អន្តរជាតិ
នយោបាយអន្តរជាតិ
លោក អូបាម៉ានឹងទៅគុយបា បើលោកអាចជួបសកម្មជនប្រជាធិបតេយ្យ
×
ក្នុងបទសម្ភាសន៍ជាមួយសារព័ត៌មាន Yahoo ប្រធានាធិបតីអាមេរិកលោក បារ៉ាក់ អូបាម៉ា បានប្រកាសថា លោក ចង់ទៅទស្សនកិច្ចនៅក្នុងប្រទេសគុយបា។ គម្រោងរបស់លោកត្រូវធ្វើឡើងមុនពេលដែលអាណត្តិលោកចប់ ហើយទស្សនកិច្ចនេះអាចទៅរួចបើលោក អាចមានឱកាសជួបជាមួយបណ្តាសកម្មជនគាំទ្រប្រជាធិបតេយ្យនៅទីនោះ។
មួយឆ្នាំក្រោយមេដឹកនាំក្រុងវ៉ាស៊ីនតោននិងមេដឹកនាំរដ្ឋាភិបាលក្រុងហាវ៉ាណាឯកភាពគ្នាភ្ជាប់ទំនាក់ទំនងការទូតឡើងវិញ កាលពីថ្ងៃទី ១៤ ខែធ្នូ លោក បារ៉ាក់ អូបាម៉ា ស្រាប់តែប្រកាសថា លោកចង់ទៅទស្សនកិច្ចនៅគុយបានៅពេលខាងមុខ ពោលគឺឲ្យបានមុនពេលអាណត្តិរបស់លោកចប់ទៅ។ ការសម្រេចចិត្តបែបនេះនោះ នឹងត្រូវរៀបចំឡើងនៅពេលខាងមុខ ហើយមន្ត្រីក្រុងវ៉ាស៊ីនតោនអះអាងថាដំណើរទស្សនកិច្ចត្រូវរៀបចំនៅពេល ដែលកាលៈទេសៈសមស្របមកដល់។
ប្រមុខរដ្ឋអាមេរិក បានលើកឡើងថា លោកប៉ងទៅជួបជជែកពិភាក្សាតទល់គ្នាជាមួយលោក រ៉ាអ៊ូល កាស្ត្រូ ( Raul Castro) និងបណ្តាក្រុមសកម្មជនសិទ្ធិមនុស្សនៅទីនោះផង។ ប៉ុន្តែ លោកអូបាម៉ា បានសង្កត់ធ្ងន់ថា បើមានលក្ខខណ្ឌដែលអនុញ្ញាតឲ្យលោកជួបជាមួយសកម្មជនគាំទ្រប្រជាធិបតេយ្យ ទើបលោកទៅគុយបា។
លោកថា ៖« ប្រសិនបើខ្ញុំទៅទស្សនកិច្ចនៅគុយបា ផ្នែកមួយនៃការព្រមព្រៀងគឺថាខ្ញុំអាចជជែកជាមួយមនុស្សគ្រប់គ្នានៅទីនោះ។ ខ្ញុំបានប្រាប់លោក រ៉ាអ៊ូល កាស្ត្រូ ច្បាស់ហើយក្នុងកិច្ចសន្ទនាដោយផ្ទាល់កន្លងមកងថា យើងនឹងបន្តភ្ជាប់ទំនាក់ទំនងជាមួយអ្នកដែលចង់លើកស្ទួយសេរីភាពបញ្ចេញមតិនៅគុយបា»។
លោក បារ៉ាក់ អូបាម៉ា ចង់ឃើញការរីកចម្រើននៃសេរីភាពភាពបញ្ចេញមតិនិងដំណើរលូតលាស់ទៅមុខនៃប្រជាធិបតេយ្យនៅលើកោះគុយបាដែលជាសត្រូវចាស់របស់អាមេរិកនោះ។
ការផ្សាភ្ជាប់ទំនាក់ទំនងនិងរហូតដល់ប្រកាសបើកស្ថានទូតកន្លងមកនេះ ជាសញ្ញាវិជ្ជមានមួយសម្រាប់ការអភិវឌ្ឍទំនាក់ទំនងទ្វេភាគីរវាងប្រទេសទាំងពីរ។ ហើយរដ្ឋអាមេរិកឡាទីនគុយបាននេះនឹងបន្តទទួលប្រយោជន៍ច្រើនពីការភ្ជាប់ទំនាក់ទំនងជាមួយអាមេរិក ព្រោះទណ្ឌកម្មដែលរាំងខ្ទប់ការលូតលាស់នៃសេដ្ឋកិច្ចគុយបា នឹងត្រូវក្រុងវ៉ាស៊ីនតោនដកចេញ។ ក្រោយភ្ជាប់ទំនាក់ទំនងការទូត ក្រុងវ៉ាស៊ីនតោន ក៏សម្រេចដកឈ្មោះគុយបា ចេញពីបញ្ជីរដ្ឋគាំទ្រភេរវកម្មដែរ ហើយភាគីទាំងពីរក៏ឯកភាពគ្នាសម្រួលដល់ការធ្វើដំណើរទៅវិញទៅមក និងការវិនិយោគជាដើម។ តែការដកទណ្ឌកម្មនិងការហ៊ុំព័ទ្ធសេដ្ឋកិច្ចគុយបា ចាំបាច់ត្រូវមានការសម្រេចពីសភាជាមុនសិន មិនមែនពឹងតែលើលោក បារ៉ាក់ អូបាម៉ាម្នាក់ទេ៕
© រក្សាសិទ្ធិដោយ thmeythmey.com