អន្តរជាតិ
អ៊ីរ៉ាក់ចង់សុំអន្តាគមន៍យោធារុស្ស៊ីដើម្បីបណ្តេញទ័ពតួកគី
× អ៊ីរ៉ាក់នៅបន្តទាមទារឲ្យតួកគីដកទ័ពចេញពីទឹកដីរបស់ខ្លួន ប៉ុន្តែតួកគីមិនមានឆន្ទៈដកកងទ័ពចេញពីទឹកដីអ៊ីរ៉ាក់ទេ។ គេមើលឃើញជំហររបស់រដ្ឋាភិបាលអ៊ីរ៉ាក់ដែរ ដោយចង់សុំជំនួយពីរុស្ស៊ីដើម្បីបង្ខំឲ្យរដ្ឋាភិបាលតួកគីដកទ័ពខ្លួនដែលកំពុងកាន់កាប់ទីតាំងក្បែរខេត្ត Mosul។ វាអាចជារឿងចម្លែកដែរ ព្រោះកន្លងមករដ្ឋាភិបាលអ៊ីរ៉ាក់ជំទាស់ការពង្រាយទ័ពបរទេសជាពិសេសអាមេរិកមកកាន់ទឹកដីខ្លួន តែពេលនេះបែរជាងាកទៅរកជំនួយកងទ័ពរបស់រុស្ស៊ីទៅវិញ។
សូមស្តាប់ការបកស្រាយរបស់លោក សៅ ផលនិស្ស័យ៖
ទោះបីជាមានការស្នើសុំពីភាគីអ៊ីរ៉ាក់ក៏ដោយ រដ្ឋាភិបាលតួកគីមិនទាន់ចេញបញ្ជាដកទ័ពនិងសព្វាវុធចេញពីទឹកដីអ៊ីរ៉ាក់ឡើយ។ កន្លងមកអ៊ីរ៉ាក់ដាក់ឱសានវាទរយៈពេល៤៨ម៉ោងឲ្យតួកគីដកទ័ពចេញពីទឹកដីខ្លួន បើមិនដូច្នេះទេ អ៊ីរ៉ាក់នឹងនាំសំណុំរឿងនេះកាន់ក្រុមប្រឹក្សាសន្តិសុខអង្គការសហប្រជាជាតិ។
អ៊ីរ៉ាក់បានចោទប្រកាន់រដ្ឋាភិបាលតួកគីថា បានឈ្លានពាននិងរំលោភអធិបតេយ្យរបស់ខ្លួនយ៉ាងធ្ងន់ធ្ងរ ប៉ុន្តែតួកគីថា ខ្លួនកំពុងជួយកងទ័ពអ៊ីរ៉ាក់ដែលកំពុងប្រយុទ្ធជាមួយក្រុមភេរវជនរដ្ឋឥស្លាមឬក្រុមដែស្ហនោះ។
-អ៊ីរ៉ាក់ចង់សុំអន្តរាគមន៍យោធារុស្ស៊ីបណ្តេញ តួកគីពីទឹកដីខ្លួន
ក្រៅពីគំរាមប្តឹងតួកគីទៅអង្គការសហប្រជាជាតិ មកទល់ពេលនេះរដ្ឋាភិបាលអ៊ីរ៉ាក់ហាក់បង្ហាញឆន្ទៈសុំការអន្តរាគមន៍ពីរដ្ឋាភិបាលក្រេមឡាំងវិញម្តង។ រដ្ឋាភិបាលអ៊ីរ៉ាក់ចង់បានអន្តរាគមន៍យោធា ប៉ុន្តែគេមិនបានដឹងច្បាស់ថាមាន ការស្នើសុំជាផ្លូវការទៅកាន់រដ្ឋាភិបាលរុស្ស៊ីជាផ្លូវការរួចទៅហើយឬក៏យ៉ាងណាឡើយ។
ប្រធានគណៈកម្មាធិការសភាទទួលបន្ទុកសន្តិសុខនិងការពារជាតិលោក Hakim al-Zamili បានអះអាងក្នុងបទសម្ភាសន៍ជាមួយសារព័ត៌មាន Al- Araby Al- Jadeed ថារដ្ឋាភិបាលក្រុងបាដាដ អាចនឹងងាកទៅសុំជំនួយឲ្យមានអន្តរាគមន៍យោធាដោយផ្ទាល់ពីក្រុងម៉ូស្គូ ដើម្បីតបតការរំលោភអធិបតេយ្យអ៊ីរ៉ាក់យ៉ាងធ្ងន់ធ្ងរពីសំណាក់រដ្ឋាភិបាលតួកគីកន្លងមកនោះ។ វាអាចជាឱកាសមួយដែរសម្រាប់រដ្ឋាភិបាលអ៊ីរ៉ាក់ព្រោះទ័ពរុស្ស៊ីកំពុងរួមដៃជាមួយអ៊ីរ៉ង់ និងស៊ីរី ច្បាំងកម្ចាត់ក្រុមភេរវជនរដ្ឋឥស្លាមនៅទីនោះស្រាប់ ហើយរដ្ឋាភិបាលរុស្ស៊ីកំពុងតែទាស់ទែងជាមួយតួកគីស្រាប់ក្រោយការបាញ់យន្តហោះរុស្ស៊ីទម្លាក់។ ប៉ុន្តែគេមិនរំពឹងថា រុស្ស៊ីនឹងប្រើប្រាស់កម្លាំងទ័ពឡើយ ទោះជាមានការស្នើសុំជាផ្លូវការក៏ដោយ។ វាជារឿងមួយធ្ងន់ធ្ងរនៅពេលដែលរុស្ស៊ីប្រើប្រាស់កម្លាំងទ័ពចូលអន្តរាគមន៍ដើម្បីបណ្តេញទ័ពតួកគី ព្រោះវានឹងបណ្តាលឲ្យមានការប៉ះទង្គិចគ្នាដោយអាវុធទ្រង់ទ្រាយធំ។
១.អ៊ីរ៉ាក់ជំទាស់ទ័ពអាមេរិក តែចង់សុំអន្តរាគមន៍ពីរុស្ស៊ីវាយក្រុមដែស្ហ
ថ្មីៗនេះរដ្ឋាភិបាលអ៊ីរ៉ាក់បានប្រកាសថា ខ្លួនមិនត្រូវការការពង្រាយកងទ័ពបរទេសនៅលើទឹកដីខ្លួនទេ ជាពិសេសកងទ័ពអាមេរិកតែម្តង។ អ៊ីរ៉ាក់ថា ទ័ពបរទេសអាចបើកប្រតិបត្តិការនៅលើទឹកដីខ្លួនបានដរាបណាមានការអនុញ្ញាតពី រដ្ឋាភិបាលអ៊ីរ៉ាក់ជាមុន។ អាមេរិកមានកងទ័ពខ្លួនរាប់ពាន់នាក់រួចហើយដែលកំពុងឈរជើងនៅទឹកដីអ៊ីរ៉ាក់ដើម្បីបង្វឹកទ័ពរដ្ឋាភិបាល ហើយក្រុងវ៉ាស៊ីនតោនក៏ចង់ពង្រាយទ័ពបន្ថែមទ័ពទៅអ៊ីរ៉ាក់ដើម្បីពង្រឹងយុទ្ធសាស្ត្រកម្ចាត់ក្រុមភេរវជនដែស្ហដែរ។
កន្លងមករដ្ឋាភិបាលក្រុងបាដាដ ហាក់បីដូចជាទោរទន់ទៅរករុស្ស៊ី ហើយក៏ធ្លាប់បង្ហាញគម្រោងសុំឲ្យរុស្ស៊ីពង្រីកការអន្តរាគមន៍វាយប្រហារក្រុមរដ្ឋឥស្លាមពីស៊ីរីមកកាន់ទឹកដីអ៊ីរ៉ាក់ផងដែរ។ នេះក៏ដោយសារតែសម្ព័ន្ធអន្តរជាតិដឹកនាំដោយក្រុងវ៉ាស៊ីនតោនបានអន្តរាគមន៍កម្ចាត់ក្រុមភេរវជនរដ្ឋឥស្លាមឬក្រុមដែស្ហអស់ជាងមួយឆ្នាំមកហើយ ប៉ុន្តែមិនឃើញមានលទ្ធផលជាដុំកំភួនឡើយ។ ក្រុមភេរវជននៅតែអាចពង្រីកការកាន់កាប់របស់ខ្លួនបាន ហើយក្រុមនេះនៅបន្តរកចំណូលបានជាបន្តបន្ទាប់ដើម្បីពង្រឹងកម្លាំងរបស់ខ្លួនបានងាយ។
ក្រោយពេលដែល រដ្ឋាភិបាលរុស្ស៊ីចាប់ផ្តើមអន្តរាគមន៍នៅលើទឹកដីស៊ីរី ដើម្បីជួយរដ្ឋាភិបាលលោក អាសាដ ពង្រឹងកម្លាំងរបស់ខ្លួនឡើងវិញ អ៊ីរ៉ាក់មើលឃើញពីចំណុចវិជ្ជមាន និងប្រសិទ្ធភាពនៃអន្តរាគមន៍របស់រុស្ស៊ីថែមទៀត។ ខាងភាគីរុស្ស៊ីបានអះអាងដែរថា ខ្លួនពិចារណាសម្រាប់ការជួយអន្តរាគមន៍កម្ចាត់ភេរវជននៅអ៊ីរ៉ាក់ បើសិនជាមានការស្នើសុំពីរដ្ឋាភិបាលអ៊ីរ៉ាក់៕
© រក្សាសិទ្ធិដោយ thmeythmey.com