លោក ហ៊ុន សែន បង្ហាញថាការលេងកីឡានាំឲ្យលោកមានសុខភាពល្អ

កីឡាជាតិ

ជាតិ

លោក ហ៊ុន សែន បង្ហាញថាការលេងកីឡានាំឲ្យលោកមានសុខភាពល្អ

12, Dec 2015 , 11:14 am

រូបភាព

ដោយ: ថ្មីៗ

កាលពីអំឡុងទសវត្សរ៍១៩៨០-១៩៩០ លោក ហ៊ុន សែន និយមលេងបាល់ទះ បាល់ទាត់ និងវាយប៊ូល ហើយចាប់ពីឆ្នាំ២០០០មក លោកប្តូរទៅលេងកីឡាវាយកូនគោលវិញ ដែលស្របនឹងកម្លាំងរបស់ខ្លួន។ នេះបើតាមការសរសេរ និងការបង្ហោះរូបភាពនៅហ្វេសប៊ុកផ្ទាល់របស់លោកនាយករដ្ឋមន្ត្រី។

ជាមួយនឹងរូបចំនួន៨សន្លឹក លោកនាយករដ្ឋមន្ត្រី បានសរសេរថា៖ «នេះជាប្រភេទកីឡាដែលខ្ញុំធ្លាប់លេង តាំងពីក្រោយរំដោះចេញពីរបប ប៉ុលពត ឆ្នាំ១៩៧៩។ បាល់ទះ បាល់ទាត់ វាយប៊ូលក្នុងទសវត្សរ៍ ១៩៨០-១៩៩០។ ចាប់ពីឆ្នាំ២០០០មក ខ្ញុំប្តូរមកលេងកីឡាវាយកូនគោល ដែលជាកីឡាស្របនិងកម្លាំងរបស់យើង»។

លោកបានបន្ថែមថា គ្រប់កីឡាដែលយើងធ្លាប់លេង ទោះមានចំណុចបច្ចេកទេសខុសគ្នា តែមានចំណុចរួមដូចគ្នាគឺ សុខភាព មិត្តភាព និងស្មារតីសហការ។ ជាមួយគ្នានេះ លោកបានសំណូមពរដល់យុវជនឲ្យចូលរួមក្នុងសកម្មភាពកីឡា និងឲ្យពលរដ្ឋចូលរួមហាត់ប្រាណដើម្បីសុខភាព។

លោក ហ៊ុន សែន បានអះអាងថា រូបទាំង៨សន្លឹកដែលលោកបានបង្ហោះនៅលើហ្វេសប៊ុក ដើម្បីប្រៀបធៀបសុខភាពរវាងមនុស្សអាយុជាង៣០ឆ្នាំ ជាមួយមនុស្សអាយុជាង៦០ឆ្នាំ ដែលសកម្មភាពកីឡាបានជួយយ៉ាងច្រើន៕