អត្តពលិក ១១ ប្រទេសចាប់ផ្តើមប្រជែងដណ្តើមជើងឯកអាស៊ីកីឡាប៉េតង់ថ្ងៃនេះ

កីឡាជាតិ

ជាតិ

អត្តពលិក ១១ ប្រទេសចាប់ផ្តើមប្រជែងដណ្តើមជើងឯកអាស៊ីកីឡាប៉េតង់ថ្ងៃនេះ

17, Dec 2015 , 10:20 am

រូបភាព

ដោយ:

អត្តពលិកពីបណ្តាប្រទេសចំនួន១១ក្នុងតំបន់ ចាប់ផ្តើមធ្វើការប្រជែងគ្នានៅថ្ងៃនេះ ក្នុងព្រឹត្តិការណ៍ដណ្តើមជើងឯកកម្មវិធីប្រកួតកីឡាប៉េតង់ជ្រើសរើសជើងឯកអាស៊ីលើកទី១៩ ឆ្នាំ២០១៦ ដែលកម្ពុជាធ្វើជាម្ចាស់ផ្ទះនៃការប្រកួតនេះចាប់ពីថ្ងៃទី១៧ ដល់ថ្ងៃទី១៩ ខែធ្នូ ដោយមានការចូលរួមជាអធិបតីរបស់លោក សុខ អាន រដ្ឋមន្ត្រីទីស្តីការគណៈរដ្ឋមន្ត្រី និងជាប្រធានសហព័ន្ធកីឡាប៊ូល និងប៉េតង់កម្ពុជា។

លោក អ៊ិន គឹមស្រ៊ុន អគ្គលេខាធិការសហព័ន្ធកីឡាប៊ូល និងប៉េតង់កម្ពុជា ប្រទេសដែលចូលរួមប្រកួតទាំងនោះរួមមាន វៀតណាម ឡាវ ថៃ ម៉ាឡេស៊ី ប្រ៊ុយណេ ឥណ្ឌូណេស៊ី សិង្ហបុរី ជប៉ុន តៃប៉ិ ឥណ្ឌា និងកម្ពុជាដែលជាម្ចាស់ផ្ទះ។ ប្រទេសទាំងនេះនឹងធ្វើការប្រកួតប្រជែងលើវិញ្ញាសា វាយជាក្រុមបុរស នារី សន្សំពិន្ទុ និងវាយយកពិន្ទុ។

លោក អ៊ិន គឹមស្រ៊ុន បានបញ្ជាក់ថា បច្ចុប្បន្នមានប្រទេសជាសមាជិកកីឡា ប៉េតង់ មានរហូត ដល់២១ប្រទេស ប៉ុន្តែប្រទេសខ្លះមានតែឈ្មោះ ប្រទេសដែលសកម្មមានតែ១៥ ប្រទេស ប៉ុណ្ណោះ តែមកដល់ពេលនេះមានប្រទេសចូលរួមប្រកួតតែ១១នោះទេ។ ប្រទេស ដែលមិនមកចូលរួមការប្រកួត ដោយសារប្រទេសទាំងនោះគិតថាខ្លួន មិនមានសមត្ថភាពគ្រប់គ្រាន់ក្នុងការប្រកួត និងដោយសារឆ្នាំនេះនៅតំបន់អាស៊ីមានព្រឹត្តិការណ៍ច្រើនជាហេតុធ្វើឱ្យពួកគេមិនមានលទ្ធភាពបញ្ជូនកីឡាករកីឡាការិនីដើម្បីចូលរួមប្រកួត។

គួរបញ្ជាក់ថា ការប្រកួតជើងឯកអាស៊ីលើកទី១៨ឆ្នាំ២០១៤ ដែលឡាវធ្វើជាម្ចាស់ផ្ទះមិនខុសពីកម្ពុជានោះទេ មានតែ១២ប្រទេសចូលរួមប្រកួតប៉ុណ្ណោះ។ កម្ពុជាទទួលបានមេដាយមាស៤គ្រឿង និងប្រាក់១គ្រឿង ដោយឈរក្នុងចំណាត់ថ្នាក់លេខ១ ក្នុងការទទួលបានមេដាយច្រើនជាងគេ៕