សហព័ន្ធកីឡាសូហ្វតិន្នីស (Soft Tennis) នឹងបញ្ជូនកីឡាករ-កីឡាការិនី១៣នាក់ទៅចូលរួមប្រកួតជ្រើសរើសឯកសូហ្វតិន្នីឥណ្ឌូចិនបូកកូរ៉េខាងត្បូង នៅក្នុងទីក្រុងវៀងចន្ទន៍ ប្រទេសឡាវនៅចុងខែមករា ឆ្នាំ២០១៦ ខាងមុខនេះ។
សហព័ន្ធកីឡាសូហ្វតិន្នីសកម្ពុជា ដែលបង្កើតឡើងកាលពីអំឡុង ខែតុលា ឆ្នាំ២០១៤ បច្ចុប្បន្នមានក្លិបជាសមាជិកក្នុងរាជធានីភ្នំពេញចំនួន៥ និងតាមបណ្តាខេត្តចំនួន៤ (កណ្តាល កំពង់ស្ពឺ ព្រៃវែង និងកំពង់ឆ្នាំង) ដោយមានអត្តពលិកជាង១០០នាក់ ស្រី៣០នាក់។
នាចុងខែមករា និងដើមខែកុម្ភៈឆ្នាំ២០១៦ សហព័ន្ធកីឡាដ៏ថ្មីថ្មោងមួយនេះ នឹងបញ្ចូនកីឡាករកីឡាការិនីចំនួន១៣នាក់ ឲ្យទៅចូលរួមប្រកួតជ្រើសរើសជើងឯក សូហ្វតិន្នីស ឥណ្ឌូចិនបូកកូរ៉េខាងត្បូងដែលនឹងប្រព្រឹត្តទៅនៅទីក្រុងវៀងច័ន្ទន៍ ប្រទេសឡាវ។
លោក ជា ប៊ុនហេង អគ្គលេខាធិការសហព័ន្ធកីឡាសូហ្វតិន្នីសកម្ពុជា បានបញ្ជាក់ថាអត្តពលិកកម្ពុជា១៣នាក់ក្នុងនោះមានស្រី៣នាក់ នឹងធ្វើការប្រកួតប្រជែងជាមួយប្រទេស ឡាវ វៀតណាម និងកូរ៉េខាងត្បូង ដើម្បីដណ្តើមជើងឯកក្នុងព្រឹត្តការណ៍ ជ្រើសរើសឯកសូហ្វតិន្នីឥណ្ឌូចិនបូកកូរ៉េខាងត្បូង ជាលើកដំបូង។
អគ្គលេខាធិការរូបនេះរំពឹងថា ៖«សម្រាប់ការប្រកួតនៅប្រទេសឡាវខាងមុខ ដែលមាន៤ប្រទេសចូលរួមប្រកួតនោះបើសិនកូរ៉េគេមិនចាត់ចំណាត់ថ្នាក់នោះ ខ្ញុំសង្ឃឹមយ៉ាងមុតមាំថាកម្ពុជានឹងក្លាយជាម្ចាស់ជើងឯកក្នុងព្រឹត្តិការណ៍នោះ»។
លោក យី សារិន គ្រូបង្វឹកកីឡាសូហ្វតិន្នីស កត់សម្គាល់ថាកីឡាករកីឡាការិនីកម្ពុជាមានការគោរពពេលវេលាសម្រាប់ការហ្វឹកហាត់ ជាពិសេសបន្ទាប់ពីបានចូលរួមប្រកួត និងឆ្លងកាត់ការហ្វឹកហាត់ឃើញថាកម្រិតបច្ចេកទេស និងសមត្ថភាពមានការកើនឡើងគួរឱ្យកត់សំគាល់អាចទទួលយកបាន ប៉ុន្តែនៅខ្សោយផ្នែកកម្លាំងកាយដោយសារការបរិភោគមិនគ្រប់គ្រាន់។
លោក យី សារិន បានបញ្ជាក់ថា៖«ការហ្វឹកហាត់ឃើញថាគោរពពេលវេលាបាន៨០ភាគរយ ហើយកម្រិតបច្ចេកទេសអាចទទួលយកបាន ប៉ុន្តែនៅខ្សោយខាងផ្នែកកម្លាំងកាយ ដោយសារការហូបមិនបានគ្រប់គ្រាន់»។
នៅឆ្នាំ២០១៦ ខាងមុខ កីឡាសូហ្វតិន្នីសកម្ពុជានៅមានការប្រកួតជាលក្ខណៈអន្តរជាតិច្រើនទៀតដូចជានៅម៉ាឡេស៊ី កូរ៉េខាងត្បូង ជាពិសេសការចូលរួមប្រកួតជើងឯកពិភពលោកលើកទី១៦ នៅប្រទេសប៉ូឡូញនាអំឡុងខែសីហា។
គួរបញ្ជាក់ថា សម្រាប់ការបង្ហាញខ្លួនលើកដំបូងកាលពីខែមេសា ឆ្នាំ២០១៥ ក្នុងព្រឹត្តិការណ៍ 1st AEC World Tour Championship 2015 នៅថៃ កម្ពុជាទទួលបានចំណាត់ថ្នាក់លេខ២បន្ទាប់ពីម្ចាស់ផ្ទះដោយរកបានមេដាយប្រាក់១ និងសំរឹទ្ធ១១ ក្នុងចំណោមអត្តពលិក១៣នាក់៕