កែ ឡេង ចាត់ទុក ថៃ វៀតណាម និងឡាវ ជាគូប្រជែងដ៏ខ្លាំងក្នុងព្រឹត្តិការណ៍ជើងឯកអាស៊ី

កីឡាជាតិ

ជាតិ

កែ ឡេង ចាត់ទុក ថៃ វៀតណាម និងឡាវ ជាគូប្រជែងដ៏ខ្លាំងក្នុងព្រឹត្តិការណ៍ជើងឯកអាស៊ី

13, Dec 2015 , 1:12 pm

រូបភាព

ដោយ:

កីឡាការិនី កែ ឡេង ម្ចាស់ជើងឯកលំដាប់ពិភពលោក បានចាត់ទុកប្រទេសចំនួន៣ ជាឧបសគ្គធំរបស់កម្ពុជាក្នុងការដណ្តើមយកម្ចាស់ជើងឯកអាស៊ីកីឡាប៉េតង់ប្រចាំឆ្នាំ២០១៥ ដែលកម្ពុជា នឹងធ្វើជាម្ចាស់ផ្ទះនៃការប្រកួតនេះ ចាប់ពីថ្ងៃទី១៧ ដល់ថ្ងៃទី១៩ ខែធ្នូ។ ការប្រកួតនឹងធ្វើឡើងនៅអគារដំបូលទូកក្នុងពហុកីឡដ្ឋានជាតិអូឡាំពិក។

កីឡាការនី កែ ឡេង បានចាត់ទុកប្រទេស ថៃ វៀតណាម និងឡាវ ជាឧបសគ្គធំសម្រាប់ការប្រកួតកីឡាប៉េតង់ជើងឯកអាស៊ីប្រចាំឆ្នាំ២០១៥ ដែលនឹងចាប់ផ្តើមនៅថ្ងៃទី១៧ ដល់ថ្ងៃទី១៩ ខែធ្នូ នៅពហុកីឡដ្ឋានជាតិអូឡាំពិក។ ទោះបីជាយ៉ាងនេះក្តីអ្នកស្រីបានចាត់ទុកការភ័យខ្លាចគ្រាន់តែជាអារម្មណ៍ម្នាក់ៗប៉ុណ្ណោះ ចំពោះខ្លួនអ្នកស្រីផ្ទាល់មិនមានការភ័យខ្លាចនោះទេជួបជាមួយអ្នកណាប្រកួតជាមួយអ្នកនោះ ធ្វើយ៉ាងណាប្រកួតឱ្យអស់ពីសមត្ថភាពក្នុងនាមខ្លួនជាម្ចាស់ផ្ទះ ជាពិសេសត្រូវដណ្តើមយកមេដាយជូនជាតិឱ្យបាន។

កែ ឡេង បានបញ្ជាក់ថា៖«សម្រាប់ប្រទេសទាំងអស់នេះ ខ្ញុំគិតថាមានតែប្រទេសវៀតណាម ឡាវ និងថៃប៉ុណ្ណោះ ដែលយើងធ្វើការប្រកួតប្រជែងគ្នាយ៉ាងស្វិតស្វាញ និងតានតឹងដាក់គ្នាទៅវិញទៅមក។ ប្រទេសដទៃនៅលឺឈ្មោះថាកម្ពុជា ថៃ តែងតែមានការភ័យ តែសម្រាប់កម្ពុជាមិនខ្លាចនោះទេ ទោះបីខ្លាំងប៉ុនណាក៏ដោយ ធ្វើយ៉ាងណាប្រកួតឱ្យអស់ពីសមត្ថភាព»។

លោក អ៊ឹម ផាត គ្រូបង្វឹកផ្នែកបុរស និងជាប្រធានគ្រូបង្វឹកកីឡាប៉េតង់ជម្រើសជាតិកម្ពុជាបានយល់ឃើញ ដូចការគិតរបស់កីឡាការិនី កែ ឡេង ផងដែរ។ ដោយលោកលើកឡើងថា៖«មានតែ៤ប្រទេសប៉ុណ្ណោះ ថៃ ឡាវ ម៉ាឡេស៊ី និងវៀតណាម ដែលខ្ញុំបារម្ភក្រៅពីនេះខ្ញុំមិនមានការបារម្ភនោះទេ តែអ្វីដែលយើងបារម្ភបំផុតគឺថៃ»។

ទោះបីជាយ៉ាងណាក៏ដោយ កីឡាការិនីម្ចាស់ជើងឯកពិភពលោកម្នាក់នេះបានកត់សម្គាល់ថា សម្រាប់ការប្រកួតមួយរយៈចុងក្រោយនេះឃើញថាសមត្ថភាពប្រទេសដែលចូលរួមប្រកួតមានការកើនឡើង ជាពិសេសប្រទេសម៉ាឡេស៊ី មានសមត្ថភាព រីកចម្រើនប្រហាក់ប្រហែលនឹងប្រទេសថៃ វៀតណាម និងឡាវដែរ។ ហើយអ្នកស្រីបានទទួលស្គាល់ថា នៅពេលជួបប្រកួតជាមួយនឹងម៉ាឡេស៊ី វាមានការលំបាកបន្តិចក្នុងការយកពិន្ទុ ដោយសារប្រទេសមួយនេះលេងលក្ខណៈចូលប៊ូលអប់រំ មានន័យថាលេងបែបចូលបាំងមិនឱ្យយើងបានពិន្ទុច្រើន ប៉ុន្តែបើលេងវាយដូចគ្នាយើងមានប្រៀបជាង និងងាយស្រួលក្នុងការយកពិន្ទុ។

គួរបញ្ជាក់ថា សម្រាប់ការប្រកួតនៅថ្ងៃទី១៧ ដល់ថ្ងៃទី១៩ ខែធ្នូ ខាងមុខនេះ កីឡាការនី កែ ឡេង ម្ចាស់ជើងឯកលំដាប់ពិភពលោក នឹងប្រកួតក្នុងវិញ្ញាសាវាយជាក្រុមសន្សំពិន្ទុ និងប្រកួតយកពិន្ទុ។ ហើយនៅថ្ងៃនោះដែរ កីឡាការិនី កែ ឡេង បានប្តេជ្ញានឹងដណ្តើមយកមេដាយជូនជាតិឱ្យបាន៕