កីឡាជាតិ
ជាតិ
ជំនួបដណ្តើមលេខបី MCL៖ បឹងកេតមានទុននាំមុខថាយហ្គឺរ ៤-៣
× បឹងកេតអង្គរ និងខេមបូឌានថាយហ្គឺរ ត្រូវតទល់គ្នាដណ្តើមចំណាត់ថ្នាក់លេខបីនៃក្របខណ្ឌមិត្តហ្វូនខេមបូឌានលីក នាវេលាម៉ោង៦ល្ងាចនេះ នៅពហុកីឡដ្ឋានជាតិ។ បឹងកេតអង្គរកំពុងមានប្រៀបជាមួយនឹងជ័យជម្នះ ៤-៣ កាលពីជើងទីមួយ។
កាលពីជំនួបជើងទីមួយនាថ្ងៃទី២២ ខែវិច្ឆិកា បឹងកេតអង្គរ បានទទួលជ័យជម្នះ ៣-២ លើខេមបូឌានថាយហ្គឺរ ដូច្នេះក្រុមដែលមានមូលដ្ឋាននៅខេត្តកំពង់ចាម មានឱកាសខ្ពស់ក្នុងការកាន់កាប់តំណែងលេខ៣ សម្រាប់យុទ្ធនាការដណ្តើមពានរង្វាន់មិត្តហ្វូនខេមបូឌានលីកឆ្នាំ២០១៥ នេះ។
បើគិតចាប់តាំងពីចាញ់ណាហ្គាវើល ៣-១ នាជំនួបវគ្គខ្វែងកាលពីថ្ងៃទី២៥ ខែតុលា បឹងកេតអង្គរបានយកឈ្នះ៥ប្រកួតជាប់ៗគ្នា ដោយរាប់បញ្ចូលទីទាំងជ័យជម្នះលើ Lao Toyota, Yangon United និង Becamex Binh Duong ក្នុងព្រឹត្តិការណ៍ Toyota Mekong Club Championships។
បឹងកេតដែលកំពុងត្រៀមខ្លួនសម្រាប់វគ្គផ្តាច់ព្រ័ត្រ Toyota Mekong Club ជាមួយជើងឯកថៃ Buriram United នោះ បានបង់ឱកាសដណ្តើមជើងឯកក្របខណ្ឌមិត្តហ្វូនខេមបូឌានលីក ជាលើកទីពីរ។ កាលពីឆ្នាំ២០១២ ពួកគេបានជើងឯកលើកដំបូង ហើយបញ្ចប់ចំណាត់ថ្នាក់លេខ២ ពីររដូវកាលជាប់ៗគ្នា។
សម្រាប់ខេមបូឌានថាយហ្គឺរ ពួកគេនៅតែមានសន្ទុះចិត្តប្រឹងប្រែងដើម្បីទទួលបានចំណាត់ថ្នាក់លេខ៣នៅឆ្នាំ២០១៥នេះ បន្ទាប់ពីពួកគេទទួលបានចំណាត់ថ្នាក់នេះរួចទៅហើយក្នុងព្រឹត្តិការណ៍ដណ្តើមពានរង្វាន់សម្តេច ហ៊ុន សែន ឆ្នាំ២០១៥ ។
កាលពីរដូវកាល ខេមបូឌានថាយហ្គឺរ ដែលប្រើឈ្មោះថា ត្រាយអាស៊ីភ្នំពេញ បានបញ្ចប់ចំណាត់ថ្នាក់លេខ៤ នៅក្នុងព្រឹត្តិការណ៍មិត្តហ្វូនខេមបូឌានលីក។
ចាន់ វឌ្ឍនាកា ដែលរកគ្រាប់បាល់បញ្ចូលទីសរុប៣៧គ្រាប់សម្រាប់បឹងកេត កំពុងត្រៀមខ្លួនទទួលពានរង្វាន់ស្បែកជើងមាសប្រចាំរដូវកាល។ ទោះបីជាយ៉ាងណាក៏ដោយ បឹងកេតមិនអាចលេងដោយធ្វេសប្រហែសនោះឡើយ ពីព្រោះខ្សែប្រយុទ្ធកាម៉េរូន Privat Mbarga ដែលរកបាន១៩គ្រាប់ឲ្យថាយហ្គឺរ គឺកម្លាំងមួយដ៏គ្រោះថ្នាក់៕
© រក្សាសិទ្ធិដោយ thmeythmey.com