ជាតិ
សង្គមជាតិ
គណៈកម្មការចម្រុះមួយនឹងត្រូវបង្កើតសម្រាប់ទប់ស្កាត់ការកាប់ព្រៃឈើនៅប្រាសាទកោះកេរ
× សៀមរាប៖ គណៈកម្មការចម្រុះមួយ នឹងត្រូវបង្កើតឡើង ដើម្បីទប់ស្កាត់ការកាប់បំផ្លាញព្រៃឈើខុសច្បាប់ នៅក្នុងបរិវេណប្រាសាទកោះកេរ។ គណៈកម្មការនេះ មានការចូលរួមពីភាគពាក់ព័ន្ធមួយចំនួន មានអាជ្ញាធរជាតិអប្សា និងអាជ្ញាធរខេត្តព្រះវិហារ។
ដើម្បីទប់ស្កាត់ការកាប់ព្រៃឈើខុសច្បាប់ក្នុងរមណីយដ្ឋានប្រាសាទកោះកេរ ឲ្យកាន់តែមានប្រសិទ្ធិភាពខ្ពស់ថែមទៀតនោះ ថ្នាក់គ្រប់គ្រងតំបន់នេះ បានសម្រេចបង្កើតគណៈកម្មការថ្មីមួយ ដើម្បីទប់ស្កាត់ ការពារ និងចុះអប់រំដល់ប្រជាពលរដ្ឋ ឲ្យយល់ពីតម្លៃព្រៃឈើ ក្នុងតំបន់។ សមាសភាពក្នុងគណៈកម្មការថ្មីនេះ រួមមាន អាជ្ញាធរជាតិអប្សរាគឺប្រធាន ដោយមានការចូលរួមពីអភិបាលរងខេត្តព្រះវិហារ និងមន្ទីរពាក់ព័ន្ធ ក៏ដូចជាសមត្ថកិច្ចក្នុងមូលដ្ឋានផង។
ក្នុងជំនួបនៅព្រឹកថ្ងៃទី៧ ធ្នូ នៅអាជ្ញាធរជាតិអប្សរា លោក ស៊ុំ ម៉ាប់ អគ្គនាយកអាជ្ញាធរជាតិអប្សរា បាននិយាយថា គណៈកម្មការដែលគ្រោងនឹងបង្កើតក្នុងពេលខាងមុខនេះ ដើរតួយ៉ាងសំខាន់បំផុត សម្រាប់ទប់ស្កាត់បទល្មើសកាប់ព្រៃខុសច្បាប់ ក៏ដូចជាការរុករានដីក្នុងតំបន់អភិរក្សនៅប្រាសាទកោះកេរ។ លោកស្នើឲ្យគណៈកម្មការថ្មីនេះ មើលគំរូ ការអនុវត្តដូចនៅក្នុងរមណីយដ្ឋានអង្គរ ដូចជាការចុះអប់រំពលរដ្ឋតាមមូលដ្ឋានជាដើម ព្រោះបទល្មើសព្រៃឈើភាគច្រើន កើតឡើងដោយសារប្រជាពលរដ្ឋ។
តំបន់កោះកេរ មានផ្ទៃដីចំនួន ៨១គីឡូម៉ែត្រក្រឡា ដែលស្ថិតនៅក្នុងភូមិស្រយ៉ង់ ស្រុកគូលេន ខេត្តព្រះវិហារ។ រមណីយដ្ឋាននេះ ត្រូវបានរដ្ឋាភិបាល សម្រេចប្រគល់ឲ្យអាជ្ញាធរជាតិអប្សរា ជាអ្នកគ្រប់គ្រង និងអភិរក្សនៅឆ្នាំ២០០៥ ។ រយៈពេលថ្មីៗនេះ មានករណីកាប់ឈើប្រណិតមួយចំនួន បានកើតក្នុងតំបន់ប្រាសាទកោះកេរ ដែលអាជ្ញាធរដាក់ការសង្ស័យលើប្រជាពលរដ្ឋក្នុងតំបន់នោះ៕
© រក្សាសិទ្ធិដោយ thmeythmey.com