ជាតិ
សេដ្ឋកិច្ច
លោក ហ៊ុន សែន ប្រកាសពីបរាជ័យនៃផែនការនាំអង្ករចេញឲ្យបាន១លានតោននៅឆ្នាំ២០១៥
× នៅក្នុងឆ្នាំ២០១៥នេះ កម្ពុជាមិនអាចសម្រេចបាននូវផែនការជំរុញការនាំចេញការនាំចេញអង្ករឲ្យបាន១លានតោនក្នុង១ឆ្នាំបាននោះទេ។ ក្នុងរយៈពេល ១០ខែ ក្នុងឆ្នាំ២០១៥ នេះ កម្ពុជាទើបតែសម្រេចបានការនាំចេញតែជាង៤០ម៉ឺនតោនប៉ុណ្ណោះ។
លោកនាយករដ្ឋមន្ត្រីហ៊ុន សែន បានទទួលស្គាល់ថា កម្ពុជាមិនអាចសម្រេចបាននូវផែនការនេះដែរ។ នៅក្នុងពិធីផ្សព្វផ្សាយរបាយការណ៍ជាតិ នៃលទ្ធផលចុងក្រោយជំរឿនកសិកម្មកម្ពុជា នៅវិមានសន្តិភាព នៅថ្ងៃទី១០ខែធ្នូ លោកនាយករដ្ឋមន្ត្រីហ៊ុន សែន បានពន្យល់ពីមូលហេតុ ដែលកម្ពុជាបរាជ័យក្នុងគោលដៅនាំចេញអង្ករ១លានតោននេះ។
សម្រាប់ប្រមុខរដ្ឋាភិបាល មានមូលហេតុចំនួន២ដែលកម្ពុជាបរាជ័យក្នុងការជំរុញការនាំចេញអង្ករ។ មូលហេតុទី១ ដោយសារប្រទេសកម្ពុជាធ្លាប់ជាប្រទេសខ្វះស្បៀង ជាប្រទេសនាំចូលស្បៀង ហើយកម្ពុជាមិនបានត្រៀមខ្លួនសម្រាប់តម្រូវការនាំចេញអង្ករ ដែលជាហេតុធ្វើឲ្យវិនិយោគិន មិនបានមើលឃើញពីការកើនឡើងយ៉ាងឆាប់រហ័សនៃផលិតកម្មស្រូវ អង្កររបស់កម្ពុជា។ បើតាមលោក ហ៊ុន សែន កម្ពុជាក៏ខ្វះម៉ាស៊ីនកិនស្រូវដែលអាចនាំចេញបាន ព្រមទាំងខ្វះខាតថវិកាសម្រាប់ប្រមូលទិញស្រូវរបស់ប្រជាពលរដ្ឋផងដែរ។ មូលហេតុទី២ គឺការប្រកួតប្រជែងជាមួយប្រទេសជិតខាងដែលជាប្រទេសនាំចេញអង្ករ ដូចជាប្រទេសថៃ វៀតណាម ឡាវ និងមីយ៉ាន់ម៉ាជាដើម។
តែយ៉ាងណាក៏ដោយ លោកនាយរដ្ឋមន្ត្រី ក៏បានសាទរអំពីជោគជ័យរបស់កម្ពុជា ដែលប្រែក្លាយពីប្រទេសមួយដែលខ្វះខាតស្បៀង ទៅជាប្រទេសដែលមានអតិរេកស្បៀងតិចតួច ពោលគឺមានអតិរេកស្រូវជាង៥លានតោន ដែលគិតជាអង្ករគឺជាង៣លានតោន។
សូមបញ្ជាក់ថាក្នុងរយៈពេល១០ខែ ក្នុងឆ្នាំ២០១៥នេះ កម្ពុជានាំចេញអង្ករទៅកាន់ទីផ្សារអន្តរជាតិបានចំនួន៤០៨,១៦៩តោន កើនឡើង៣៣.៩ភាគរយ បើធៀបនឹងរយៈពេលដូចគ្នាកាលពី ឆ្នាំ២០១៤ ៕
© រក្សាសិទ្ធិដោយ thmeythmey.com