កីឡាជាតិ
ជាតិ
ពេទ្យគន្ធបុប្ឆា នឹងបានប្រយោជន៍ពីព្រឹត្តិការណ៍ SCG Muangthong United ASEAN Tour
× ព្រឹត្តិការណ៍ប្រកួតកីឡាបាល់ទាត់មនុស្សធម៌ដែលមានឈ្មោះថា SCG Muangthong United ASEAN Tour ឆ្នាំ២០១៦ នឹងត្រូវរៀបចំឡើងដើម្បីពង្រឹងចំណងមិត្តភាព កម្ពុជា-ថៃ តាមរយៈកីឡាបាល់ទាត់ ហើយប្រាក់ចំណូលដែលបានពីការលក់សំបុត្រមួយនឹងប្រគល់ជូនដល់មន្ទីរពេទ្យគន្ធបុប្ឆាផងដែរ។
អ្នកសារព័ត៌មានកម្ពុជា៥រូបតាមរយៈការអញ្ជើញរបស់ក្រុមហ៊ុន SCG (Siam Cement PLC) និង ក្រុមហ៊ុន Quantum Publicity នឹងចូលរួមទស្សនា និងយកព័ត៌មាន SCG Muangthong United ASEAN Tour ឆ្នាំ២០១៦ នេះ ពីថ្ងៃទី១២ ដល់ថ្ងៃទី១៤ ខែធ្នូ ឆ្នាំ២០១៥នៅទីក្រុងបាងកក ។
រយៈពេល៣ថ្ងៃនៅទីក្រុងបាងកក អ្នកសារព័ត៌មានកម្ពុជា នឹងត្រូវបានរៀបចំឲ្យទៅទស្សនាក្លិបវាយសីថ្នាល SCG Badminton Academy កីឡដ្ឋាន SCG Muangthong Stadium រួមទាំងចូលរួមសន្និសីទសារព័ត៌មានស្តីព្រឹត្តិការណ៍ SCG Muangthong United ASEAN Tour ឆ្នាំ២០១៦ ។
នាវេលាម៉ោង៦ល្ងាចថ្ងៃទី១៣ ខែធ្នូ ការប្រកួតរវាងក្លិបកំពូលរបស់ថៃនៅកីឡដ្ឋាន SCG Muangthong Stadium នឹងត្រូវរៀបចំឡើង រវាងក្រុមម្ចាស់ផ្ទះ SCG Muangthong United ជាមួយក្រុម Nakhon Rachsima FC។
នេះជាការប្រកួតនៅមុនដំណើរមកដល់កម្ពុជារបស់ក្លិប SCG Muangthong United ដោយនៅថ្ងៃទី១៦ ខែមករា ឆ្នាំ២០១៦ ពួកគេត្រូវប៉ះជាមួយក្រុម K Cement Cambodian All Stars (ឬ MCL All Stars) នៅពហុកីឡដ្ឋានជាតិអូឡាំពិក។ សហព័ន្ធកីឡាបាល់ទាត់កម្ពុជា បានតែងតាំងគ្រូបង្វឹកក្លិបបឹងកេតអង្គរ លោក ប្រាក់ សុវណ្ណារ៉ា ក្នុងការដឹកនាំក្រុម K Cement Cambodian All Stars ដោយលោកនឹងធ្វើការជ្រើសរើសកីឡាករទាំងខ្មែរ និងបរទេសដែលប្រកបអាជីពបាល់ទាត់នៅកម្ពុជា។
កម្មវិធីនេះ គឺជាផ្នែកមួយព្រឹត្តិការណ៍ប្រកួតបាល់ទាត់មនុស្សធម៌និងមិត្តភាព ដែលបានផ្ដួចផ្ដើមដោយក្រុមហ៊ុន អេស ស៊ី ជី ក្នងគោលបំណងផ្សារភ្ជាប់ចំណងមិត្តភាពរវាងកម្ពុជា-ថៃ តាមរយៈកីឡាបាល់ទាត់។ ម្យ៉ាងវិញទៀត ព្រឹត្តិការណ៍ SCG Muangthong United ASEAN Tour ក៏ជាការរៃអង្គាសប្រាក់សម្រាប់សកម្មភាពមនុស្សធម៌ ដោយសារប្រាក់ចំណូលដែលបានពីការលក់សំបុត្រក្នុងការប្រកួតនឹងត្រូវប្រគល់ជូនមន្ទីរពេទ្យគន្ធបុប្ផាជាដើម៕
Tag:
បាល់ទាត់
Muangthong United
© រក្សាសិទ្ធិដោយ thmeythmey.com