អន្តរជាតិ
ក្រោយបក្សប្រឆាំងឈ្នះឆ្នោតសភា ប្រធានាធិបតីវេណេហ្ស៊ុយអេឡាស្នើសុំសហការ
× លទ្ធផលបោះឆ្នោតបានបង្ហាញច្បាស់ថា គណបក្សប្រឆាំងវេណេហ្ស៊ុយអេឡា ចលនារួបរួមប្រជាធិបតេយ្យ ( MUD) បានឈ្នះឆ្នោតទទួលបានអាសនៈ ក្នុងសភាច្រើន ជាងបក្សកាន់អំណាចរួបរួមសង្គមនិយម (USP) ។ នេះជាការឈ្នះឆ្នោតលើកដំបូងបំផុតរបស់បក្សប្រឆាំងក្នុងរយៈពេល១៧ឆ្នាំក្នុងសង្គមវេណេហ្ស៊ុយអេឡា។ ប្រធានាធិបតីត្រៀមខ្លួនសហការជាមួយអ្នកនយោបាយបក្សប្រឆាំងដែលនឹងកាន់កាប់ស្ថាប័ននីតិបញ្ញាតិ។
សូមស្តាប់ការបកស្រាយរបស់លោក សៅ ផលនិស្ស័យ៖
នៅថ្ងៃចន្ទនេះ គណកម្មការរៀបចំការបោះឆ្នោតវេណេហ្ស៊ុយអេឡា បានប្រកាសលទ្ធផលជាបឋមថា គណបក្សប្រឆាំងឈ្នះការបោះឆ្នោតសភាហើយ។ ចំណែកមេដឹកនាំបក្សកាន់អំណាចនិងជាប្រធានាធិបតីលោក នីកូឡា ម៉ាឌុយរ៉ូ (Nicolas Maduro) បានទទួលស្គាល់ការបាត់បង់អាសនៈក្នុងសភារបស់គណបក្សលោកផងដែរក្រោយមានការប្រកាសលទ្ធផលនេះ។ ទោះជាយ៉ាងណាក៏ដោយ អាសនៈចំនួន២២ ទៀតមិនទាន់ដឹងថាបានទៅណាខ្លះឡើយ ព្រោះការរាប់សន្លឹកឆ្នោតកំពុងនៅបន្តដំណើរការនៅឡើយ។
បើតាមស្ថាប័នរៀបចំការបោះឆ្នោតខាងលើ គណបក្សចលនាឯកភាពប្រជាធិបតេយ្យ ដែលជាគណបក្សប្រឆាំងដ៏ធំនៅវេណេហ្ស៊ុយអេឡានោះបានទទួល៩៩ កៅអី ខណៈបក្សកាន់អំណាច គណបក្សរួបរួមសង្គមនិយមដែលបង្កើតឡើងដោយអតីតប្រធានាធិបតីលោក ហ៊ូកូ ឆាវេស នោះបានកៅអីត្រឹម៤៦ប៉ុណ្ណោះ។
-ប្រធានាធិបតីស្នើឲ្យបក្សប្រឆាំងសហការដើម្បីដោះស្រាយបញ្ហាសង្គមរួមគ្នា
ការឈ្នះឆ្នោតភ្លូកទឹកភ្លូកដីរបស់បក្សប្រឆាំងបានក្លាយជារឿងប្រវត្តិសាស្ត្រសម្រាប់សង្គមវេណេហ្ស៊ុយអេឡា ព្រោះរយៈពេលប្រហែល១៧ឆ្នាំមកហើយគណបក្សប្រឆាំងមិនស្គាល់ការឈ្នះឆ្នោតទាល់តែសោះ ពោលគឺតាំងពីបក្សសង្គមនិយមឡើងកាន់កាប់អំណាចនោះ។ មេដឹកនាំជាន់ខ្ពស់បក្សប្រឆាំងលោក Henrique Capriles បានសាទរជ័យជម្នះរបស់បក្សខ្លួន ហើយប្តេជ្ញាដោះស្រាយបញ្ហាប្រឈមផងដែរ។ ក្រោយការប្រកាសលទ្ធផលជាផ្លូវការ សភាថ្មីនឹងបំពេញភារកិច្ចរបស់ខ្លួននៅដើមឆ្នាំ ២០១៦ ហើយគណបក្សប្រឆាំងនឹងមានសំលេងលើលុប និងក្តោបកា្តប់បញ្ហានយោបាយបានស្រួលជាងមុន។
