អន្តរជាតិ
នយោបាយអន្តរជាតិ
ស្ត្រីអារ៉ាប៊ីសាអូឌីតរំភើបព្រោះស្គាល់សិទ្ធិបោះឆ្នោតលើកដំបូង
×
ការអនុញ្ញាតឲ្យស្ត្រីចូលរួមបោះឆ្នោតថ្នាក់តំបន់ម្សិលមិញនៅអារ៉ាប៊ីសាអូឌីត នេះបាន ក្លាយជា ព្រឹត្តិ ការណ៍ ប្រវត្តិសាស្ត្រសម្រាប់សង្គមប្រកាន់សាសនាខ្ជាប់ខ្ជួននៅតំបន់អារ៉ាប់។ សិទ្ធិស្ត្រី នៅក្នុង ប្រទេ សមួយនេះស្ថិតក្រោមការរឹតត្បិតខ្លាំងព្រោះពួកគេមិនអាចសូម្បីតែបើកឡាន តែការ ចូល រួម និង ឈរឈ្មោះបោះឆ្នោតរបស់ស្រី្តនេះ វាបង្ហាញពីឆន្ទៈក្នុងការកែទម្រង់និងបើកទូលាយសង្គមនៃ របប ដឹកនាំបច្ចុប្បន្នផងដែរ។
ម្សិលមិញនេះ ស្ត្រីជនជាតិអារ៉ាប៊ីសាអូឌីតជាច្រើនពាន់នាក់បានចូលរួមបោះឆ្នោតទាំងទឹកមុខរីករាយ និងសប្បាយចិត្តបំផុត ព្រោះវាពិសោធន៍លើកដំបូងបំផុតក្នុងជីវិតរបស់ពួកគេ។ គេអាចនិយាយបានថា វាជាព្រឹត្តិការណ៍ប្រវត្តិសាស្ត្រ ព្រោះកុំថាឡើយដល់បោះឆ្នោត សូម្បីតែសិទ្ធិបើករថយន្តដោយខ្លួនឯង ក៏ស្ត្រីនៅក្នុងប្រទេសអារ៉ាប៊ីសាអូឌីតមិនមានផង។
ក្រៅពីបើកទូលាយឲ្យស្ត្រីបោះឆ្នោតបាន ស្ថាប័ននយោបាយអារ៉ាប៊ីសាអូឌីតបច្ចុប្បន្នក៏អនុញ្ញាតឲ្យស្តីមានសិទ្ធិឈរឈ្មោះជាបេក្ខជនតំណាងក្នុងក្រុមប្រឹក្សាថ្នាក់តំបន់ផងដែរ។ បើយោងតាមសារព័ត៌មានអង់គ្លេស BBC ស្ត្រី៩៧៨នាក់បានសម្រេចចូលរួមប្រកួតប្រជែង ខណៈដែលស្ត្រី១៣ម៉ឺននាក់ទៀតបានចុះឈ្មោះចូលរួមបោះឆ្នោត។ ប៉ុន្តែបើប្រៀបធៀបរវាងចំនួនស្ត្រី និងបុរសដែលចូលរួមបោះឆ្នោត ស្ត្រីនៅមានចំនួនទាបនៅឡើយ។
យ៉ាងណាក៏ដោយ វាជាជំហានដំបូងនៃការកែទម្រង់ និងបើកទូលាយសិទ្ធិសេរីភាពសម្រាប់ស្ត្រីក្នុងសង្គមដែលទោរទន់ទៅរកសាសនានិងឲ្យតម្លៃបុរសខ្លាំង។ ដូច្នេះ ចាប់តាំងពីពេលនេះទៅថ្ងៃមុខ ស្ត្រីអាចនឹងទទួលបានសិទ្ធិច្រើនជាងនេះ និងអាចចូលរួមក្នុងវិស័យសំខាន់ជាច្រើនដើម្បីបង្កើតសមភាពភេទ និងកែប្រែសង្គមបានទូលំទូលាយផង។
ស្ត្រីម្នាក់ដែលបានទៅចូលរួមបោះឆ្នោតដំបូងគេ ឈ្មោះ Hatoon al-Fassi បានអះអាងប្រកបដោយអារម្មណ៍រំភើបបំផុតព្រោះនាងរង់ចាំថ្ងៃនេះអស់មួយទសវត្សរ៍។ Fassi ថ្លែងថា ៖ «ខ្ញុំរំភើបខ្លាំងណាស់ ហើយវាជារឿងប្រវត្តិសាស្ត្រមួយ»។ ស្ត្រីរូបនេះបានសង្កត់ធ្ងន់ថា វាមិនសំខាន់ទេថា ស្ត្រីប៉ុន្មាននាក់ដែលនឹងជាប់ឆ្នោត តែអ្វីដែលសំខាន់បំផុតនោះគឺការអនុវត្តសិទ្ធិរបស់ស្ត្រីតាមរយៈការបោះឆ្នោតនេះ។
ការបោះឆ្នោតនេះកម្រឃើញណាស់ក្នុងរដ្ឋអារ៉ាប់ដែលជាសង្គមមួយបែបជឿស៊ុបនឹងសាសនាក៏ដូចជាមាននិន្នាការអភិរក្សខ្លាំង។ អារ៉ាប៊ីសាអូឌីត ទើបតែស្គាល់ការបោះឆ្នោតបាន ៣ដងប៉ុណ្ណោះ រាប់ចាប់ពីឆ្នាំ២០០៥មក ព្រោះកាលពីឆ្នាំ ១៩៦៥ ដល់ឆ្នាំ ២០០៥ រដ្ឋឈូងសមុទ្រមួយនេះមិនស្គាល់ការបោះឆ្នោតឡើយ។
ការឈានទៅកែទម្រង់សង្គម និងបើកទូលាយសិទ្ធិសម្រាប់ស្ត្រី ជាគំនិតផ្តួចផ្តើមនិងជាមរតកសំខាន់របស់អតីតមហាក្សត្រ Abdullah ដែលទ្រង់ទើបសោយទិវង្គតកាលពីដើមឆ្នាំ ២០១៥នេះ។ ទ្រង់បានប្រកាសកែទម្រង់ក្នុងអំឡុងឆ្នាំ ២០១២ ដោយទ្រង់ សម្រេចតែងតាំងស្ត្រី៣០រូប ឲ្យកាន់តំណែងក្នុងក្រុមប្រឹក្សាជាន់ខ្ពស់ផ្នែកពិគ្រោះយោបល់ (Shura Council)។ ក្រោយមកគេឃើញរបបដឹកនាំក្រុងរីយ៉ាដ ក៏ប្រឹងប្រែងបង្កើតគោលនយោបាយជំរុញឲ្យស្ត្រីចូលរួមក្នុងវិស័យអប់រំ និងបន្តការសិក្សាថ្នាក់ខ្ពស់ឲ្យបានច្រើនផងដែរ៕
© រក្សាសិទ្ធិដោយ thmeythmey.com