ជាតិ
នយោបាយជាតិ
បក្សប្រឆាំងរង់ចាំអនុញ្ញាតពីក្រសួង ដើម្បីដំណើរការទូរទស្សន៍របស់ខ្លួន
×
គណបក្សសង្គ្រោះជាតិ បានទិញដីមួយកន្លែងក្នុងរាជធានីភ្នំពេញបានហើយ ដើម្បីដំណើរការស្ថានីយទូរទស្សន៍ព្រះអាទិត្យ។ អ្នកនាំពាក្យគណបក្សសង្គ្រោះជាតិលោក យឹម សុវណ្ណ បានប្រាប់សារព័ត៌មានថ្មីៗថា គណបក្សលោកនៅរង់ចាំការអនុញ្ញាតចុងក្រោយពីក្រសួងព័ត៌មាន និងក្រសួងដែនដី នគររូបនីយកម្ម ដើម្បីអាចចាប់ផ្តើមដំណើរការទូរទស្សន៍នេះតែម្តង។
ទីតាំងស្ថានីយទូរទស្សន៍ព្រះអាទិត្យ ដែលនឹងក្លាយជាទូរទស្សន៍ទីមួយគាំទ្រគោលនយោបាយគណបក្សប្រឆាំងនៅកម្ពុជានោះ នឹងមានទីតាំងនៅក្នុងរាជធានីភ្នំពេញ។ ពោលគឺមិនមែននៅក្នុងខេត្តកណ្តាល ដូចមន្ត្រីនៃគណបក្សសង្គ្រោះជាតិធ្លាប់បានបញ្ជាក់ប្រាប់សារព័ត៌មានក្នុងពេលកន្លងមកនោះទេ។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ បានបដិសេធផ្តល់ព័ត៌មានលម្អិតអំពីទីតាំងពិតប្រាកដនៃស្ថានីយទូរទស្សន៍ព្រះអាទិត្យនេះ។ លោក យឹម សុវណ្ណ បានបញ្ជាក់ប្រាប់សារព័ត៌មានថ្មីៗយ៉ាងដូច្នេះថា៖ «ឥឡូវនេះយើងទិញបានហើយ គឺនៅភ្នំពេញ។ ទីតាំងនោះមានទំហំជាង១០០០ម៉ែត្រក្រឡា»។
មានទីតាំងពិតប្រាកដហើយមែន ប៉ុន្តែបើតាមអ្នកនាំពាក្យដដែលនេះ គេនៅមិនទាន់អាចចាប់ផ្តើមដំណើរទូរទស្សន៍ព្រះអាទិត្យបាននៅឡើយទេ។ គណបក្សសង្គ្រោះជាតិនៅរង់ចាំសេចក្តីសម្រេចរបស់ក្រសួងព័ត៌មានសម្រាប់អាជ្ញាបណ្ណ និងក្រសួងដែនដី នគររូបនីយកម្មទៀតសម្រាប់ការសាងសង់បង្គោលអង់តែន។ «ឲ្យតែក្រសួងសម្រេចតាមសំណើររបស់យើងពេលណា យើងនឹងចាបផ្តើមដំណើរការទូរទស្សន៍នៅពេលនោះភ្លាម»។ នេះជាការបញ្ជាក់បន្ថែមរបស់មន្ត្រីជាន់ខ្ពស់នៃគណបក្សសង្គ្រោះជាតិ ដែលបដិសេធមិនព្រមនិយាយអំពីទំហំទឹកប្រាក់ដែលត្រូវបានចំណាយសម្រាប់ការទិញទីតាំងស្ថានីយទូរទស្សន៍។
សូមបញ្ជាក់ថា គណបក្សសង្គ្រោះជាតិបានចាប់ផ្តើមប្រមូលថវិកាចាប់តាំងពីថ្ងៃទី២៥ ខែមិថុនា ឆ្នាំ២០១៥មកម្ល៉េះ។ រហូតមកដល់ពេលនេះ គណបក្សប្រមូលថវិកាបានប្រមាណជា៧០ម៉ឺនដុល្លារហើយ។ តាមគម្រោង គណបក្សត្រូវការថវិកាប្រមាណជា ១លានដុល្លារកន្លះ ទៅ៣លានដុល្លារ ដើម្បីដំណើរការទូរទស្សន៍របស់ខ្លួន៕
© រក្សាសិទ្ធិដោយ thmeythmey.com