្សនៅកូរ៉េខាងជើង។ សេចក្ដីប្រកាសនោះបញ្ជាក់ថា កាលពីខែធ្នូឆ្នាំមុន UN បានប្រជុំជាលើកដំបូងលើរបៀបវារៈបញ្ហាសិទ្ធិមនុស្សរបស់កូរ៉េខាងជើង។ ហើយពេលនេះ អាមេរិកនិងប្រទេស៨ផ្សេងទៀត ស្នើកោះប្រជុំលើករណីនេះម្ដងទៀត។
អ្នកនាំពាក្យតំណាងអាមេរិកប្រចាំUN លោកស្រី Hagar Chemali បាននិយាយថា អាមេរិកនឹងខិតខំពន្លឿនឲ្យមានកិច្ចប្រជុំនេះនៅពេលដែលខ្លួនទទួលតំណែងជាប្រធានប្ដូរវេនរបស់ក្រុមប្រឹក្សាសន្តិសុខនៅខែនេះ។
យ៉ាងណាក៏ដោយសំណើរនេះប្រហែលជាមិនមែនជារឿងងាយស្រួលនោះទេសម្រាប់អាមេរិកនិងគូកនរបស់ខ្លួននោះទេ។ នេះក៏ដោយសារតែចិនដែលជាសមាជិកអចិន្ត្រៃយ៍របស់ក្រុមប្រឹក្សាសន្តិសុខដែរ ច្បាស់ជាមិនយល់ព្រមឡើយ។ កាលពីខែវិច្ឆិកាមុននេះ ទូតចិនប្រចាំUN បានថ្លែងការពារកូរ៉េខាងជើងថា ក្រុមប្រឹក្សាសន្តិសុខមិនគួរបើកកិច្ចប្រជុំរបៀបនេះទេ។ លោកបន្តថា សិទ្ធិមនុស្សមិនមែនជាការងាររបស់ក្រុមប្រឹក្សាសន្តិសុខនោះទេ។
កាលពីឆ្នាំមុន UN បានបញ្ចេញរបាយការណ៍មួយស្ដីពីស្ថានភាពសិទ្ធិមនុស្សនៅកូរ៉េខាងជើង។ របាយការណ៍នេះបានបង្ហាញថា មានការរំលោភសិទ្ធិមនុស្សយ៉ាងធ្ងន់ធ្ងរដូចជា ជំរំឃុំខ្លួន ការធ្វើទារុណកម្មជាប្រព័ន្ធ គ្រោះអត់ឃ្លាននិងការសម្លាប់មនុស្សតាមរបៀបណាស៊ីជាដើម។
ជាមួយរបាយការណ៍ខាងលើនេះ មហាសន្និបាតUN បានទាមទារឲ្យក្រុមប្រឹក្សាសន្តិសុខសម្រេចបញ្ជូនករណីរំលោភសិទ្ធិរបសកូរ៉េខាងជើងទៅកាន់តុលាការឧក្រិដ្ឋកម្មអន្តរជាតិចំពោះឧក្រិដ្ឋកម្មប្រឆាំងមនុស្សជាតិ។ យ៉ាងណាក៏ដោយ ការប៉ុនប៉ងនេះប្រហែលតែជាការស្រមើស្រមៃមួយប៉ុណ្ណោះ។ វត្តមានចិននិងរុស្សីដែលជាបងធំរបស់ទីក្រុងព្យុងយ៉ាងក្នុងក្រុមប្រឹក្សាគឺជារឿងពិបាកមួយ។ ប្រទេសទាំងពីរនេះនឹងវ៉េតូរាល់ការសម្រេចនេះជាមិនខានឡើយ៕
© រក្សាសិទ្ធិដោយ thmeythmey.com