កីឡាជាតិ
ជាតិ
អត្តពលិកកម្ពុជា ២ រូបនឹងបង្ហាញខ្លួនក្នុងព្រឹត្តិការណ៍ពាក់កណ្តាលម៉ារ៉ាតុននៅចិន
×
សហព័ន្ធកីឡាអត្តពលកម្មកម្ពុជានឹងបញ្ជូនកីឡាករកីឡាការនីកម្ពុជា ២ រូបដែលដឹកនាំដោយ លោក ហ៊ុន បូរី អគ្គលេខាធិការដ្ឋានសហព័ន្ធកីឡាអត្តពលកម្មកម្ពុជា ដើម្បីចូលរួមប្រកួតនៅក្នុងព្រឹត្តិការណ៍ រត់ប្រណាំងពាក់កណ្តាលម៉ារ៉ាតុនលក្ខណៈអន្តរជាតិខួបលើកទី១០ ក្នុងទីរួមខេត្តណានីង ប្រទេសចិន នៅថ្ងៃទី១២ ខែធ្នូ ខាងមុខនេះ។
កីឡាករកីឡាការនីដែលចូលរួមប្រកួតក្នុងព្រឹត្តិការណ៍នោះរួមមានកីឡាករ ផាន សុភ័ក្រ មកពីក្លិបក្រសួងការពារជាតិ ប្រកួតលើវិញ្ញាសា ២១គីឡូម៉ែត្រ និងកីឡាការនី ហេង ម៉ីជូ មកក្លិបសាកលវិទ្យាល័យអាស៊ីអឺរ៉ុប ប្រកួតលើវិញ្ញាសា១០គីឡូម៉ែត្រ។ នេះបើតាមការឱ្យដឹងរបស់ លោក ប៉ែន វុទ្ធី អគ្គលេខាធិការសហព័ន្ធកីឡាអត្តពលកម្មកម្ពុជា។
លោក ប៉ែន វុទ្ធី នេះជាលើកទី១ហើយសម្រាប់សហព័ន្ធកីឡាអត្តពលកម្មកម្ពុជា ដែលបានបញ្ជូនកីឡាករកីឡាការនីឱ្យចូលរួមប្រកួតក្នុងព្រឹតិ្តការណ៍រត់ប្រណាំងពាក់កណ្តាលម៉ារ៉ាតុងលក្ខណៈអន្តរជាតិនៅទីរួមខេត្តមួយនេះ ដោយសារលើកមុនរាល់ការចំណាយទាំងអស់គេតម្រូវឱ្យខាងសហព័ន្ធចំណាយ ប៉ុន្តែលើកនេះខាងប្រទេសចិនជាអ្នកចំណាយ។
លោក ប៉ែន វុទ្ធី បញ្ជាក់ថា៖«នេះជាលើកទី១ហើយ ដែលសហព័ន្ធបញ្ជូនកីឡាករកីឡាការនីឱ្យចូលរួមប្រកួតក្នុងព្រឹត្តិការណ៍ដែលធ្វើនៅខេត្តមួយនេះ ព្រោះរាល់ដងគេតម្រូវឱ្យខាងកម្ពុជា ជាអ្នកចំណាយ ប៉ុន្តែលើកនេះខាងចិនជាអ្នកចំណាយ»។
លោក ប៉ែន វុទ្ធី បានបញ្ចាក់ថា យើងនឹងចេញដំណើរពីទីក្រុងភ្នំពេញនៅថ្ងៃទី១០ ខែធ្នូ ប្រសិនបើមិនមានការកែប្រែសំបុត្រយន្តហោះ ចំណែកការប្រកួតចាប់ផ្តើមនៅថ្ងៃទី១២ ខែធ្នូ។
Tag:
ការរត់ពាក់កណ្តាលម៉ារ៉ាតុន
© រក្សាសិទ្ធិដោយ thmeythmey.com