ដូណាល់ត្រាំ បន្តបញ្ឆេះគំនិតរើសអើងប្រជាជនម៉ូស្លីមនៅអាមេរិក

អន្តរជាតិ

នយោបាយអន្តរជាតិ

ដូណាល់ត្រាំ បន្តបញ្ឆេះគំនិតរើសអើងប្រជាជនម៉ូស្លីមនៅអាមេរិក

08, Dec 2015 , 12:20 pm

រូបភាព

ដោយ: សៅ ផលនិស្ស័យ (Sao Phal Niseiy)

ម្សិលមិញនេះបេក្ខជននាំមុខបក្សសាធារណរដ្ឋ ដូណាល់ ត្រាំ (Donald Trump) បន្តថ្លែងសារនយោបាយដែល មានលក្ខណៈរើសអើងសាសនាជាថ្មីក្រោយការវាយប្រហារដោយប្តីប្រពន្ធមួយគូជាជនម៉ូស្លីមនៅកាលីហ្វរនីញ៉ា ។ អ្នកនយោបាយរូបនេះលោកបានស្នើឲអាជ្ញាធរបញ្ឈប់ប្រជាជនម៉ូស្លីមចូលមកក្នុងទឹកដីអាមេរិកទម្រាំអាជ្ញាធរអាមេរិកអាចដោះស្រាយបញ្ហាដែលកំពុងកើតឡើងបច្ចុប្បន្នបាន។

បេក្ខជនប្រធានាធិបតីបក្សសាធារណរដ្ឋដែលនាំមុខគេ ដូណាល់ ត្រាំ ម្សិលមិញនេះបានចេញមុខថ្លែងសារនយោបាយដែលបង្ហាញពីការរើសអើង និងបង្កប៉ះពាល់ដល់អ្នកកាន់សាសនាឥស្លាមជាថ្មីទៀតពាក់ព័ន្ធនឹងការបើកទទួលប្រជាជនម៉ូស្លីមដែលចង់ចូលមករស់នៅសហរដ្ឋអាមេរិក។

អ្នកនយោបាយអាមេរិកដែលជាមហាសេដ្ឋីដីធ្លី តែនិយាយស្តីមិនសូវចេះគិតនោះ បានស្នើសុំឲ្យអាជ្ញាធរអាមេរិកបញ្ឈប់អនុញ្ញាឲ្យប្រជាជនម៉ូស្លីមចូលមកក្នុងទឹកដីអាមេរិក ទម្រាំអាជ្ញាធរអាចដោះស្រាយបញ្ហាដែលកំពុងកើតមានឡើងបច្ចុប្បន្នបាន។ លោកថា៖« ចាំដល់ពេលដែលយើងអាចវិនិច្ឆ័យនិងយល់ច្បាស់ពីបញ្ហានេះ និងគ្រោះថ្នាក់ដែលបង្កឡើងដោយលំហូរចូលក្រុមមនុស្សនេះ។ ប្រទេសយើងមិនអាចក្លាយជាជនរងគ្រោះនៃការវាយប្រហារគួរឲ្យភ័យខ្លាចដែលរៀបចំឡើងដោយក្រុមមនុស្សដែលជឿជាក់លើកាតព្វកិច្ចសាសនា (ជីហាត) និងគ្មានការគោរពជីវិមនុស្សឡើយ»។

បេក្ខជនប្រធានាធិបតីរូបនេះ ចេញមុខលើកឡើងបែបនេះ ដោយសារការវាយប្រហារនៅកាលីហ្វរនីញ៉ា ដែលបង្កឡើងដោយប្តីប្រពន្ធដែលត្រូវបានគេសន្និដ្ឋានថារងការដុសខាត់ផ្នត់គំនិតក្លាយជាជនជ្រុលនិយមនិងស្រលាញ់ហិង្សានោះ។

យ៉ាងណាក៏ដោយ អ្នកនយោបាយរូបនេះមិនបានបញ្ជាក់ទេថា តើគំនិតរបស់លោកក្នុងការហាមឃាត់ប្រជាជនម៉ូស្លីមចូលមកក្នុងទឹកដីខ្លួននោះសម្តៅលើអ្នកទេសចរឬក្រុមប្រជាជនអន្តោប្រវេសន៍ឡើយ។ ហើយគេក៏មិនដឹងច្បាស់ថា វិធានការបែបនេះមានឥទ្ធិពលលើប្រជាជនអាមេរិក-ម៉ូស្លីមដែលកំពុងស្នាក់នៅក្រៅប្រទេសឬក៏អត់ទេ។

ប៉ុន្តែ ពាក្យសម្តីអ្នកនយោបាយម្នាក់នេះ គ្មានប្រយោជន៍អ្វីសោះសម្រាប់ជួយដោះស្រាយបញ្ហាដែលកំពុងកើតឡើងក្នុងសង្គមអាមេរិក។ ផ្ទុយទៅវិញ ពាក្យសម្តីបែបនេះត្រឹមតែបង្កឲ្យគំនិតស្អប់ខ្ពើម និងការរើសអើងប្រឆាំងអ្នកកាន់សាសនាផ្សេងទៀតជាពិសេសប្រជាជនម៉ូស្លីមតែម្តង។

ក្រោយការវាយប្រហារសម្លាប់រង្គាលមនុស្សនៅទីក្រុងប៉ារីសថ្ងៃ ១៣ វិច្ឆិកា លោក ដូណាល់ ត្រាំ ចាប់ផ្តើមព្យាយាមទាញប្រយោជន៍នយោបាយតាមរយៈការបញ្ឆេះគំនិតស្អប់ខ្ពើម វាយប្រហាររដ្ឋាភិបាលលោក បារ៉ាក់ អូបាម៉ា និងប្រជាជនម៉ូស្លីមនៅអាមេរិក។ កន្លងមកលោក បានស្នើឲ្យរដ្ឋបាលក្រុងវ៉ាស៊ីនតោនឈប់ទទួលយកជនភៀសខ្លួនមកពីស៊ីរី ដោយលើកឡើងពីបញ្ហាសន្តិសុខជាដើម។ ហើយ រឿងដែលគួរឲ្យអស់សំណើចនោះ លោកបានប្រកាសថា អាមេរិកត្រូវការសាងសង់ជញ្ជាំងនិងរបងជាដើមដើម្បីការពារទឹកដីអាមេរិកពីក្រុមភេរវជននិងធ្វើឲ្យអាមេរិកក្លាយជាប្រទេសអស្ចារ្យជាថ្មីទៀត៕