អត្តពលិកប៉ារ៉ាហ្គេមកម្ពុជាទទួលបានការស្វាគមន៍ពីរដ្ឋមន្ត្រីក្រសួងសង្គមកិច្ច

កីឡាជាតិ

ជាតិ

អត្តពលិកប៉ារ៉ាហ្គេមកម្ពុជាទទួលបានការស្វាគមន៍ពីរដ្ឋមន្ត្រីក្រសួងសង្គមកិច្ច

11, Dec 2015 , 7:19 pm

រូបភាព

ដោយ:

កីឡាករ-កីឡាការិនីជនពិការកម្ពុជាបានមកដល់កម្ពុជាវិញហើយកាលពីយប់ថ្ងៃទី១០ ខែធ្នូ ដោយនាំមកជាមួយនូវមេដាយចំនួន៩ ពីព្រឹត្តិការណ៍អាស៊ីកីឡាប៉ារ៉ាហ្គេមលើកទី៨ រយៈពេល៧ថ្ងៃ នៅប្រទេសសិង្ហបុរី។ ការមកដល់កម្ពុជានេះដែរ ដោយទទួលបានការស្វាគមន៍ពីរដ្ឋមន្ត្រីក្រសួងសង្គមកិច្ច អតីតយុវជន និងយុវនិតិសម្បទា។

កីឡាករកីឡាការិនីជនពិការកម្ពុជាអមមកជាមួយនូវមេដាយចំនួន៩គ្រឿងបានមកដល់កម្ពុជាវិញហើយកាលពីយប់ថ្ងៃទី១០ ខែធ្នូ ដោយទទួលបានការស្វាគមពីសំណាក់គណៈប្រតិភូនៅអាកាសយានដ្ឋានអន្តរជាតិភ្នំពេញ ជាពិសេសទទួលបានការដង្ហែក្បួនអមជាមួយវង់ភ្លេងឆៃយ៉ាំ មកកាន់ក្រសួងសង្គមកិច្ច អតីតយុវជន និងយុវនិតិសម្បទា ដើម្បីចូលជួប លោក វង សូត រដ្ឋមន្ត្រីក្រសួងសង្គមកិច្ច អតីតយុវជន និងយុវនិតិសម្បទា។

ឆ្លៀតក្នុងឱកាសនោះដែរ លោក វង សូត បានមានប្រសាសន៍កោតសរសើរដល់អត្តពលិកពិការទាំងនោះ ដែលបានលះបង់ពេលវេលាដ៏មានតម្លៃ និងកម្លាំងកាយរបស់ខ្លួន ដើម្បីកិត្តិយសជាតិ។ លោករដ្ឋមន្ត្រីទទួលស្គាល់ថាកាលពីពេលកន្លងមកលោកមិនដែលបានរៀបចំទទួលអត្តពលិកពិការសមរម្យនោះទេ នេះជាលើកទីមួយហើយដែលរៀបចំទទួលដូច្នេះ។

គួរបញ្ជាក់ថា សម្រាប់ការប្រកួតកីឡាប៉ារ៉ាហ្គេមជើងឯកអាស៊ីលើកទី៨នៅប្រទេសសិង្ហបុរី អត្តពលិកកម្ពុជាទទួលបានមេដាយចំនួន៩គ្រឿង(មាស១ ប្រាក់២ និងសំរឹទ្ធ៦ )ដោយមេដាយទាំងនេះរកបានដោយអត្តពលិក៧នាក់ ក្នុងនោះមានកីឡាករ ប៊ុង ហុង កីឡាករ ឈុន ពន់ កីឡាករ ហេង សាវឿន កីឡាករ សាន ម៉ៅ កីឡាករ វ៉ាន់ វុន កីឡាករ ង៉ែត បូ និងកីឡាការនី ធិន សេងហុន ក្នុងនោះ កីឡាករ ប៊ុង ហុង និង ឈុន ពន់ បានទទួលមេដាយរហូតដល់ទៅពីរ។

អត្តពលិកជនពិការដែលទទួលបានមេដាយទាំងនោះ នឹងទទួលបានប្រាក់លើកទឹកចិត្តពីសំណាក់រាជរដ្ឋាភិបាលកម្ពុជាផងដែរ ដោយមេដាយមាសទទួលបានថវិកា ៤០លានរៀល ចំណែកមេដាយប្រាក់ទទួលបានថវិកាចំនួន ៣២លានរៀល និងមេដាយសំរឹទ្ធទទួលបានថវិកា ២៤លានរៀល។

ក្នុងព្រឹត្តិការណ៍ដែលរៀបចំពីថ្ងៃទី៣ ដល់ថ្ងៃទី៩ ខែធ្នូ ថៃទទួលបានមេដាយច្រើនជាងគេលើគ្រប់ប្រភេទមេដាយ ដោយរកបានសរុប២៥០គ្រឿង ខណៈឥណ្ឌូនេស៊ី ម៉ាឡេស៊ី និងវៀតណាម សុទ្ធតែមានចំនួនលើស១០០គ្រឿង។ ម្ចាស់ផ្ទះសឹង្ហបុរី មីយ៉ាន់ម៉ា និងហ្វីលីពីន ឈ្នះមេដាយលើស១០គ្រឿង ខណៈប្រ៊ុយណេឈរពីលើកម្ពុជា ដោយរកបានសរុប១២គ្រឿង រីឯឡាវរកបានប្រាក់២គ្រឿង និងសំរឹទ្ធ៣គ្រឿង ស្ថិតនៅបាតតារាង៕