យ៉ាងណាក៏ដោយ ប្រធានាធិបតីនិងជាប្រធានបក្សកាន់អំណាច នីកូឡា ម៉ាឌុយរ៉ូ បានទទួលស្គាល់ការបរាជ័យរបស់បក្សខ្លួន តែលោកបានអំពាវនាវឲ្យមានគណបក្សប្រឆាំងដែលឈ្នះឆ្នោតសហការជាមួយរដ្ឋាភិបាលលោក ដើម្បីឈានទៅដោះស្រាយបញ្ហារួមជាពិសេស វិបត្តិសេដ្ឋកិច្ច និងបញ្ហាសង្គមផ្សេងទៀត។ រដ្ឋាភិបាលក្រុងការ៉ាកាសបច្ចុប្បន្នកំពុងព្យាយាមដោះស្រាយវិបត្តិសេដ្ឋកិច្ច និងប្រឈមមុខនឹងសម្ពាធបរទេសជាពិសេសសហរដ្ឋអាមេរិក ក្រោយមានចលនាបាតុកម្មប្រឆាំងរដ្ឋាភិបាលកើតឡើងជាហូរហែតាំងពីដើមឆ្នាំមុន។
-បញ្ហាធំដែលធ្វើឲ្យបក្សកាន់អំណាចចាញ់ឆ្នោត
ត្រលប់មកវិញ បញ្ហាធំដែលបណ្តាលឲ្យគណបក្សកាន់អំណាចចាញ់ឆ្នោត អាចមកពីរឿងធំៗមួយចំនួនដែលចាក់ស្រេះសង្គមវេណេហ្ស៊ុយអេឡា។ ទីមួយបញ្ហាវិបត្តិសេដ្ឋកិច្ច និងអតិផរណា ដែលជាបញ្ហាប្រឈមធំបំផុតសម្រាប់ប្រជាជនវេណេហ្ស៊ុយអេឡាទូទៅ។ ប្រទេសអាមេរិកឡាទីននិងប្រទេសនាំប្រេងចេញនេះ រងគ្រោះកាន់ខ្លាំងក្រោយពេលតម្លៃប្រេងឆៅធ្លាក់ចុះយ៉ាងគំហុកនៅលើទីផ្សារអន្តរជាតិតាំងពីពាក់កណ្តាលឆ្នាំមុន។ ហើយរឿងសំខាន់បំផុតគឺសេដ្ឋកិច្ចប្រទេសមួយនេះពឹងផ្អែកលើការនាំប្រេងចេញស្ទើរតែទាំងស្រុង។
បញ្ហាទី២ គឺ អស្ថិរភាពនយោបាយ។ វេណេហ្ស៊ុយអេឡាមិនទាន់ដោះស្រាយបញ្ហានយោបាយចប់នៅឡើយទេ ក្រោយចលនាបាតុកម្មរបស់ក្រុមសិស្សនិស្សិតកើតឡើងជាហូរហែរដើម្បីទាមទារទម្លាក់ប្រធានាធិបតីខាងលើផង។ ចលនាបាតុកម្មបានប្រែក្លាយជាហិង្សារហូតដល់មានការបង្ក្រាប់បាតុករ ធ្វើឲ្យមានមនុស្សស្លាប់ជាច្រើនផង។ រដ្ឋាភិបាលនេះបានចោទប្រកាន់ក្រុងវ៉ាស៊ីនតោនថា ជាអ្នកនៅពីក្រោយចលនាបាតុកម្ម និងរៀបចំឲ្យមានសង្គ្រាមប្រេងប្រឆាំងរបបដឹកនាំសព្វថ្ងៃថែមទៀត។
បញ្ហាទី៣ គឺអសន្តិសុខនៅក្នុងសង្គម។ ការកើនឡើងនៃអត្រា ឧក្រិដ្ឋកម្មមានដូចជាការជួញដូរគ្រឿងញៀន ជួញដូរមនុស្ស ឬអំពើប្លន់ជាដើមនោះ ដែលសុទ្ធសឹងជាសញ្ញាបង្ហាញថាប្រទេសនេះកំពុងប្រឈមបញ្ហាសង្គមយ៉ាងធ្ងន់ធ្ងរ៕
© រក្សាសិទ្ធិដោយ thmeythmey.com